ବେଗୁନିଆ,୪ା୨(ଡି.ଏନ୍.ଏ.): ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅଞ୍ଚଳରେ ନିଶା କାରବାର ଦିନକୁ ଦିନ ବଢ଼ିବାରେ ଲାଗିଛି। ମଦ ଚୋରା ବ୍ୟବସାୟୀମାନେ ଆଢୁଆଳ ପଛରେ ରହି ମହିଳା ଓ ଯୁବକଙ୍କୁ ଅର୍ଥ ଲୋଭ ଦେଖାଇ ସାମିଲ କରାଉଛନ୍ତି। ଫଳରେ ଯୁବପିଢ଼ି ବିପଥଗାମୀ ହେବା ସହ ଆପରାଧିକ କାର୍ଯ୍ୟକଳାପ ବଢୁଛି। ଏନେଇ ବାରମ୍ବାର ଅଭିଯୋଗ ସତ୍ତ୍ୱେ ପୋଲିସ ଓ ଅବକାରୀ ବିଭାଗ ପକ୍ଷରୁ ସେଭଳି ପଦକ୍ଷେପ ନିଆଯାଉ ନ ଥିବା ସାଧାରଣରେ ଅଭିଯୋଗ ହେଉଛି।
ଯେ, ଏହି ବ୍ଲକ ଅଧୀନରେ ୧୬୨ଗ୍ରାମ ରହଛି। ହେଲେ ଏଠାରେ ନିଶା କାରବାର ରୋକିବାକୁ ରହିଥିବା ପୋଲିସ ଓ ଅବକାରୀ ବିଭାଗ ବିଫଳ ହୋଇଛି। ନକଲି ଦେଶୀ ଓ ବିଦେଶୀ ମଦ ପ୍ରସ୍ତୁତ କରାଯାଇ ଖୁଲମଖୁଲା ବିକ୍ରି କରାଯାଉଛି। ଏହା ଦ୍ୱାରା ବେପାରୀମାନେ ଲାଭବାନ ହେଉଥିବା ବେଳେ ଯୁବପିଢ଼ି ବିପଥଗାମୀ ହେଉଛନ୍ତି। ଡାଳତୋଳା, ସିକୋ, ଖଣତି, କୁଶପଲ୍ଲା, ବଡ଼ପଦର, କୋଲୁହାପାଟଣା, ଗୁଡୁମ, ଏକଡାଳିଆ, ପିଚୁକୁଳି, ସିଉଳା, ସାନପଦର ଅଞ୍ଚଳରେ ଦେଶୀ ମଦ ପ୍ରସ୍ତୁତି ହେଉଥିଲେ ମଧ୍ୟ ପୋଲିସ କିମ୍ବା ଅବକାରୀ ବିଭାଗ ପକ୍ଷରୁ ସେଭଳି ଚଢ଼ାଉ ହେଉନାହିଁ ବୋଲି ସାଧାରଣରେ ମତପ୍ରକାଶ ପାଉଛି। ଅନେକ ସମୟରେ ମଦ ପ୍ରସ୍ତୁତି ଓ ବିକ୍ରିକୁ ନେଇ ମାରପିଟ୍ ମଧ୍ୟ ହେଉଛି। ଗତ ଜାନୁୟାରୀରୁ ଅଦ୍ୟାବଧି ବେଆଇନ ମଦ ବିକ୍ରି ଅଭିଯୋଗରେ ଜଙ୍କିଆ ଥାନା ଅଧୀନ ସିକୋ ଫାଣ୍ଡିରେ ୫ଟି, ବାଘମାରୀ ଥାନାରେ ୨ଟି ଓ ସଦର ଥାନାରେ ୨ଟି ମାମଲା ରୁଜୁ ହୋଇଥିବା ଜଣାପଡ଼ିଛି। ସ୍ଥାନୀୟ ଅବକାରୀ ବିଭାଗ ପକ୍ଷରୁ ଚଢ଼ାଉ ନ ହେବାରୁ ଗ୍ରାମାଞ୍ଚଳରେ ଚୋରା ମଦ କାରବାର ବଢ଼ିଚାଲିଛି। ଏନେଇ ସ୍ଥାନୀୟ ସାମାଜିକ ସଙ୍ଗଠନର ସଭ୍ୟ ମାୟାଧର ବେହେରା କୁହନ୍ତି, ବେଆଇନ ମଦ କାରବାର ଯୋଗୁ ଗ୍ରାମାଞ୍ଚଳରେ ଅସାମାଜିକଙ୍କ ଉତ୍ପାତ ବଢ଼ିବାରେ ଲାଗିଛି। ନିଶା ନିବାରଣ ସଚେତନତା ସୃଷ୍ଟି କରାଯିବା ସହ ପୋଲିସ ଓ ଅବକାରୀ ବିଭାଗର କାର୍ଯ୍ୟାନୁଷ୍ଠାନ ଜରୁରୀ ହୋଇପଡ଼ିଛି। ମହିଳା ସଭାନେତ୍ରୀ ରମାମଣି ସାହୁ କହିଛନ୍ତି, ଗ୍ରାମାଞ୍ଚଳରେ ବିକ୍ରି ହେଉଥିବା ଦେଶୀ ମଦ ପିଇ ଲୋକେ ଅସୁସ୍ଥ ହେଉଛନ୍ତି। ଦୈନିକ ରୋଜଗାର ଉପରେ ପ୍ରଭାବ ପଡିବା ସହ ପାରିବାରିକ ବିଶୃଙ୍ଖଳା ହେଉଛି। ଅନ୍ୟପଟେ ବେଗୁନିଆ ଥାନା ଅଧିକାରୀ ଲକ୍ଷ୍ମୀ ପ୍ରସାଦ ଶତପଥୀ କହିଛନ୍ତି, ନିଶା କାରବାର ରୋକିବା ଲାଗି ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି। ଖୁବ୍ଶୀଘ୍ର ଏହି ବ୍ଲକ ଅଞ୍ଚଳ ନିଶା ମୁକ୍ତ ହେବ।