ପାରଳାଖେମୁଣ୍ଡି,୨୫ା୮(ଗିରିଧାରୀ ପରିଛା): ଗଜପତି ଜିଲା ପାରଳାଖେମୁଣ୍ଡି ଓ ପାରଳା ଖାସ୍ପା ଅଞ୍ଚଳର ଚାଷୀ ଏବେ ଚିନ୍ତାରେ। ବର୍ଷା ଅଭାବ ଯୋଗୁଁ ଜମି ଫାଟି ଆଁ କରିବା ସହ ଧାନ ଗଛ ସବୁ ନଷ୍ଟ ହେବାକୁ ଲାଗିଲାଣି। ଜିଲାରେ ଅଗଷ୍ଟ ମାସରେ ୫୭ ପ୍ରତିଶତ କମ ବୃଷ୍ଟିପାତ ହୋଇଥିବା ବେଳେ ଉକ୍ତ ଅଞ୍ଚଳର ଚାଷୀ ଏବେ ନିକଟରେ ଥିବା ଖିଙ୍ଗା ଗଡ଼ା ଉପରେ ନିର୍ଭର କରି ବସିଛନ୍ତି। ଚାଷ ଓ ଚାଷୀଙ୍କର ସୁବିଧା ପାଇଁ ସରକାର ଖୀଙ୍ଗା ଗଡାରେ ଏକ କ୍ଷୁଦ୍ର ଜଳ ପ୍ରକଳ୍ପ ନିର୍ମାଣ କରିଥିଲେ। କିନ୍ତୁ ଉପଯୁକ୍ତ ସ୍ଥାନରେ ପ୍ରକଳ୍ପଟି ତିଆରି ହୋଇନଥିବାରୁ ସରକାରଙ୍କ ଟଙ୍କା ପାଣିରେ ପଡିଥିବା ବେଳେ ପାଣି ନ ପାଇ ଚାଷୀ କୂଳ ଏବେ ଚିନ୍ତାରେ। ଉକ୍ତ ଅଞ୍ଚଳରେ ଚାଷୀ ଧାନ ଚାଷ ଉପରେ ନିର୍ଭର କରିଥାନ୍ତି। ଚଳିତ ବର୍ଷ କେତେକ ଚାଷୀ ବ୍ୟାଙ୍କରୁ ଋଣ କରିଥିବା ବେଳେ ଅନ୍ୟ କିଛି ଚାଷୀ ଧାର କରଜ କରି ଚାଷ କରିଥିଲେ । ଅଭାବୀ ବର୍ଷା ଯୋଗୁଁ ଏବେ ମୁଣ୍ଡରେ ହାତ ଦେଇ ବସିବା ସହ ଋଣ କିପରି ଶୁଝିବେ ସେ ନେଇ ଚିନ୍ତାରେ ପଡ଼ିଛନ୍ତି। ଅନ୍ୟପକ୍ଷରେ କ୍ଷୁଦ୍ର ଜଳ ସେଚନ ବିଭାଗର ମନମୁଖୀ କାର୍ଯ୍ୟ ଯୋଗୁଁ ଏଭଳି ସ୍ଥିତି ଉପୁଜିଥିବା ଚାଷୀମାନେ ଅଭିଯୋଗ କରିଛନ୍ତି। ତେଣୁ ସମସ୍ୟାର ସମାଧାନ କରିବା ପାଇଁ ଚାଷୀମାନେ ଦାବି କରିଛନ୍ତି। ଯଦି ଶୀଘ୍ର ପାଣି ସମସ୍ୟା ସମାଧାନ କରାନଯାଏ ତେବେ ଚାଷୀକୁଳ ଆନ୍ଦୋଳନ କରିବେ ବୋଲି ଚାଷୀ ରଶ୍ମି ରଞ୍ଜନ ସାହୁ, ପ୍ରଭାତ ପାତ୍ର, ମୁନା ପରିଛା ପ୍ରମୁଖ ଚେତାବନୀ ଦେଇଛନ୍ତି।