ଭୁବନେଶ୍ୱର, ୪।୧୦ (ବ୍ୟୁରୋ)/ ବାଲିଅନ୍ତା (ଡି.ଏନ୍.ଏ.): ଓଡ଼ିଶା ଏବେ ଡ୍ରଗ୍ସ କାରବାରର ହବ୍ ପାଲଟିଛି। କେତେବେଳେ ରାଜ୍ୟରୁ ବାହାରକୁ ଗଞ୍ଜେଇ ଚୋରା ଚାଲାଣ ହେଉଛି ତ ପୁଣି ଆଉ କେତେବେଳେ ବାହାର ଦେଶରୁ ବ୍ରାଉନସୁଗାର ଓ ଅନ୍ୟ ନିଶାଦ୍ରବ୍ୟ ରାଜ୍ୟକୁ ଆସୁଛି। ବିଶେଷକରି ରାଜଧାନୀ ଭୁବନେଶ୍ୱର ଦେଇ ଚୋରାଚାଲାଣ ହେଉଛି। ଶୁକ୍ରବାର ଓ ଶନିବାର ଦୁଇଦିନରେ କୋଟିଏ ଟଙ୍କାର ଡ୍ରଗ୍ସ ଜବତ ହୋଇଛି। ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ(ଏନ୍ସିବି) ୭୦ ଲକ୍ଷ ଟଙ୍କାର ଗଞ୍ଜେଇ ଜବତ କରିଥିବାବେଳେ କମିଶନରେଟ ପୋଲିସର କୁଇକ୍ ଆକ୍ସନ ଟିମ୍ (କ୍ୟୁଏଟି) ୩୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ବ୍ରାଉନସୁଗାର ଜବତ କରିଛି।
ଆନ୍ଧ୍ରପ୍ରଦେଶରୁ ବିପୁଳ ପରିମାଣର ଗଞ୍ଜେଇ ଭୁବନେଶ୍ୱର ଦେଇ ବିହାର ଚାଲାଣ ହେଉଥିବାନେଇ ଏନ୍ସିବି ନିକଟରେ ଖବର ପହଞ୍ଚତ୍ଥିଲା। ଏହି ଚୋରା ଚାଲାଣକୁ ଧରିବା ପାଇଁ ଏନ୍ସିବି ଟିମ୍ ଶନିବାର ଖୋର୍ଦ୍ଧା ଗୋଡ଼ିପଡ଼ା ଟୋଲ୍ଗେଟ୍ରେ ଜଗି ରହି ଯାଞ୍ଚ କରିଥିଲେ। ଏପି୦୫୧୫୬୬ ନମ୍ବର ବିଶିଷ୍ଟ ଟ୍ରକ୍ଟି ପହଞ୍ଚତ୍ବାକ୍ଷଣି ଏନ୍ସିବି ଅଧିକାରୀମାନେ ଡ୍ରାଇଭରକୁ କାବୁ କରି ନେଇଥିଲେ। ପରେ ଟ୍ରକ୍କୁ ଯାଞ୍ଚ କରିବା ପରେ କତା ବୋଝେଇ ବସ୍ତା ଭିତରୁ ୭୦୦ କେଜିର ଗଞ୍ଜେଇ ମିଳିଥିଲା। ଏହାପରେ ଟ୍ରକ୍ ସହ ଉକ୍ତ ଗଞ୍ଜେଇକୁ ଜବତ କରାଯିବା ସହ ଡ୍ରାଇଭରଙ୍କୁ ଗିରଫ କରିଥିଲା ଏନ୍ସିବି।
ଅନ୍ୟପକ୍ଷରେ ବାଲେଶ୍ୱରରୁ ଭୁବନେଶ୍ୱର ଲମ୍ବିଥିବା ବ୍ରାଉନସୁଗାର ର଼୍ୟାକେଟକୁ ଧରିବା ପାଇଁ କମିଶନରେଟ ପୋଲିସର କୁଇକ୍ ଆକ୍ସନ ଟିମ୍ ସ୍ବତନ୍ତ୍ର ଅପରେଶନ ଚଳାଇଛି। ଏହି ଅଭିଯାନରେ ବାଲେଶ୍ୱର ଜିଲା ଜଳେଶ୍ୱର ଅଞ୍ଚଳର ଭେଲୋର ଛକ ଜାତୀୟ ରାଜପଥରୁ ଶୁକ୍ରବାର ୨୦୦ ଗ୍ରାମ୍ର ବ୍ରାଉନସୁଗାର ଜବତ କରିଥିବାବେଳେ ସମ୍ପୃକ୍ତ ୨ଜଣଙ୍କୁ ଧରିଥିଲା। ପଚରାଉଚରା ପରେ ସେମାନେ ଭୁବନେଶ୍ୱରକୁ ବ୍ରାଉନସୁଗାର ନେଉଥିବା ଜଣାଇଥିଲେ। ଏହାପରେ ଯୋଜନା ମୁତାବକ ଶନିବାର ଭୁବନେଶ୍ୱର ଉପକଣ୍ଠ ବାଲିଅନ୍ତା ଥାନା ଅନ୍ତର୍ଗତ ଜାତୀୟ ରାଜପଥର ବାଲିଅନ୍ତା ଛକରୁ ଜଣଙ୍କୁ ଧରିବା ସହ ତାଙ୍କଠାରୁ ୧୨୦ ଗ୍ରାମର ବ୍ରାଉନସୁଗାର ଜବତ କରିଛି। ଦୁଇ ସ୍ଥାନରୁ ଜବତ ବ୍ରାଉନସୁଗାର ମୂଲ୍ୟ ୩୦ଲକ୍ଷରୁ ଊର୍ଦ୍ଧ୍ୱ ହେବ। ଏହାପରେ ସମସ୍ତ ୩ ଅଭିଯୁକ୍ତଙ୍କୁ ଗିରଫ କରାଯାଇଛି। ସେମାନେ ହେଲେ ବାଲେଶ୍ୱର ଜିଲା ରାଜପୁର ଅଞ୍ଚଳର ଜଳେଶ୍ୱର ଥାନା ରାଜପୁର ଗ୍ରାମର ସେକ୍ ସଫିରୁଦ୍ଦିନ, ସେକ୍ ରାଜା ଓ ବାଲିଅନ୍ତା ଥାନା ଜଗନ୍ନାଥପୁର ଗ୍ରାମର ବାପି ନାୟକ। ସଫିରୁଦ୍ଦିନ ଓ ରାଜାଙ୍କଠାରୁ ବ୍ରାଉନସୁଗାର ସହ ବାଇକ୍ ଓ ୨ଟି ମୋବାଇଲ୍ ଫୋନ୍ ଜବତ ହୋଇଥିବାବେଳେ ବାପିଙ୍କଠାରୁ ବ୍ରାଉନସୁଗାର ସହ ୫୫ ହଜାର ଟଙ୍କା, ଗୋଟିଏ ବାଇକ ଓ ଗୋଟିଏ ମୋବାଇଲ ଫୋନ ଜବତ କରିଛି କ୍ୟୁଏଟି। ଏ ନେଇ ବାଲିଅନ୍ତା ଥାନାରେ ୨୨୮/୨୦ରେ ମାମଲା ରୁଜୁ କରାଯାଇଛି। ସମ୍ପୃକ୍ତ ଅନ୍ୟମାନଙ୍କୁ ଧରିବାକୁ ତଦନ୍ତ ଜାରି ରହିଛି। ଏହି ଚଢ଼ାଉରେ ବାଲିଅନ୍ତା ପୋଲିସ ସହଯୋଗ କରିଥିଲା।