ବାଲେଶ୍ୱର ଅଫିସ, ୧୩।୪: ବାଲେଶ୍ୱର ଜିଲା ଶିକ୍ଷା ବିଭାଗ ପକ୍ଷରୁ ଶିକ୍ଷା ଅଧିକାର ଆଇନ୍ ୧୨-(୧-(ସି) ୨୦୦୯ ଆଇନ ଅନୁଯାୟୀ ପ୍ରଥମ ପର୍ଯ୍ୟାୟରେ ଜିଲାରୁ ୧୬୧ ଜଣ ଛାତ୍ରୀଛାତ୍ର ବିଭିନ୍ନ ଘରୋଇ ସ୍କୁଲରେ ସାମିଲ ହୋଇଥିବା ବେଳେ ଦ୍ୱିତୀୟ ପର୍ଯ୍ୟାୟରେ ଗତ ୧୦ ତାରିଖରୁ ଆସନ୍ତା ୨୪ ତାରିଖ ପର୍ଯ୍ୟନ୍ତ ନାମଲେଖା ଜାରି ରହିଛି। ଶିକ୍ଷା ଅଧିକାର ଆଇନ୍ ଅନୁସାରେ ଘରୋଇ ସ୍କୁଲରେ ୨୫ ପ୍ରତିଶତ ସିଟ୍ରେ ଆର୍ଥତ୍କ ଅନଗ୍ରସର ଓ ଦୁର୍ବଳ ଶ୍ରେଣୀର ପିଲାଙ୍କ ନାମଲେଖା ଆରମ୍ଭ ହୋଇଛି। ଚଳିତ ଶିକ୍ଷାବର୍ଷର ପ୍ରଥମ ପର୍ଯ୍ୟାୟରେ ୧୬୧ଜଣ ଛାତ୍ରୀଛାତ୍ରଙ୍କୁ ଚୟନ କରାଯାଇଛି। ଯାହା ପୂର୍ବବର୍ଷ ତୁଳନାରେ ନୈରାଶଜନକ। ଅଧିକ ପ୍ରଚାର, ପ୍ରସାର ଏବଂ ସଚେତନତା ଅଭାବରୁ ଏହି ସେବାରୁ ଗରିବ ଛାତ୍ରୀଛାତ୍ରମାନେ ବଞ୍ଚତ୍ତ ହେଉଛନ୍ତି।
ଗତବର୍ଷ ଦୁଇଟି ପର୍ଯ୍ୟାୟରେ ମୋଟ୍ ୬୬୦ ଛାତ୍ରୀଛାତ୍ର ନାମ ଲେଖାଇ ରାଜ୍ୟରେ ବାଲେଶ୍ୱର ଜିଲା ଦ୍ୱିତୀୟ ସ୍ଥାନ ଅଧିକାର କରିଥିଲା। ଜିଲାର ୩୩୯ ଘରୋଇ ସ୍କୁଲରେ ବାହାନଗା ବ୍ଲକରୁ ୬୦ ଜଣ ଛାତ୍ରୀଛାତ୍ର ନାମ ଲେଖାଇଥିବା ବେଳେ ବାଲେଶ୍ୱର ପୌରାଞ୍ଚଳରେ ୪୬, ବାଲିଆପାଳରେ ୨୭, ବସ୍ତାରେ ୧୬, ଭୋଗରାଇରେ ୧୧, ଜଳେଶ୍ୱରରେ ୬୯, ଜଳେଶ୍ୱର ଏନ୍ଏସିରେ ୬, ଖଇରାରେ ୯୭, ନୀଳଗିରିରେ ୨୭, ନୀଳଗିରି ଏନ୍ଏସିରେ ୬, ଔପଦାରେ ୪୮, ରେମୁଣାରେ ୭୪, ସଦରରେ ୫୪, ସିମୁଳିଆରେ ୪୮, ସୋରରେ ୪୮ ଓ ସୋର ଏନ୍ଏସିରେ ୨୩ ଛାତ୍ରୀଛାତ୍ର ନାମ ଲେଖାଇଥିଲେ। ହେଲେ ଚଳିତ ବର୍ଷ ପ୍ରଥମ ପର୍ଯ୍ୟାୟରେ ଛାତ୍ରୀଛାତ୍ରଙ୍କ ସଂଖ୍ୟା କମ୍ ରହିଥିବାରୁ ଟାର୍ଗେଟ୍ ପୂରଣ କରିବାକୁ ନେଇ ବିଭାଗ ଚିନ୍ତାରେ ପଡ଼ିଛି। ନିୟମ ଅନୁସାରେ, ଅଭିଭାବକଙ୍କର ବାର୍ଷିକ ୧ଲକ୍ଷ ୮୦ହଜାର ଟଙ୍କା ଭିତରେ ଆୟ ଥିଲେ ସେମାନଙ୍କ ପିଲା ଏହି ଯୋଜନାରେ ସାମିଲ ହୋଇପାରିବେ। ନାମଲେଖା ସମ୍ପୂର୍ଣ୍ଣ ନିଃଶୁଳ୍କ ହୋଇଥିବା ବେଳେ ସ୍କୁଲଗୁଡ଼ିକ କୌଣସି ଅର୍ଥ ଅଭିଭାବକମାନଙ୍କଠାରୁ ନେଇପାରିବେ ନାହିଁ। ଯଦି କୌଣସି ସ୍କୁଲ ନିୟମ ବିରୋଧୀ କାର୍ଯ୍ୟ କରନ୍ତି ତେବେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସ୍ପଷ୍ଟ କରାଯାଇଛି। ଏମିତିକି ଏନ୍ଓସି ରଦ୍ଦ କରାଯିବାର ନିୟମ ରହିଛି। ତେବେ ପୂର୍ବବର୍ଷ ତୁଳନାରେ ଚଳିତବର୍ଷ ବହୁତ କମ୍ ପିଲା ପ୍ରଥମ ପର୍ଯ୍ୟାୟରେ ନାମ ଲେଖାଇଛନ୍ତି। ଏନେଇ ବିଭାଗ ପକ୍ଷରୁ ବ୍ଲକ ଶିକ୍ଷା ଅଧିକାରୀଙ୍କୁ ତତ୍ପରତା ଦେଖାଇବାକୁ କୁହାଯାଇଛି। ଅନ୍ୟପକ୍ଷରେ ଶିକ୍ଷା ଅଧିକାର ଆଇନ ରାଜ୍ୟରେ ୨୦୧୦ ମସିହାରୁ ଲାଗୁ ହୋଇଥିବା ବେଳେ ସଚେତନତା ଓ ସରକାରଙ୍କ ତାଗିଦା ଅଭାବରୁ ଏହି ନିୟମ ଜିଲାରେ ଫେଲ୍ ମାରିଥିଲା। ୨୦୨୧-୨୨ ଶିକ୍ଷାବର୍ଷରେ ରାଜ୍ୟ ସରକାର ଯଦିଓ ତତ୍ପରତା ଦେଖାଇଲେ ସେତେଟା ସଫଳ ହୋଇପାରି ନ ଥିଲେ। ୨୦୨୨-୨୩ ବର୍ଷ ଠାରୁ ନିୟମକୁ ସମ୍ପୂର୍ଣ୍ଣ କଡ଼ାକଡ଼ି କରାଯାଇଛି। ଯାହାକୁ ପ୍ରାୟ ସବୁ ସ୍କୁଲ ଅନୁପାଳନ କରୁଥିବା ଜଣାଯାଇଛି।