ମନମୁଣ୍ଡା,୨୮।୯ (ଡି.ଏନ.ଏ.) ରୋଗୀକୁ ଆଣିବାକୁ ଯାଇଥିବା ଏକ ଆମ୍ବୁଲାନ୍ସ ରାସ୍ତା ଦୁରାବସ୍ଥା ଯୋଗୁ ବାଟରେ ଫସିଗଲା ା ଫଳରେ ରୋଗୀକୁ ସମ୍ପର୍କୀୟମାନେ ଖଟିଆରେ ବୋହି ଆମ୍ବୁଲାନ୍ସ ପର୍ଯ୍ୟନ୍ତ ଆଣିବାକୁ ପଡିଲା । ଏପରି ଘଟଣା ଦେଖିତ୍ବାକୁ ମିଳିଛି ବୌଦ୍ଧ ଜିଲା ମନମୁଣ୍ଡା ଥାନା ବିଲାସପୁର ପଞ୍ଚାୟତ ଟିଲାଟିଙ୍ଗା ଗ୍ରାମରେ। ରବିବାର ସକାଳେ ଉକ୍ତ ଗ୍ରାମର ଦଳିତ ସାହିର ଜଣେ ବ୍ୟକ୍ତି କୌଣସି ରୋଗରେ ଗୁରୁତର ହୋଇ ପଡିବାରୁ ୧୦୮ ଆମ୍ବୁଲାନ୍ସ ତାଙ୍କୁ ଆଣିବାକୁ ଯାଇଥିଲା । ବିଲାସପୁର ପଟରୁ ରାସ୍ତା ଖରାପ ଥିବାରୁ ଏନଏଚ- ୫୭ ଦେଇ ମସିଣାପଡା, ଜାମପାଲି ଗ୍ରାମ ଦେଇ ଆମ୍ବୁଲାନ୍ସ ସେଠାକୁ ଯାଇଥିଲା । ଟିଲାଟିଙ୍ଗା ପହଞ୍ଚତ୍ବାକୁ ପ୍ରାୟ ୧କି.ମି. ବାଟ ଥିବା ବେଳେ ରାସ୍ତାରେ ହଠାତ୍ ଆମ୍ବୁଲାନ୍ସଟି ଦବି ଯାଇ ଫସି ଯାଇଥିଲା । ଗ୍ରାମବାସୀ ୧ ଘଣ୍ଟା ଧରି ଠେଲାଠେଲି କରି ଆମ୍ବୁଲାନ୍ସକୁ ବାହାର କରିଥିଲେ । ଆଗକୁ ଗଲେ ପୁନର୍ବାର ଫସିବାର ଆଶଙ୍କା କରି ଗ୍ରାମବାସୀ ଓ ସମ୍ପର୍କୀୟ ରୋଗୀକୁ ଖଟିଆରେ ବୋହି ଆମ୍ବୁଲାନ୍ସ ନିକଟକୁ ଆଣିଥିଲେ। ଉକ୍ତ ରାସ୍ତାର ଶୋଚନୀୟ ଅବସ୍ଥା ନେଇ ଅଞ୍ଚଳବାସୀ ବହୁବାର ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ହେଁ କୌଣସି ପ୍ରତିକାର କରାଯାଉ ନ ଥିବାରୁ ଅସନ୍ତୋଷ ବଢିବାରେ ଲାଗିଛି ା