ଦୁବାଇ,୪।୪(ପି.ଟି.): ଦୁବାଇରେ ଚାଲିଥିବା ତୃତୀୟ ପାରା ବ୍ୟାଡ୍ମିଣ୍ଟନ ଟୁର୍ନାମେଣ୍ଟରେ ଓଡ଼ିଆ ତାରକା ପ୍ରମୋଦ ଭଗତ ଉଭୟ ପୁରୁଷ ସିଙ୍ଗଲ୍ସ ଓ ଡବଲ୍ସ ଫାଇନାଲରେ ପ୍ରବେଶ କରିଛନ୍ତି। ଦୁଇ ଭାରତୀୟ ତାରକା ପ୍ରମୋଦ ଓ ସୁକାନ୍ତ କଦମ ନିଜ ନିଜ ବର୍ଗର ଫାଇନାଲରେ ପ୍ରବେଶ କରିଛନ୍ତି।
ଏସ୍ଏଲ୍ ୩ ବର୍ଗରେ ବିଶ୍ୱର ଏକ ନମ୍ବର ଖେଳାଳି ଓଡ଼ିଶାର ପ୍ରମୋଦ ଭଗତ ମାଲେସିଆର ମହମ୍ମଦ ହୁଜାଇରି ଅବଦୁଲ ମାଲେକଙ୍କୁ ପରାସ୍ତ କରି ପୁରୁଷ ସିଙ୍ଗଲ୍ସ ଫାଇନାଲରେ ପ୍ରବେଶ କରିଛନ୍ତି। ସେମିଫାଇନାଲରେ ସେ ମାଲେକଙ୍କୁ ୨୧-୭, ୨୧-୧୭ରେ ପରାସ୍ତ କରି ଫାଇନାଲ ଟିକେଟ ହାସଲ କରିଛନ୍ତି। ଏବେ ପ୍ରମୋଦ ଟାଇଟଲ ପାଇଁ ଫାଇନାଲରେ ନିଜ ଦେଶର କୁମାର ନୀତେଶଙ୍କୁ ରବିବାର ଭେଟିବେ। ସେମିରେ ପ୍ରମୋଦ ପ୍ରଭାବ ବିସ୍ତାର କରି ଖେଳିଥିଲେ ଓ ଟାଇଟଲ ପାଇଁ ଫେଭରାଇଟ୍ ବିବେଚିତ ହେଉଛନ୍ତି।
ସେହିପରି ପୁରୁଷ ଡବଲ୍ସ ଇଭେଣ୍ଟରେ ପ୍ରମୋଦ ଓ ମନୋଜ ସରକାର ସେମିଫାଇନାଲରେ ନିଜ ଦେଶର ଅନ୍ୟତମ ଯୋଡି ମହମ୍ମଦ ଅରଓ୍ବାଜ ଅନସାରି ଓ ଦୀପ୍ ରଞ୍ଜନ ବିଶୋୟୀଙ୍କୁ ୨୧-୧୯, ୨୩-୨୧ରେ ପରାସ୍ତ କରି ଫାଇନାଲରେ ପ୍ରବେଶ କରିଛନ୍ତି। ରବିବାର ଫାଇନାଲରେ ପ୍ରମୋଦ ଓ ମନୋଜ ପ୍ରତିପକ୍ଷ ସୁକାନ୍ତ କଦମ ଓ କୁମାର ନୀତେଶଙ୍କୁ ଭେଟିବେ।
ତେବେ ମିକ୍ସଡ ଡବଲ୍ସ ସେମିଫାଇନାଲରେ ପ୍ରମୋଦ ଓ ତାଙ୍କ ପାର୍ଟନର ପାଲା କୋହଲି ପରାସ୍ତ ହୋଇ ବିଦାୟ ନେଇଛନ୍ତି। ଏହି ଯୋଡିରେ ୧୭- ୨୧, ୫-୨୧ରେ ଫ୍ରାନ୍ସର ଲୁକାସ ମାଜୁର ଓ ଫଷ୍ଟିନ ନୋଏଲଙ୍କଠାରୁ ପରାସ୍ତ ହୋଇଛନ୍ତି। ଉଲ୍ଲେଖଥାଉ କି, ଏସ୍ଏଲ୍ ୩ ବର୍ଗର ଖେଳାଳିମାନେ ଦୁଇ କିମ୍ବା ଗୋଟିଏ ଗୋଡରେ ଅକ୍ଷମଥାନ୍ତି। ଚାଲିବା କିମ୍ବା ଦୌଡିବାରେ ଏହି ଖେଳାଳିମାନେ ସନ୍ତୁଳନ ରକ୍ଷା କରିବା ପାଇଁ ସଂଘର୍ଷ କରିଥାନ୍ତି। ଏସ୍ଏଲ୍ ୪ ବର୍ଗରେ କଦମ ଫାଇନାଲରେ ପ୍ରବେଶ କରିଛନ୍ତି। ସେ ଜର୍ମାନୀର ମାର୍ସେଲ ଆଡମଙ୍କୁ ହରାଇ ଫାଇନାଲକୁ ଉଠିଛନ୍ତି। ତେବେ ସୁକାନ୍ତ ୨୧-୧୧, ୨୧-୧୧ ସିଧାସଳଖ ସେଟ୍ରେ ବିଜୟୀ ହୋଇ ଅଗ୍ରଗତି କରିଛନ୍ତି।