ଢେଙ୍କାନାଳ ଅଫିସ, ୨୪।୮: ଢେଙ୍କାନାଳ ସହର ୫ନଂ. ୱାର୍ଡ ବସ୍ଷ୍ଟାଣ୍ଡ ଅମଲାପଡ଼ା ଅଞ୍ଚଳରୁ ମଙ୍ଗଳବାର ରାତି ପ୍ରାୟ ୮ଟାରେ ବୋଲେରୋ ଚୋରି ଉଦ୍ୟମ କରୁଥିବା ଜଣେ ଅଭିଯୁକ୍ତଙ୍କୁ ସ୍ଥାନୀୟ ଲୋକେ କାବୁ କରି ପୋଲିସ ଜିମା ଦେଇଛନ୍ତି। ଅନ୍ୟ ୨ଜଣ ଫେରାର ହୋଇଯାଇଛନ୍ତି। ପ୍ରତ୍ୟକ୍ଷଦର୍ଶୀଙ୍କ କହିବା କଥା, ବସ୍ଷ୍ଟାଣ୍ଡ ଅମଲାପଡ଼ା ଅଞ୍ଚଳରେ ବୋଲେରୋ ଛିଡ଼ା ହୋଇଥିବାବେଳେ ଅଭିଯୁକ୍ତ ଜଣକ ଏକ ଚାବିରେ ଗାଡ଼ି ଡୋର୍ ଖୋଲିବାକୁ ଉଦ୍ୟମ କରୁଥିଲେ। ଗାଡ଼ିମାଲିକ ସିସିଟିଭି କ୍ୟାମେରାରେ ଏହା ଦେଖିବା ପରେ ଚିତ୍କାର କରିଥିଲେ। ଅଭିଯୁକ୍ତ ଜଣକ ଚାବି ଛାଡ଼ି ଚମ୍ପଟ ମାରିବାକୁ ଉଦ୍ୟମ କରୁଥିବାବେଳେ ଅଞ୍ଚଳବାସୀ ମାଡ଼ିବସିଥିଲେ। ଏହାପରେ ଦୁର୍ଗାବଜାର ଅଞ୍ଚଳରୁ ଏକ ସ୍କୁଟି ଜବତ ହୋଇଥିଲା। ଅଭିଯୁକ୍ତ ବ୍ୟବହାର କରିଥିବା ଚାବିରେ ଏହା ଷ୍ଟାର୍ଟ ହୋଇଯାଇଥିଲା। ଉକ୍ତ ସ୍କୁଟିରେ ଅଭିଯୁକ୍ତମାନେ ଆସିଥିବା ସ୍ପଷ୍ଟ ହୋଇଛି। ପୋଲିସ ଅଭିଯୁକ୍ତଙ୍କୁ ଅଟକ ରଖି ପଚରାଉଚରା କରୁଛି। ଏଥିପୂର୍ବରୁ ଅଭିଯୁକ୍ତ ଜଣକ ବୋଲେରୋ ନିକଟରେ ଥିବା ଏକ ଦାମୀକାର୍ ଚୋରି କରିବାକୁ ଉଦ୍ୟମ କରି ବିଫଳ ହୋଇଥିବା ଜଣାପଡ଼ିଛି। ଦୀର୍ଘଦିନ ହେଲା ସହରରେ ଏକ ଗାଡ଼ି ଚୋରି ରାକେଟ୍ ପୋଲିସର ନିଦ ହଜାଇ ଦେଇଥିବାବେଳେ ଏଥିରେ ସମ୍ପୃକ୍ତ ଅଭିଯୁକ୍ତଙ୍କ ଲିଙ୍କ୍ ଥିବା ଅନୁମାନ କରାଯାଉଛି। ସିସିଟିଭି ଫୁଟେଜ୍ ଆଧାରରେ ପୋଲିସ ତଦନ୍ତ ଆରମ୍ଭ କରିଛି।