ଦୁବାଇ,୧୩।୪: ମୁସଲିମ୍ ସମ୍ପ୍ରଦାୟର ବଡ଼ ପର୍ବ ରମଜାନ ଏପ୍ରିଲ ୧୪ରୁ ଆରମ୍ଭ ହେବାକୁ ଯାଉଛି। ରମଜାନର ପବିତ୍ର ମାସରେ ଲୋକମାନେ ପରସ୍ପରଙ୍କୁ ଆଲିଙ୍ଗନ କରି ଅଭିବାଦନ ସହ ଶୁଭେଚ୍ଛା ଜଣାଇଥାନ୍ତି। ଏହି ପରିପ୍ରେକ୍ଷୀରେ ଏମିତି କେତେକ ଦେଶ ଅଛି ଯେଉଁଠାରେ ରମଜାନ ସମୟରେ ସମସ୍ତ ରେଷ୍ଟୁରାଣ୍ଟକୁ ବନ୍ଦ କରାଯାଇଥାଏ। ଏଥିରେ ଦୁବାଇ ମଧ୍ୟ ସାମିଲ ରହିଛି। ଯେଉଁଠାରେ ରମଜାନ ସମୟରେ ସମସ୍ତ ରେଷ୍ଟୁରାଣ୍ଟଗୁଡ଼ିକରେ ପରଦା ଲଗାଯାଇଥାଏ। ଉପବାସ ରଖୁଥିବା ଲୋକଙ୍କ ଆଖିରୁ ଖାଦ୍ୟ ସାମଗ୍ରୀକୁ ଦୂରେଇ ରଖିବା ପାଇଁ ଏଭଳି କରାଯାଇଥାଏ। କିନ୍ତୁ ଏବେ ଦୁବାଇର ଏହି ନିୟମରେ ପରିବର୍ତ୍ତନ ଆଣାଯାଇଛି। ବାହାରେ ଖାଦ୍ୟ ଖାଇବାକୁ ରୁଚି ରଖୁଥିବା ଲୋକମାନେ ଏବେ ରମଜାନ ସମୟରେ ରେଷ୍ଟୁରାଣ୍ଟରେ ଭୋଜନ କରିପାରିବେ। ଏଣିକି ରୋଜା ସମୟରେ ଦୁବାଇର ପର୍ଯ୍ୟଟକ ଓ ରୋଜା ରଖୁ ନ ଥିବା ଲୋକମାନଙ୍କ ପାଇଁ ଏହା ଏବେ ବନ୍ଦ ହେବ ନାହିଁ। ସୂଚନା ମୁତାବକ ଦୁବାଇରେ ଦୀର୍ଘ ଦିନରୁ ରମଜାନ ସମୟରେ ରେଷ୍ଟୁରାଣ୍ଟରେ ପରଦା ପକାଇବାର ଏକ ପ୍ରଥା ଚାଲିଆସିଥିଲା। ତେବେ ଏହି ପରମ୍ପରାକୁ ଏବେ ଭଙ୍ଗ କରାଯାଇଛି। ଏଥିସହ ପର୍ଯ୍ୟଟନ କ୍ଷେତ୍ରକୁ ପ୍ରୋତ୍ସାହିତ କରିବା ଲାଗି ଏପ୍ରିଲ ୧୧ରେ ଅର୍ଥନୈତିକ ବିକାଶ ବିଭାଗ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି।
