ଦଶମନ୍ତପୁର,୨୨ା୧୨(ଡି.ଏନ୍.ଏ.): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ଗାଦିଆଗୁଡ଼ା ପଞ୍ଚାୟତରେ ଥିବା ଡୁମୁରିଗୁଡ଼ା ଗ୍ରାମକୁ ଯିବା ପାଇଁ ରାସ୍ତା ନାହିଁ। ଏହି ଗ୍ରାମରେ ଆଦିବାସୀ ସମ୍ପ୍ରଦାୟର ୪୫ ପରିବାର ବସବାସ କରନ୍ତି। ଏମାନଙ୍କ ମୁଖ୍ୟ ଜୀବିକା ହେଲା ପୋଡୁଚାଷ । ଗ୍ରାମରେ କୌଣସି କାମଧନ୍ଦା ନ ମିଳିବାରୁ ବାଧ୍ୟ ହୋଇ କେତେଜଣ ବ୍ୟକ୍ତି ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି । ଗ୍ରାମରେ ସରକାରଙ୍କ ପ୍ରତ୍ୟେକ ଯୋଜନା ଅପହଞ୍ଚ ହୋଇ ରହିଛି। ରାସ୍ତା ନିର୍ମାଣରେ ପାହାଡ଼ ବାଧକ ସାଜିଛି। ଗ୍ରାମକୁ ଯେଉଁଆଡୁ ଗଲେ ପଡୁଛି ପାହାଡ଼ ଓ ନଦୀ। ଗ୍ରାମର ପୂର୍ବରେ ବିଜାଦାମକା ପର୍ବତ, ପଶ୍ଚିମରେ ଅଣ୍ଡ୍ରଗହଣି ପାହାଡ଼, ଉତ୍ତରରେ କରଡ଼ି ପାହାଡ଼ ଏବଂ ଦକ୍ଷିଣରେ ରହିଛି ଟିପରି ବାଲିଦାମକା ପାହାଡ଼। ଏହି ଗ୍ରାମପଞ୍ଚାୟତ କାର୍ଯ୍ୟାଳୟଠାରୁ ୩ କି.ମି. ଦୂର ହୋଇଥିବା ବେଳେ ବ୍ଲକ କାର୍ଯ୍ୟାଳୟଠାରୁ ୧୫ କି.ମି. ଦୂର। ପୋଡ଼ାଗଡ଼ ପଞ୍ଚାୟତ ସାପ୍ତାହିକ ହାଟକୁ ଯିବାକୁ ହେଲେ ଗ୍ରାମବାସୀଙ୍କୁ ବିଲାନସିଲ ଛକ ଦେଇ ଯିବାକୁ ପଡ଼େ। କଟିଆ ମଶାଣି ନଦୀ ପାରହେବାକୁ ମଧ୍ୟ ପଡିଥାଏ। ବୋଲି ଗ୍ରାମର ସୁବାଇ ସାଉଁନ୍ତା, ଧନାଇ ସାଉଁନ୍ତା, ନରସିଂହ ସାଉଁନ୍ତା, ମାଳତି ସାଉଁନ୍ତା, କୁଶ ସାଉଁନ୍ତା, ନାରଙ୍ଗ ସାଉଁନ୍ତା, ୱାଲସୀ ସାଉଁନ୍ତା, ସନା ସାଉଁନ୍ତା, ମନ ସାଉଁନ୍ତା, କମଳା ସାଉଁନ୍ତା, ନିର ସାଉଁନ୍ତା, ଅଭି ସାଉଁନ୍ତା, ଦାନ ସାଉଁନ୍ତା, ଗୁରୁନାଥ ସାଉଁନ୍ତା କହିଛନ୍ତି। ଗ୍ରାମରେ କେହି ରୋଗରେ ପଡିଲେ କିମ୍ବା ଗର୍ଭବତୀଙ୍କୁ ଚିକିତ୍ସାଳୟକୁ ନେବାକୁ ଭାର ଓ କାଉଡି ଭରସା। ଏଥିରେ ବୋହି ଗ୍ରାମବସୀ ରୋଗୀଙ୍କୁ ନେଇଥାନ୍ତି। ଗ୍ରାମ ୨ପାର୍ଶ୍ୱକୁ ସଂଯୋଗ କରୁଥିବା ଗୋଟିଏ ନଦୀ ଏବଂ ୨ଟି ଝୋଲାରେ ପୋଲ ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି। ପ୍ରଶସନ ଏଥିପ୍ରତି ଦୃଷ୍ଟିଦେବାକୁ ସାଧାରଣରେ ମତ ପ୍ରକାଶ ପାଉଛି।
