ନବରଙ୍ଗପୁର, ୧୮ା୬(ସଦାଶିବ ପ୍ରହରାଜ) ୫-ଟି ମାଧ୍ୟମରେ ହାଇସ୍କୁଲଗୁଡ଼ିକୁ କୋଟି କୋଟି ଟଙ୍କା ଖର୍ଚ୍ଚ କରାଯାଇ ରୂପାନ୍ତରଣ କରାଯାଉଛି। ଏହାର ରକ୍ଷଣାବେକ୍ଷଣ ଠିକ୍ ଭାବେ କରିବାକୁ ୫-ଟି ସଚିବ ପ୍ରତ୍ୟେକ ଉଦ୍ଘାଟନ ସମୟରେ କହୁଛନ୍ତି। ତେବେ ଏହାର ଓଲଟା ଚିତ୍ର ନବରଙ୍ଗପୁର ସଦର ମହକୁମା ନୋଡାଲ ଆର୍ସିଡି ହାଇସ୍କୁଲରେ ଦେଖିବାକୁ ମିଳିଛି।
ନବରଙ୍ଗପୁର ନୋଡାଲ ଆର୍ସିଡି ହାଇସ୍କୁଲକୁ ୨ ବର୍ଷ ତଳେ ରୂପାନ୍ତରଣ କରାଯାଇଥିଲା। କିନ୍ତୁ ରକ୍ଷଣାବେକ୍ଷଣା ଅଭାବରୁ ସେଠାରେ ଖଞ୍ଜାଯାଇଥିବା ସିମେଣ୍ଟ ଚେୟାରଗୁଡିକ ଭାଙ୍ଗିଗଲାଣି। ଡାଇନିଂ ହଲ୍ ନିକଟରେ ଅରମାବଣ ଦେଖାଦେଇଛି। ସେଠାରେ କରାଯାଇଥିବା ସୁନ୍ଦର ଡିଜାଇନ ସବୁ ଶିଉଳି ଖାଇ କଳା ପଡ଼ିଗଲାଣି। କିଛିବର୍ଷ ପୂର୍ବରୁ ଚକାଚକ କରୁଥିବା ହାଇସ୍କୁଲଟି ଏବେ ଲୋକଙ୍କ ଆଖିକୁ ଅସୁନ୍ଦର ଦେଖାଯାଉଛି। ହାଇସ୍କୁଲର ଶ୍ରେଣୀଗୃହ ଓ ହଷ୍ଟେଲ ପଛପାଖରେ ଏକ ଡମ୍ପିଂ ୟାର୍ଡ ଭଳି ଅନେକ ଜିନିଷ ରଖାଯାଇଛି। ସେଠାରେ ୧୦୦ରୁ ଅଧିକ ହାତଧୁଆ ବେସିନ୍ ବର୍ଷେ ହେବ ପଡି ରହିଛି। ସେଗୁଡିକ ଏବେ ଖତ ଖାଇଗଲାଣି। ତତ୍କାଳୀନ ନବରଙ୍ଗପୁର ବିଇଓ ମଧ୍ୟାହ୍ନଭୋଜନ ପରେ ଛାତ୍ରୀଛାତ୍ର ହାତ ଧୋଇବା ପାଇଁ ଏକ ବ୍ୟବସାୟୀଙ୍କୁ କହି ବେସିନ ଅଣାଇଥିଲେ। କିଣିବା ପାଇଁ ଅନୁମୋଦନ ନ ମିଳିବାରୁ ତାହାକୁ ଆର୍ସିଡି ହାଇସ୍କୁଲ ବାଳିକା ବିଭାଗ ପରିସରରେ ପ୍ରାୟ ଏକ ବର୍ଷ ହେବ ରଖାଯାଇଛି ବୋଲି ବିଶେଷ ସୂତ୍ରରୁ ଜଣାପଡ଼ିଛି। ସମଗ୍ର ଶିକ୍ଷା ପ୍ଲାନିଂ କୋଅର୍ଡିନେଟର ପ୍ରଦୀପ୍ତ ଷଡଙ୍ଗୀ, କନିଷ୍ଠ ଯନ୍ତ୍ରୀ ଉର୍ଜା ଦୀପଙ୍କୁ ପଚାରିବାରୁ ସେମାନଙ୍କ ନିକଟରେ ଖବର ନ ଥିବା କହିଛନ୍ତି। ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ସୁପ୍ରିୟା ନାୟକଙ୍କୁ ପଚାରିବାରୁ ବିଗିଡ଼ିଥିଲେ। ୫-ଟି ବିଦ୍ୟାଳୟରେ ଏହା ଲଗାଇବାକୁ ମଗାଯାଇଥିଲା। ପସନ୍ଦ ନ ହେବାରୁ ଦୋକାନୀ ଛାଡ଼ିଦେଇ ଚାଲି ଯାଇଛନ୍ତି। ବର୍ଷେ ନୁହେଁ ୬ ମାସ ହେବ ଏହା ପଡ଼ି ରହିଛି। ଦୋକାନୀ ସେ ସବୁ ନେଇଯିବେ ବୋଲି ପ୍ରଦାନ ଶିକ୍ଷୟିତ୍ରୀ କହିଛନ୍ତି। ଦୋକାନୀଙ୍କୁ ସେଠାରୁ ବେସିନ ଉଠାଇ ନେବାପାଇଁ ଚିଠି କରାଯାଇଛି କି ବୋଲି ପ୍ରଶ୍ନ କରିବାରୁ କାହାର କିଛି ଅସୁବିଧା ହେଉଛି କି ବୋଲି ପ୍ରଧାନ ଶିକ୍ଷୟିତ୍ରୀ ପାଲଟା ପ୍ରଶ୍ନ କରିଥିଲେ। କେଉଁ ଦୋକାନୀ ଓ ଏଜେନ୍ସି ବେସିନ ଆଣିଥିଲେ ପଚାରିବାରୁ ସେ ଦୋକାନୀଙ୍କ ନାଁ କହି ନ ଥିଲେ। ପଡିରହିଥିବା ବେସିନଗୁଡିକ ଆସିଲା କେଉଁଠୁ, କିଏ ଆଣି ରଖିଛି ଓ କେଉଁ ବ୍ୟକ୍ତି ମଗାଇଥିଲେ ତାହାର ତଦନ୍ତ କରିବାକୁ ଦାବି ହେଉଛି। ଏନେଇ ଜିଲାପାଳ ସ୍ବତନ୍ତ୍ର ଦୃଷ୍ଟି ଦେବାକୁ ଦାବି କରାଯାଇଛି।