ନୂଆଦିଲ୍ଲୀ,୨୦ା୧୧: ନିର୍ବାଚନ ଅନୁଷ୍ଠିତ ହେଉଥିବା ୫ ରାଜ୍ୟରୁ ବର୍ତ୍ତମାନ ସୁଦ୍ଧା ୧,୭୬୦ କୋଟି ଟଙ୍କାରୁ ଊର୍ଦ୍ଧ୍ୱ ମୂଲ୍ୟର ଡ୍ରଗ୍ସ, ମଦ, ମୂଲ୍ୟବାନ୍ ଧାତୁ ଓ ନଗଦ ଅର୍ଥ ଜବତ ହୋଇଥିବା ନିର୍ବାଚନ କମିଶନ ସୋମବାର କହିଛନ୍ତି। ଭୋଟରମାନଙ୍କୁ ପ୍ରଲୋଭିତ କରିବା ଲକ୍ଷ୍ୟରେ ଏହି ଟଙ୍କା ଓ ଅନ୍ୟାନ୍ୟ ସାମଗ୍ରୀ ପଠାଯାଇଥିଲା। ଅକ୍ଟୋବର ୯ରେ ନିର୍ବାଚନ ଘୋଷଣା ହେବା ପରଠାରୁ ଏହିସବୁ ସାମଗ୍ରୀ ଜବତ ହୋଇଛି, ଯାହା ୨୦୧୮ରେ ୫ ରାଜ୍ୟ ବିଧାନସଭା ନିର୍ବାଚନ ବେଳେ ହୋଇଥିବା ଜବତ ତୁଳନାରେ ୭ ଗୁଣ। ୨୦୧୮ ନିର୍ବାଚନ ବେଳେ ୨୩୯.୧୫ କୋଟି ଟଙ୍କାର ମଦ, ଉପହାର ସାମଗ୍ରୀ ଓ ନଗଦ ଅର୍ଥ ଜବତ ହୋଇଥିଲା। ଇତିମଧ୍ୟରେ ଛତିଶଗଡ଼, ମଧ୍ୟପ୍ରଦେଶ ଓ ମିଜୋରାମରେ ଭୋଟ ଶେଷ ହୋଇଥିବାବେଳେ ରାଜସ୍ଥାନରେ ଆସନ୍ତା ୨୫ ଏବଂ ତେଲଙ୍ଗାନାରେ ୩୦ ତାରିଖରେ ଅନୁଷ୍ଠିତ ହେବ। ପୂର୍ବରୁ ଗୁଜରାଟ, ହିମାଚଳପ୍ରଦେଶ, ନାଗାଲାଣ୍ଡ, ମେଘାଳୟ, ତ୍ରିପୁରା ଓ କର୍ନାଟକରେ ହୋଇଥିବା ନିର୍ବାଚନ ବେଳେ ୧,୪୦୦ କୋଟି ଟଙ୍କାର ସାମଗ୍ରୀ ଜବତ ହୋଇଥିଲା, ଯାହା ପୂର୍ବ ନିର୍ବାଚନ ତୁଳନାରେ ୧୧ ଗୁଣ ଥିଲା।
