ନିଶ୍ଚିନ୍ତକୋଇଲି, ୧୩ା୧୦(ସ୍ବ.ପ୍ର): ଦୁଇ ବର୍ଷରୁ ଊର୍ଦ୍ଧ୍ୱ କରୋନା ମହାମାରୀ ସମଗ୍ର ବିଶ୍ୱକୁ ଆତଙ୍କିତ କରି ରଖିଥିବା ବେଳେ ଗତ ୯ରୁ୧୦ ମାସ ହେବ ଏହାର ପ୍ରକୋପ ହ୍ରାସ ପାଇଛି। ସ୍ବାଭାବିକ ହୋଇଛି ଜୀବନ ଯାତ୍ରା। କିନ୍ତୁ କୋଟିଏରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ନିର୍ମିତ କୋଭିଡ ହସ୍ପିଟାଲ କାର୍ଯ୍ୟକ୍ଷମ ନ ହେବାରୁ ସରକାରୀ ଅର୍ଥ ପାଣିରେ ପଡ଼ିବା ସଦୃଶ ହୋଇଛି। ଏପରି ଏକ ନଜିର ରହିଛି କଟକ ଜିଲା ନିଶ୍ଚିନ୍ତକୋଇଲି ବ୍ଲକ କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ପରିସରରେ। ୧୦ ମାସ ତଳେ ଲୋକାର୍ପିତ ହୋଇଥିବା କୋଭିଡ ହସ୍ପିଟାଲ କାର୍ଯ୍ୟକ୍ଷମ ନ ହୋଇ ପଡିରହିଛି। ଏହି ହସ୍ପିଟାଲକୁ ସାଧାରଣ ହସ୍ପିଟାଲ ତଥା ଟ୍ରମା କେୟାର ସେଣ୍ଟର ଭାବେ କାର୍ଯ୍ୟକ୍ଷମ କରିବାକୁ ଦାବି ହୋଇଛି।
ସୂଚନା ଅନୁଯାୟୀ, କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ପରିସରରେ ୧୦୦ ଶଯ୍ୟା ବିଶିଷ୍ଟ ଅତ୍ୟାଧୁନିକ କୋଭିଡ ହସ୍ପିଟାଲ ଜାନୁୟାରୀ ୭ରେ ମାହାଙ୍ଗା ବିଧାୟକ ପ୍ରତାପ ଜେନା ଏବଂ କଟକ ଜିଲାପାଳ ଭବାନି ଶଙ୍କର ଚଇନି ଲୋକାର୍ପଣ କରିଥିଲେ। ଆମେରିକାନ ଇଣ୍ଡିଆନ ଫାଉଣ୍ଡେଶନ ଓ ଓଡ଼ିଶା ସରକାରଙ୍କ ମିଳିତ ସହଯୋଗରେ ଏହି ପୋର୍ଟେବୁଲ ହସ୍ପିଟାଲ ପାଇଁ ୧ କୋଟି ୨୩ ଲକ୍ଷ ଟଙ୍କା ବ୍ୟୟ ବରାଦ କରାଯାଇଥିଲା। ବ୍ଲକ ପକ୍ଷରୁ ହସ୍ପିଟାଲ ଚତୁଃପାର୍ଶ୍ୱ ତଥା ଭିତ୍ତିଭୂମିର ବିକାଶ ପାଇଁ ୬୦ ଲକ୍ଷ ଟଙ୍କା ବିନିଯୋଗ ହୋଇଥିବା ଏକ ନିର୍ଭର ଯୋଗ୍ୟ ସୂତ୍ରରୁ ସୂଚନା ମିଳିଛି। ତେବେ ବାକିଆ ଟଙ୍କା ଅଦ୍ୟାବଧି ବିନିଯୋଗ ହୋଇନାହିଁ କିମ୍ବା ଏହି ହସ୍ପିଟାଲ କାର୍ଯ୍ୟକ୍ଷମ ହୋଇପାରୁନାହିଁ। ଯଦି ଭିତ୍ତିଭୂମି ସମ୍ପୂର୍ଣ୍ଣ ବିକଶିତ ହୋଇ ନ ଥିଲା, ତେବେ କାହିଁକି ଏହାକୁ ଲୋକାର୍ପଣ କରାଯାଇଥିଲା ବୋଲି ପ୍ରଶ୍ନ ଉଠିଛି। ଉକ୍ତ ହସ୍ପିଟାଲରେ ୮ ଆଇସିୟୁ ବେଡ, ୨୬ ଅକ୍ସିଜେନ ବେଡ, ୬୬ ସାଧାରଣ ବେଡ ଓ ୨ ଡାକ୍ତର ଚାମ୍ବର ରହିଛି। ହସ୍ପିଟାଲଟି ବିଦ୍ୟୁତକରଣ ହୋଇଥିବା ବେଳେ ପାନୀୟ ଜଳ ପରିମଳ, ପରୀକ୍ଷା ନିରୀକ୍ଷା ପାଇଁ ଲାବୋରେଟୋରି ଓ ସୁରକ୍ଷା ପାଇଁ ପାଚେରି କାର୍ଯ୍ୟ ଅଧାପାନ୍ତରିଆ ହୋଇରହିଛି। ଏହି ଡାକ୍ତରଖାନାଟି ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ତତ୍ତ୍ୱାବଧାନରେ ଥିଲେ ହେଁ ଏହା କାର୍ଯ୍ୟକ୍ଷମ ହେଉ ନ ଥିବାରୁ ଭୂତକୋଠିରେ ପରିଣତ ହେବାକୁ ବସିଲାଣି। ହସ୍ପିଟାଲରେ ଆମେରିକାନ ଇଣ୍ଡିଆନ ଫାଉଣ୍ଡେଶନ ପକ୍ଷରୁ ଗୃହ ଓ ଆନୁଷଙ୍ଗିକ ଜିନିଷପତ୍ର ମହଜୁଦ ଥିଲେ ହେଁ ଏହା ସାଧାରଣ ଲୋକଙ୍କ କୌଣସି କାମରେ ଆସୁନାହିଁ। କଟକ-ଚାନ୍ଦବାଲି ରାସ୍ତାରେ ଦୈନନ୍ଦିନ ଦୁର୍ଘଟଣା ଘଟୁଛି। କେନ୍ଦ୍ରାପଡ଼ାରୁ କଟକ ମଧ୍ୟରେ କୌଣସି ସ୍ଥାନରେ ଦୁର୍ଘଟଣାଗ୍ରସ୍ତ ରୋଗୀଙ୍କ ତ୍ୱରିତ ସେବା କିମ୍ବା ଟ୍ରମା କେୟାର ସେଣ୍ଟର ନ ଥିବାରୁ ଏହି କୋଭିଡ ହସ୍ପିଟାଲକୁ ସରକାର ରୂପାନ୍ତରଣ କରିବାକୁ ସାଧାରଣରେ ଦାବି ହୋଇଛି।