କଟକ ଅଫିସ,୨୧।୮: ଗତ ଦଶ ବର୍ଷ ଭିତରେ ଦେଶରେ ନିଶା ବେପାର ବହୁଗୁଣରେ ବଢ଼ିଯାଇଛି। ନିଶା କାରବାରକୁ ରୋକିବା ପାଇଁ ଏନ୍ଡିପିଏସ୍ ଆକ୍ଟ ରହିଛି। ତଥାପି ନିଶା ମାଫିଆମାନେ ଖସି ଯାଉଛନ୍ତି। ଏଣୁ ନିଶା କାରବାର ସମ୍ପର୍କିତ ମାମଲାଗୁଡ଼ିକର ଶୁଣାଣି ବେଳେ ଅଭିଯୁକ୍ତଙ୍କୁ ଆଇନ୍ ଅନୁଯାୟୀ କଠୋରରୁ କଠୋରରୁ ଦଣ୍ଡ ମିଳିବା ଆବଶ୍ୟକ ବୋଲି ହାଇକୋର୍ଟ ପ୍ରକାଶ କରିଛନ୍ତି। ଜଣେ ଅଭିଯୁକ୍ତଙ୍କ ଜାମିନ୍ର ଶୁଣାଣି ବେଳେ ବିଚାରପତି ସଞ୍ଜୀବ କୁମାର ପାଣିଗ୍ରାହୀ ଉପରୋକ୍ତ ରାୟ ଦେଇଛନ୍ତି।
ବଲାଙ୍ଗୀର ସଦର ଥାନା ପୋଲିସ ନିଶା କାରବାର ଅଭିଯୋଗରେ ବିକାଶ ଦୁରିଆ ନାମକ ଜଣେ ବ୍ୟକ୍ତିଙ୍କୁ ଗିରଫ କରିଥିଲା। ତାଙ୍କ ବିରୋଧରେ ଏନ୍ଡିପିଏସ୍ ଆକ୍ଟର ଧାରା ୨୧(ସି) ଏବଂ ୨୯ରେ ମାମଲା ରହିଛି। ବଲାଙ୍ଗୀର ଦୌରାଜଜ୍ ତଥା ସ୍ବତନ୍ତ୍ର ଜଜ୍ଙ୍କ କୋର୍ଟରେ ଏହି ମାମଲା ବିଚରାଧୀନ ଥିବାବେଳେ ସେ ଜାମିନ୍ ପାଇଁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଏହି ମାମଲାରେ ପୂର୍ବରୁ ମୁଖ୍ୟ ଅଭିଯୁକ୍ତଙ୍କୁ ଜାମିନ୍ ମିଳିଥିବାରୁ ବିକାଶଙ୍କୁ ମଧ୍ୟ ହାଇକୋର୍ଟ ଜାମିନ୍ ପ୍ରଦାନ କରିଛନ୍ତି। ତେବେ ମାମଲାର ଶୁଣାଣି ବେଳେ କୋର୍ଟ କହିଛନ୍ତି ଯେ, ନିଶା ଚାଲାଣ ଓ ବେପାର ବର୍ତ୍ତମାନ ସାମାଜିକ ବ୍ୟାଧିରେ ପରିଣତ ହେଲାଣି। ଯୁବପିଢ଼ିଙ୍କ ମଧ୍ୟରେ ଏହା ହିଂସ୍ର ଆଚରଣ ବଢ଼ାଉଛି। ନିଶା ଦ୍ରବ୍ୟ ଉପତ୍ାଦନ, କାରବାର, ଚାଲାଣ, ବ୍ୟବହାର, ବିକ୍ରି, ଆମଦାନୀ ଆଦି ରୋକିବା ଲକ୍ଷ୍ୟ ନେଇ ଏନ୍ଡିପିଏସ୍ ଆକ୍ଟ କାର୍ଯ୍ୟକାରୀ କରାଯାଇଥିଲା। ହେଲେ ସମସ୍ତ ସୀମା ସରହଦକୁ ଟପି ବର୍ତ୍ତମାନ ନିଶା କାରବାର ବହୁ ପରିମାଣରେ ବଢ଼ିଯାଇଛି। କାଶ ଓ ଯନ୍ତ୍ରଣା ଉପଶମ କରୁଥିବା ଭଳି ଅନେକ ଔଷଧ ଯଥା କଫ୍ଶିରପ୍ରେ ସାମାନ୍ୟ ମାଦକ ଅଂଶ ରହୁଛି। ହେଲେ ଏହି ଔଷଧକୁ ମଧ୍ୟ ନିଶା ପାଇଁ ବ୍ୟବହାର କରାଯାଉଛି। ଏନ୍ଡିପିଏସ୍ ଆକ୍ଟ କାର୍ଯ୍ୟକାରୀ ହେଉଥିବା ସତ୍ତ୍ବେ ଅନେକ ମାମଲାରେ ଦୋଷୀମାନେ ଖସି ଯାଉଛନ୍ତି। ଏଣୁ ନିଶା କାରବାର ସମ୍ପର୍କିତ ମାମଲାଗୁଡ଼ିକର ଶୁଣାଣି ବେଳେ ଅଭିଯୁକ୍ତଙ୍କୁ କଠୋରରୁ କଠୋର ଦଣ୍ଡ ଦେବା ଆବଶ୍ୟକ ବୋଲି କୋର୍ଟ ନିର୍ଦ୍ଦେଶରେ ସ୍ପଷ୍ଟ କରିଛନ୍ତି।