ଇନ୍ଦୋର, ୧୪।୭- ମଧ୍ୟପ୍ରଦେଶ ଇନ୍ଦୋରସ୍ଥିତ ମହାରାଜା ଯଶଓ୍ବନ୍ତ ରାଓ ହସ୍ପିଲାଟ କର୍ତ୍ତୃପକ୍ଷଙ୍କ ଏକ ଚରମ ଅବହେଳା ଏବେ ସାମ୍ନାକୁ ଆସିଛି। ଯାହାକୁ ଶୁଣିଲେ ଆଶ୍ଚର୍ଯ୍ୟ ଲାଗିବ। ସମାନ ନାମ ହେତୁ ଏଠାରେ ଶବ ଅଦଳ ବଦଳ ହୋଇଯାଇଛି। ଶବଗାରାର କର୍ମଚାରୀମାନଙ୍କ ଭୁଲ ଯୋଗୁ ସୋନକଚ୍ଛ ଗ୍ରାମର ଜଣେ ଯୁବକଙ୍କ ଶବକୁ ବିସନଖେଡା ଗ୍ରାମର ଲୋକଙ୍କୁ ଦେଇ ଦେଇଥିଲେ। ବିସନଖେଡା ଗ୍ରାମର ଲୋକ ମଧ୍ୟ ଶବକୁ ନେଇ ଏହାକୁ ନ ଦେଖି ଅନ୍ତିମ ସଂସ୍କାର କରିଦେଇଥିଲେ। ତେବେ ଯେତେବେଳେ ସୋନକଚ୍ଛ ଯୁବକଙ୍କ ପରିବାର ହସ୍ପିଟାଲରେ ପହଞ୍ଚତ୍ଥିଲେ ସେତେବେଳେ ଶବଗାରା କର୍ମଚାରୀମାନେ ତାଙ୍କୁ ବିସନଖେଡା ଗ୍ରାମର ଯୁବକଙ୍କ ଶବ ଦେଇଥିଲେ। ସୋନକଚ୍ଛ ଗ୍ରାମର ଲୋକ ଶବ ଦେଖି ଚମକି ପଡ଼ିଥିଲେ। ଏହା ତାଙ୍କ ପରିଜନଙ୍କ ନୁହେଁ ବରଂ ଶବ ଅଦଳ ବଦଳ ହୋଇଥିବା ଜାଣିବାକୁ ପାଇଥିଲେ। ଉଭୟଙ୍କ ପ୍ରଥମ ନାମ ଓ ବୟସ ସମାନ ଥିବାରୁ ଏଭଳି ଭୁଲ ହୋଇଥିବା ହସ୍ପିଟାଲ କର୍ତ୍ତୃପକ୍ଷ କହିଛନ୍ତି। ଘଟଣାରୁ ଜଣାପଡ଼ିଛି ଯେ ସୋନକଚ୍ଛ ଅଞ୍ଚଳର ୨୫ ବର୍ଷୀୟ ଆକାଶ ପଟେଲିଆ ୮ ଦିନ ତଳେ ଏସିଡ୍ ପିଇଦେଇ ଏହି ହସ୍ପିଟାଲରେ ଆସି ଚିକିତ୍ସିତ ହେଉଥିଲେ। ଚିକିତ୍ସାଧୀନ ଅବସ୍ଥାନରେ ତାଙ୍କର ମୃତ୍ୟୁ ହୋଇଥିଲା। ସେହିଭଳି ବିସନଖେଡା ଅଞ୍ଚଳର ଆକାଶ ସିଂ ନାମକ ଜଣେ ଯୁବକ ରବିବାର ରାତିରେ ବିଦ୍ୟୁତ ସଂସ୍ପର୍ଶରେ ଆସି ହସ୍ପିଟାଲରେ ଭର୍ତ୍ତି ହୋଇଥିଲେ। ପରେ ତାଙ୍କର ମଧ୍ୟ ମୃତ୍ୟୁ ହୋଇଥିଲା। ଏହାପରେ ଉଭୟଙ୍କ ମୃତଦେହ ସୋମବାର ବ୍ୟବଚ୍ଛଦ କରାଯାଇଥିଲା। ଏବଂ ପରେ ଉଭୟ ପରିବାରକୁ ଶବ ହସ୍ତାନ୍ତର ପାଇଁ ଡକାଯାଇଥିଲା। ବିସନଖେଡା ଆକାଶଙ୍କ ପରିବାର ପ୍ରଥମେ ଆସି ଗୋଟିଏ ଶବ ନେଇ ଚାଲିଯାଇଥିଲେ ଏବଂ ଏହାକୁ ନ ଦେଖି ଅନ୍ତିମ ସଂସ୍କାର ମଧ୍ୟ କରିଦେଇଥିଲେ। ତେବେ ଯେତେବେଳେ ସୋନକଚ୍ଛ ଆକାଶଙ୍କ ପରିବାର ଶବ ନେବାକୁ ଆସିଥିଲେ ଏହା ତାଙ୍କ ପରିଜନଙ୍କର ନୁହେଁ ବୋଲି ଜାଣିପାରିଥିଲେ। ଶେଷରେ ଶବ ନେବାକୁ ମନା କରି ଦେଇଥିଲେ। ହସ୍ପିଟାଲ କର୍ତ୍ତୃପକ୍ଷଙ୍କ ବେପାରୁଆ ମନୋଭାବ ଯୋଗୁ ଏପରି ଘଟିଲା ବୋଲି ସୋନକଚ୍ଛର ଆକାଶ ପଟେଲିଆଙ୍କ ପରିବାର ଥାନାରେ ଅଭିଯୋଗ କରିଛନ୍ତିି।