ରାଜନଗର,୨୩ା୧(ଡି.ଏନ.ଏ.): ରାଜନଗର ବ୍ଲକ ତାଳଚୁଆ ପ୍ରାଥମିକ ସେବା ସମବାୟ ସମିତି ପକ୍ଷରୁ ଟିକାୟତନଗରଠାରେ ଧାନମଣ୍ଡି ଖୋଲାଯାଇଛି। ଏହିମଣ୍ଡିରେ ୪ଦିନ ମଧ୍ୟରେ ୬୦ ଚାଷୀ ୧ ହଜାର କୁଇଣ୍ଟାଲ ଧାନ ଦେଇଛନ୍ତି। ତେବେ ମଣ୍ଡିରେ ଧାନ ପଡି ରହିଥିଲେ ମଧ୍ୟ ମିଲର ଧାନ ଉଠାଉ ନାହାଁନ୍ତି। ଶୁକ୍ରବାର ସନ୍ଧ୍ୟାରେ ବର୍ଷା ହେବାରୁ ମଣ୍ଡିରେ ଥିବା ଧାନ ଓଦା ହୋଇଛି। ଏହାପରେ ବି ମିଲର ଧାନ ଉଠାଇବାକୁ ଆସୁ ନ ଥିବା ସେବା ସମବାୟ ସମିତି ସମ୍ପାଦକ ଯୋଗେନ୍ଦ୍ର ନାଥ ବାରିକ କହିଛନ୍ତି। ଶନିବାର ସୁଦ୍ଧା ତାଳଚୁଆ ସେବା ସମବାୟ ସମିତିରେ ୭୩ ଚାଷୀ ୨୭୪୯ କୁଇଣ୍ଟାଲ ୬୫ କେଜି ଧାନ ଦେଇଛନ୍ତି। ସମ୍ପାଦକ ବାରିକଙ୍କ ସୂଚନା ମୁତାବକ ଏହି ସେବା ସମିତିରୁ ସତ୍ୟ ନାରାୟଣ ରାଇସ୍ ମିଲ ୨ହଜାର କୁଇଣ୍ଟାଲ, ରାମଚଣ୍ଡୀ ରାଇସ୍ ମିଲ ୩ହଜାର କୁଇଣ୍ଟାଲ, ହରଗୌରୀ ରାଇସ୍ ମିଲ ୪ହଜାର କୁଇଣ୍ଟାଲ ଧାନ ଉଠାଇବା ପାଇଁ ନିର୍ଦ୍ଦେଶ ରହିଛି ା ହେଲେ ସତ୍ୟ ନାରାୟଣ ରାଇସ୍ ମିଲ ୧୩ଶହ କୁଇଣ୍ଟାଲ, ହରଗୌରୀ ରାଇସ୍ ମିଲ ୪ଶହ କୁଇଣ୍ଟାଲ, ରାମଚଣ୍ଡୀ ରାଇସ୍ ମିଲ ୨୫୦ କୁଇଣ୍ଟାଲ ଧାନ ଉଠାଇଛନ୍ତି। ୪ଦିନ ହେଲା କୌଣସି ମିଲର ଧାନ ନେବାକୁ ଆସି ନାହାଁନ୍ତି। ଆମେ ବାରମ୍ବାର ଫୋନ କରୁଥିଲେ ମଧ୍ୟ ମିଲର ଆସୁ ନ ଥିବା ସମ୍ପାଦକ କହିଛନ୍ତି। ଏଥିସହ ୩ ମିଲର ୧୯୫୦ କୁଇଣ୍ଟାଲ ଧାନ ନେଇଥିବା ବେଳେ ଆମେ ଆଉ ୧ ହଜାର କୁଇଣ୍ଟାଲ ଧାନ ଚାଷୀଙ୍କଠାରୁ କିଣି ସାରିଛୁ। ଚାଷୀ ଧାନ ଦେବା ପରେ ଆମେ ଆମ ଜିମାରେ ରଖିଛୁ। ମଣ୍ଡିରେ ରହିଥିବା ଧାନ ବର୍ଷାରେ ନଷ୍ଟ ହେଉଛି। ଜିଲା ପ୍ରଶାସନ ତୁରନ୍ତ ପଦେକ୍ଷପ ନେବାକୁ ସେ ଦାବି କରିଛନ୍ତି ା