ବୌଦ୍ଧ,୭।୨(ସ୍ବ.ପ୍ର.): ରାସ୍ତା ନିର୍ମାଣ ଚାଲିଥିବାରୁ ମଣ୍ଡିରେ ତିନୋଟି ପଞ୍ଚାୟତର ଶହ ଶହ ଚାଷୀ ଧାନ ପଡ଼ିରହିଥିବା ସହ ଶୀତ କାକରରେ ଚାଷୀ ଧାନକୁ ଜଗି ରହିଛନ୍ତି। ରାସ୍ତା କାମ ଯୋଗଁୁ ମିଲର ଧାନ ଉଠାଇବାକୁ ଗାଡି ପଠାଇପାରୁନାହାନ୍ତି। ତେଣୁ ତୁରନ୍ତ ରାସ୍ତା କାମ ଶେଷ କରାଯାଉ କିମ୍ବା ବାଇପାସ୍ ରାସ୍ତା ନିର୍ମାଣ କରାଯାଉ ବୋଲି ଦାବି କରିଛନ୍ତି ଚାଷୀମାନେ। ସୋମବାର ଏହିଭଳି ଏକ ସମ୍ବେଦନଶୀଳ ଦାବି ନେଇ ହରଭଙ୍ଗା ତହସିଲଦାରଙ୍କ ଦ୍ୱାରସ୍ଥ ହୋଇଛନ୍ତି ତିନୋଟି ପଞ୍ଚାୟତର ଚାଷୀ। ସୂଚନା ମୁତାବକ ପୁରୁଣାକଟକ ତିଲେଶ୍ୱର ରାସ୍ତାକାମ ପୂର୍ତ୍ତ ବିଭାଗ ପକ୍ଷରୁ ଏକମାସ ହେଲା ଚାଲୁଅଛି। ଫଳରେ ଏହି ରାସ୍ତାଦେଇ ଭାରିଯାନ ଚଳାଚଳ କରିପାରୁନାହିଁ। ଏହି ରାସ୍ତା ଉପରେ ତିଲେଶ୍ୱର, ରାମଗଡ ଓ ଧଳପୁର ଗ୍ରାମପଞ୍ଚାୟତର ଲୋକମାନେ ନିର୍ଭରଶୀଳ। ବର୍ତ୍ତମାନ ଧାନ ମଣ୍ଡିଗୁଡିକରେ ଧାନ ବିକ୍ରୟ ପାଇଁ ଚାଷୀମାନଙ୍କୁ ଟୋକନ ପ୍ରଦାନ କରାଯାଇଥିବାବେଳେ ରାସ୍ତା କାମ ଚାଲିଥିବାରୁ ଚାଷୀ ମଣ୍ଡିକୁ ଧାନ ନେବାରେ ସକ୍ଷମ ହୋଇପାରୁନାହିଁ। ଯେଉଁ ଚାଷୀ କଷ୍ଟରେ ମଣ୍ଡିରେ ଧାନ ଧରି ପହଞ୍ଚୁଛନ୍ତି ମିଲର ଗାଡି ଆସିପାରୁ ନ ଥିବା ଯୋଗୁ ମଣ୍ଡିରୁ ଧାନ ଉଠିପାରୁନାହିଁ। ଫଳରେ ଅନେକ ଚାଷୀ ଶୀତକାକରରେ ମଣ୍ଡିରେ ଧାନ ଜଗି ପଡ଼ି ରହିଛନ୍ତି। ଏହି ସମ୍ବେଦନଶୀଳ ସମସ୍ୟାର ତୁରନ୍ତ ସମାଧାନ ପାଇଁ ବ୍ୟବସ୍ଥା କରାଯିବାକୁ ଚାଷୀମାନେ ଦାବି କରିଛନ୍ତି। ସୋମବାର ତିନି ପଞ୍ଚାୟତର ଅନେକ ଚାଷୀ ହରଭଙ୍ଗା ତହସିଲଦାରଙ୍କ କାର୍ଯ୍ୟାଳୟରେ ପହଞ୍ଚତ୍ ଏନେଇ ଦାବିପତ୍ର ପ୍ରଦାନ କରିଛନ୍ତି। ଚାଷୀମାନେ ତୁରନ୍ତ ରାସ୍ତାକାମ ସାରିବାକୁ କିମ୍ବା ଯେଉଁ ସ୍ଥାନରେ ଗାଡି ଯାଇପାରୁନାହିଁ ବାଇପାସ୍ ରାସ୍ତା ନିର୍ମାଣ କରିବାକୁ ଦାବି କରିଛନ୍ତି।