କୋଲକତା,୧୭।୧: ସାଧାରଣତଃ ମାତାପିତାମାନେ ନିଜ ପିଲାମାନଙ୍କର ସୁରକ୍ଷାକାରୀ ଏବଂ ଶୁଭଚିନ୍ତକ ହୋଇଥାନ୍ତି। ଏପରି ପରିସ୍ଥିତିରେ, ଯଦି ପିତା ନିଜ ପିଲାମାନଙ୍କ ପ୍ରତି ନିଷ୍ଠୁର ତେବେ କ’ଣ କୁହାଯାଇପାରେ। ପଶ୍ଚିମବଙ୍ଗର ଦୁର୍ଗାପୁରରୁ ଏଭଳି ପିତାଙ୍କ ନିଷ୍ଠୁର ଆଚରଣ ମାମଲା ସାମ୍ନାକୁ ଆସିଛି, ଯେଉଁଠାରେ ପିତା ନିଜ ପିଲାଙ୍କୁ ଏପରି ଦଣ୍ଡ ଦେଇଛନ୍ତି ଯେ ଜାଣିଲେ ହୃଦୟ ଥରି ଉଠିବ। ପଶ୍ଚିମ ବର୍ଦୱାନ ଜିଲାର ପାଣ୍ଡେଶ୍ୱରର ଖୁଟାଡିହ ଅଞ୍ଚଳରେ ଜଣେ ଛାତ୍ରୀ ପାଠ ନ ପଢିବାରୁ ତାଙ୍କ ଗାଲରେ ଗରମ ତାଓ୍ବା ଲଗାଇ ଦେଇଛନ୍ତି ପିତା। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ସମ୍ପୃକ୍ତ ବ୍ୟକ୍ତି ଅତୀତରେ ମଧ୍ୟ ନିଜ ପିଲାଙ୍କୁ ଏଭଳି ଅମାନବୀୟ ଦଣ୍ଡ ଦେଇଛନ୍ତି। ଝିଅ ସହ ଏଭଳି ଘଟଣା ଘଟାଇବା ପରେ ପିତା ନିଜ ଭୁଲ ବୁଝି ତାହାକୁ ସୁଧାରିବା ପାଇଁ ପଡୋଶୀଙ୍କ କ୍ଷମା ମାଗିଥିଲେ। ଏହାସହ ଝିଅ ଆଗରେ ଉଠ୍-ବସ୍ ହୋଇଥିଲେ। ଭବିଷ୍ୟତରେ ଏଭଳି ଭୁଲ ନ କରିବା ପାଇଁ ମଧ୍ୟ ପ୍ରତିଶ୍ରୁତି ଦେଇଥିଲେ।
