ଡିଏସ କୁଟ୍ଟେଙ୍କ ସର୍ଭେ ନବୀନଙ୍କୁ ଅସୁବିଧାରେ ପକାଇଲା, ସାମ୍ନାକୁ ଆସିଲା ଏହି ସତ୍ୟ

ଭୁବନେଶ୍ୱର, ୪।୬: ବିଧାନସଭା ନିର୍ବାଚନର ଫଳାଫଳର ପ୍ରାରମ୍ଭିକ ଟ୍ରେଣ୍ଡ ରାଜ୍ୟରେ କ୍ଷମତାସୀନ ବିଜେଡିକୁ ଶକ୍ତ ଧକ୍କା ଲାଗିଛି। କଣ୍ଟାବାଞ୍ଜି ବିଧାନସଭା ଆସନରେ ନବୀନଙ୍କୁ ଭାଜପା ପ୍ରାର୍ଥୀ ଲକ୍ଷ୍ମଣ ବାଗ ପଛରେ ପକାଇ ଦେଇଛନ୍ତି। ସୂଚନା ଅନୁସାରେ, କଣ୍ଟାବାଞ୍ଜି ବିଧାନସଭା ଆସନରେ ୩ ରାଉଣ୍ଡ ଗଣତି ପରେ ବିଜେଡି ସୁପ୍ରିମୋ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭାଜପା ପ୍ରାର୍ଥୀ ଲକ୍ଷ୍ମଣ ବାଗଙ୍କଠୁ ପଛରେ ରହିଛନ୍ତି। ପ୍ରଥମଥର ପାଇଁ ନବୀନଙ୍କୁ ଏଭଳି ସ୍ଥିତିର ସମ୍ମୁଖୀନ ହେବାକୁ ପଡିଛି। ତେବେ ମୁଖ୍ୟମନ୍ତ୍ରୀ କାର୍ଯ୍ୟାଳୟର ବରିଷ୍ଠ ଅଫିସର ଡିଏସ କୁଟ୍ଟେଙ୍କ ଆଭ୍ୟନ୍ତରୀଣ ସର୍ଭେ ରିପୋର୍ଟକୁ ଆଧାର କରି ନବୀନଙ୍କୁ କଣ୍ଟାବାଞ୍ଜି ବିଧାନସଭା ଆସନରେ ଛିଡା ହେବାକୁ ତାଙ୍କର ମୁଖ୍ୟ ପରାମର୍ଶଦାତା କାର୍ତ୍ତିକ ପାଣ୍ଡିଆନ ପ୍ରବର୍ତ୍ତାଇଥିଲେ ବୋଲି ଜଣାପଡିଛି। ଯେଉଁଥିପାଇଁ ନବୀନଙ୍କୁ ଏଭଳି ଅପ୍ରୀତିକର ପରିସ୍ଥିତିର ସମ୍ମୁଖୀନ ହେବାକୁ ପଡିଥିବା କୁହାଯାଉଛି। ବିଜେଡି କେଉଁ ସିଟରେ କାହାକୁ ପ୍ରାର୍ଥୀ କରିବ ତାହା କୁଟ୍ଟେଙ୍କ ଦ୍ୱାରା ପ୍ରସ୍ତୁତ ସର୍ଭେ ରିପୋର୍ଟ ଚୂଡାନ୍ତ କରେ।