ଖମାର,୫।୧୨(ଡି.ଏନ.ଏ.) – ଅବକାରୀ ରାଜସ୍ୱରେ ବୃଦ୍ଧି ପାଇଁ ରାଜ୍ୟରେ ମଦର ବ୍ୟାପକ ପ୍ରସାର କରାଯାଉଛି। ନୂଆ ନୂଆ ଦୋକାନ ଖୋଲିବାକୁ ଅନୁମତି ଦିଆଯାଉଛି। ଏଥିରୁ ଗ୍ରାମାଞ୍ଚଳ ମଧ୍ୟ ବାଦ୍ ପଡ଼ୁନାହିଁ। ଅନେକ ସ୍ଥାନରେ ମହିଳାମାନେ ବିରୋଧ କରୁଥିଲେ ମଧ୍ୟ ତାହାକୁ ଗୁରୁତ୍ୱ ଦିଆଯାଉ ନାହିଁ। ଗାଁ ଗାଁରେ ଦେଶୀ, ବିଦେଶୀ ମଦ କାଉଣ୍ଟର ଖୋଲାଯିବା ଦ୍ୱାରା ଗ୍ରାମ୍ୟ ସଂସ୍କୃତି ସଙ୍କଟରେ ପଡ଼ିଲାଣି। ସାମାଜିକ ଓ ପାରିବାରିକ ବିଶୃଙ୍ଖଳା ବଢ଼ିଲାଣି। ହାତପାହାନ୍ତାରେ ନିଶା ସାମଗ୍ରୀ ମିଳିଯାଉଥିବାରୁ ନାବାଳକମାନେ ଏହା କବଳରେ ପଡ଼ି ବିଭିନ୍ନ ଅସାମାଜିକ କାର୍ଯ୍ୟ ଆଡ଼େ ମୁହାଁଇଲେଣି। ପୋଲିସ ଓ ଅବକାରୀ ବିଭାଗର ଅପାରଗତା ଯୋଗୁ ଚୋରା କାରବାର ଏପରି ବଢ଼ିଲାଣି ଯେ ଗ୍ରାମାଞ୍ଚଳରେ ନିଶା ଆଉ ନିୟନ୍ତ୍ରଣରେ ନ ଥିବା ବୁଦ୍ଧିଜୀବୀମାନେ ମତବ୍ୟକ୍ତ କରୁଛନ୍ତି।
ଅନୁଗୋଳ ଜିଲା ପାଲଲହଡ଼ା ବ୍ଲକ ଖମାର ଅଞ୍ଚଳରେ ଚୋରା ମଦ କାରବାର ବଢ଼ିବାରେ ଲାଗିଛି। ଏଠାରେ ଗୋଟିଏ ସରକାରୀ ଲାଇସେନ୍ସପ୍ରାପ୍ତ ଦେଶୀ ମଦ ଭାଟି ଥିବାବେଳେ ୩ଟି ବିଦେଶୀ ମଦ କାଉଣ୍ଟର ରହିଛି। କିନ୍ତୁ ଚୋରାରେ ମଦ ବିକ୍ରି କରାଯାଉଥିବା ଦୋକାନ ସଂଖ୍ୟା ଶତାଧିକ। କିଏ ଜଳିଖିଆ ଦୋକାନରେ ଦେଶୀ ପାଉଚ, ବୋତଲରେ ମଦ ବିକ୍ରି କରୁଛନ୍ତି ତ ଆଉ କେଉଁ ରାଶନ, ପାନ ଦୋକାନ, ଢାବା ଓ ଚାଳିଆ ହୋଟେଲରେ ଏହି କାରବାର ଜୋର୍ ଧରିଛି। କେବଳ ଦେଶୀ ନୁହେଁ, ବିଦେଶୀ ମଦର ମଧ୍ୟ ଚୋରା କାରବାର ହେଉଛି। ଅସାଧୁ ବ୍ୟବସାୟୀମାନେ ବିଭିନ୍ନ ଅଞ୍ଚଳରେ ଏଜେଣ୍ଟ ରଖି ସେମାନଙ୍କ ଜରିଆରେ ଦେଶୀ ଓ ବିଦେଶୀ ଚୋରା ମଦ ଗ୍ରାମାଞ୍ଚଳକୁ ପଠାଉଛନ୍ତି। ସାଇକେଲ, ବାଇକ୍ ଓ ତେଲ ଜାର୍ ଯୋଗେ ଶତାଧିକ ଲିଟର ମଦ ଏଜେଣ୍ଟମାନେ ଯୋଗାଇ ଦେଉଛନ୍ତି। ପାଉଚ ମଦର ଅଧିକ ଚାହିଦା ଥିବାରୁ ଏହି ଚୋରା ବେପାରୀମାନେ ଦେଶୀ ପାଉଚ ଭଳି ବିଦେଶୀ ମଦକୁ ମଧ୍ୟ ପାଉଚ ଆକାରରେ ବିକ୍ରି କରୁଥିବା ଅଭିଯୋଗ ବଢ଼ିବାରେ ଲାଗିଛି। ଗାଁଗୁଡ଼ିକରେ ଏହି ଚୋରା ବ୍ୟବସାୟ ବହୁଳ ଭାବେ ଚାଲିଥିବାରୁ ବହୁ ସଂଖ୍ୟାରେ ନାବାଳକ ଏହି କାରବାରରେ ଯୋଡ଼ି ହେବା ସହ ନିଶା ପାନ କରୁଛନ୍ତି। ଏଥିଯୋଗୁ ଗାଁର ସାମାଜିକ ସ୍ଥିତି ବିଗିଡ଼ିବା ସହ ଅନେକ ସମୟରେ ଅପରାଧମାନ ଘଟୁଛି। ନିଶା ବ୍ୟବହାର କରୁଥିବା ନାବାଳକମାନେ ଚୋରି, ଡକାୟତି ଆଦି ଅସାମାଜିକ କାର୍ଯ୍ୟରେ ଲିପ୍ତ ରହୁଥିବା ଜଣାପଡୁଛି। ଖମାର ଥାନା ଅଞ୍ଚଳର ଶଙ୍ଖମୁର, ଖମାର, ମୁଣ୍ଡୁରିବଡା, ପରାଚାଟ, କୁଞ୍ଜାମ, ଇଞ୍ଜିଡ଼, ଆଲୋରୀ, ବଦସଡା ଓ ଜାତୀୟ ରାଜପଥ ୧୪୯ରେ ଆପରାଧିକ କାର୍ଯ୍ୟକଳାପ ବଢ଼ୁଛି। ପୋଲିସ ଓ ଅବକାରୀ ବିଭାଗ ଏଥିପ୍ରତି ଆଖିବୁଜି ଦେଇଥିବାରୁ ଚୋରା ମଦ କାରବାର ଅପରାଧ ବୃଦ୍ଧିର କାରଣ ସାଜିଥିବା ଅଞ୍ଚଳବାସୀ ଅଭିଯୋଗ କରିଛନ୍ତି।
ଖମାର ଅଞ୍ଚଳରେ ଚଢ଼ାଉ ହେବ
ମଦ ଚୋରା କାରବାର ରୋକିବାକୁ କିଛିଦିନ ହେବ ଅନୁଗୋଳ ଜିଲାର କଣିହାଁ ଅଞ୍ଚଳରେ ନିୟମିତ ଚଢ଼ାଉ କରାଯାଉଛି। ପାଲଲହଡ଼ା ବ୍ଲକ ଅଞ୍ଚଳରେ ମଧ୍ୟ ଏପରି ଚଢ଼ାଉ ଆଗାମୀ ଦିନରେ କରାଯିବ। ଅବକାରୀ ବିଭାଗ ଜିଲାରେ ତତ୍ପର ରହିଛି।
-ଅନିତା ଓଝା, ଅବକାରୀ ଇନ୍ସପେକ୍ଟର, ଅନୁଗୋଳ
ଯୁବପିଢ଼ି ନିଶା ପଥର ଯାତ୍ରୀ
ମଦର ପ୍ରଚାର ପ୍ରସାର ପାଇଁ ଗାଁ ପରିବେଶ ନଷ୍ଟ ହୋଇଗଲାଣି। ଯୁବପିଢ଼ି ନିଶା ପଥର ଯାତ୍ରୀ ହୋଇଥିବାରୁ ସର୍ବଦା ବିଶୃଙ୍ଖଳା ଦେଖାଦେଉଛି। ଏଥିଯୋଗୁ ଆସାମାଜିକ କାର୍ଯ୍ୟକଳାପ ବଢ଼ୁଛି। ପ୍ରଶାସନ ତୁରନ୍ତ ପଦକ୍ଷେପ ନେଉ।
-ଦୁଃଖବନ୍ଧୁ ପ୍ରଧାନ, ବୁଦ୍ଧିଜୀବୀ, ଖମାର
ରୋକିବା ଦିଗରେ ଦୃଷ୍ଟି ଦିଆଯିବ
ଚୋରା ମଦ ସହ ଅନ୍ୟ ନିଶା ସାମଗ୍ରୀ କାରବାର ରୋକିବା ଦିଗରେ ଦୃଷ୍ଟି ଦିଆଯିବ। ଗ୍ରାମାଞ୍ଚଳକୁ କିପରି ନିଶାଠାରୁ ଦୂରେଇ ରଖିହେବ ସେ ନେଇ ଅବକାରୀ ବିଭାଗ ସହ ମିଶି ଘନ ଘନ ଚଢ଼ାଉ ପାଇଁ ଚେଷ୍ଟା କରାଯିବ।
-ଜ୍ଞାନରଞ୍ଜନ ସାମଲ, ଥାନା ଅଧିକାରୀ, ଖମାର