ଖୋର୍ଦ୍ଧା ଅଫିସ,୧୨ା୧୧: ଖୋର୍ଦ୍ଧାରେ ବ୍ରାଉନସୁଗାର ପରେ ମାଦକଦ୍ରବ୍ୟ କାରବାର କାୟା ବିସ୍ତାର କରିବାରେ ଲାଗିଛି। ଏଥିରେ ଏକ ରାକେଟ କାର୍ଯ୍ୟ କରୁଛି। ନାମୀଦାମୀ ବିଦେଶୀ କମ୍ପାନୀ ନାଁରେ ନକଲିି ମଦ ବଜାରରେ ବିକ୍ରି ହେଉଛି। ଏହାର ଚେର ଗଞ୍ଜାମରୁ ଖୋର୍ଦ୍ଧା ପର୍ଯ୍ୟନ୍ତ ଲମ୍ବିଛି। ଦୀର୍ଘଦିନ ଧରି ଏହି କାରବାର ଚାଲିଛି। ଏଠାରୁ ଗ୍ରାମାଞ୍ଚଳକୁ ଚାଲାଣ ହେଉଛି।
ଖୋର୍ଦ୍ଧା ପୁରୁଣା ବସ୍ଷ୍ଟାଣ୍ଡ ଅଞ୍ଚଳରେ ନକଲି ମଦ କାରବାର ହେଉଥିବା ନେଇ ବାରମ୍ବାର ଅଭିଯୋଗ ହେଉଥିଲା। ବିଶେଷ ସୂତ୍ରରୁ ଖବରପାଇ ଅବକାରୀ କମିଶନର ଆଶିଷ ସିଂଙ୍କ ନିର୍ଦ୍ଦେଶକ୍ରମେ ଅବକାରୀ କଟକ ଷ୍ଟେଟ ଫ୍ଲାଇଙ୍ଗ ସ୍କ୍ବାଡ୍ ଅଧୀକ୍ଷକ ଦେବାଶିଷ ପଟେଲଙ୍କ ନେତୃତ୍ୱରେ ଏକ ଟିମ୍ ବୁଧବାର ରାତିରେ ସାଦା ପୋଷାକରେ ଗ୍ରାହକ ସାଜି ପୁରୁଣା ବସ୍ଷ୍ଟାଣ୍ଡସ୍ଥିତ ଏକ ଗ୍ରୋସେରି ଦୋକାନରେ ପହଞ୍ଚିଥିଲେ। ଏହା ପରେ ବିଭିନ୍ନ କମ୍ପାନୀର ମଦ ମାଗିଥିଲେ। ଦୋକାନୀ ଗଣେଶ ସାହୁ ସେମାନଙ୍କୁ ମଦ ଦେବା ପରେ ଏହି ଟିମ୍ ତାଙ୍କୁ କାବୁ କରିନେଇଥିଲା। ଏହା ପରେ ଅବକାରୀ ପୋଲିସ ଗଣେଶଙ୍କୁୁ ଗିରଫ କରିଥିଲା। ତାଙ୍କ ନିକଟରୁ ୨୫ପେଟି ଦାମୀ କମ୍ପାନୀର ନକଲି ମଦ ଜବତ ହୋଇଛିି। ଏହାର ଆନୁମାନିକ ମୂଲ୍ୟ ୨ଲକ୍ଷ ଟଙ୍କା ହେବ। ତେବେ ଖୋର୍ଦ୍ଧା ଅବକାରୀ ଏବଂ ପୋଲିସ ଅଞ୍ଚଳରେ ଏହି କାରବାର ଚାଲିଥିବା ବେଳେ ପୋଲିସ ପାଖରେ କିପରି କୌଣସି ଖବରନାହିଁ, ତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଅଭିଯୁକ୍ତ ଗଣେଶ ଦୀର୍ଘଦିନ ହେବ ଗ୍ରୋସେରି ଦୋକାନ ଆଳରେ ପଛପଟେ ଏହି କାରବାର ଚଳାଇ ଆସୁଥିଲେ। ଏହି କାରବାରରେ ଅନ୍ୟ କେଉଁମାନଙ୍କ ସମ୍ପୃକ୍ତି ରହିଛି, କେଉଁଠୁ ଏହି ନକଲିି ମଦ ଆସୁଛି, ଏହି ରାକେଟ ପଛର ମାଷ୍ଟର ମାଇଣ୍ଡକୁ ଫ୍ଲାଇଙ୍ଗ ସ୍କ୍ବାଡ୍ ଖୋଜୁଥିବା ଜଣାପଡିଛି। ଏହି ଚଢ଼ାଉରେ ଆଇଆଇସି ସରୋଜ କୁମାର ପରିଡା, ଉମାକାନ୍ତ ସ୍ବାଇଁ, ଏସ୍ଆଇ ସଚିନ ବେହେରା, ଏଏସ୍ଆଇ ସାକିର ଉଲ୍ଲା, ନଟବର ମଲିକ, ବ୍ରଜକିଶୋର ବିନ୍ଧାଣୀ, ମୋତିଲାଲ ମହନ୍ତ, କନଷ୍ଟେବଳ ଦିଲୀପ ନନ୍ଦ, ଅଜୟ ବେହେରା, ପ୍ରଦ୍ୟୁମ୍ନ ପାତ୍ର, ଅନ୍ତର୍ଯ୍ୟାମୀ ମଲ୍ଲିକ, ଦିଲ୍ଜିତ ଦାସ, ରୋଜାଲିନ ପଟ୍ଟନାୟକ ସାମିଲ ଥିଲେ।