ମହାକାଳପଡ଼ା, ୧ା୩(ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ଅଧୀନ ମହାକାଳପଡ଼ା ବ୍ଲକ ନଦୀନାଳ ଘେରା ଉପକୂଳ ଅଞ୍ଚଳର ୩୫ଟି ଗଁାରେ ସାମୁଦ୍ରିକ ମତ୍ସ୍ୟଜୀବୀମାନେ ରହୁଛନ୍ତି। ସେମାନେ ନଦୀ, ସମୁଦ୍ରରେ ମାଛ ମାରି ଗୁଜୁରାଣ ମେଣ୍ଟାଇଥା’ନ୍ତି। ବହୁ କଷ୍ଟ କରି ନଦୀ, ସମୁଦ୍ରରେ ଜୀବନକୁ ବାଜି ଲଗାଇ ଯାହା ଦୁଇ ପଇସା ରୋଜଗାର କରନ୍ତି, ପିଲାମାନଙ୍କ ପାଠ ପଢିବା ଓ ପରିବାର ପ୍ରତିପୋଷଣରେ ଖର୍ଚ୍ଚ ହୋଇଥାଏ। କେତେବେଳେ ସାମୁଦ୍ରିକ ଝଡ଼, ବାତ୍ୟା ତ ଆଉ କେଉଁ ସମୟରେ ସାମୁଦ୍ରିକ ଅଭୟାରଣ୍ୟ ଗହୀରମଥା ଅଞ୍ଚଳରେ ପ୍ରବେଶ ବାରଣ କରାଯାଇଛି। ଏହି ସମୟରେ ମତ୍ସ୍ୟଜୀବୀମାନଙ୍କୁ ସରକାରଙ୍କ ପକ୍ଷରୁ ଆର୍ଥିକ ସହାୟତା ପ୍ରଦାନ କରାଯାଉଛି। ହେଲେ ଏବେ ଯାଞ୍ଚ ସମୟରେ ୧୦୧ ଜଣ ନକଲି ମତ୍ସ୍ୟଜୀବୀ ସହାୟତା ରାଶି ହାତେଇଥିବା ଜଣାପଡିଛି। ସୂଚନାଯୋଗ୍ୟ, ନଭେମ୍ବରରୁ ଜୁନ୍ ୧୫ ପର୍ଯ୍ୟନ୍ତ ଅଲିଭ୍ରିଡ୍ଲେ କଇଁଛଙ୍କ ଅଣ୍ଡାଦାନ ଓ ମାଛ ଯଁାଳ ବଂଶ ବିସ୍ତାର ଲାଭ ପାଇଁ ବନ ବିଭାଗ, ମତ୍ସ୍ୟ ବିଭାଗ ଓ ତଟରକ୍ଷୀ ବିଭାଗ ପକ୍ଷରୁ କଟକଣା କରାଯାଇଛି। ବର୍ଷକର ସାଢ଼େ ୭ ମାସ ସମୁଦ୍ରକୁ ପ୍ରବେଶ ବାରଣ ଦୃଷ୍ଟିକୁ ଲକ୍ଷ୍ୟ କରି ରାଜ୍ୟ ସରକାର ଜୀବନ ଜୀବିକା ନିର୍ବାହ ପାଇଁ ମତ୍ସ୍ୟଜୀବୀ ପରିବାରକୁ ୭,୫୦୦ଟଙ୍କା ପ୍ରଦାନ କରୁଛନ୍ତି।
ମିଳିଥିବା ସୂଚନା ଅନୁଯାୟୀ, ମହାକାଳପଡ଼ା ବ୍ଲକରେ ମୋଟ୍ ୫ ହଜାର ମତ୍ସ୍ୟଜୀବୀ ପରିବାର ମଧ୍ୟରେ ୧୦ ହଜାର ସାମୁଦ୍ରିକ ଓ ପାରମ୍ପରିକ ମତ୍ସ୍ୟଜୀବୀ ଅଛନ୍ତି। ଚଳିତବର୍ଷ ସର୍ଭେ ଅନୁସାରେ, ଏହି ବ୍ଲକରେ ଯନ୍ତ୍ରଚାଳିତ ପଞ୍ଜୀକୃତ ଡଙ୍ଗା ସଂଖ୍ୟା ୧୨୫୦ ହୋଇଥିବା ବେଳେ ପାରମ୍ପରିକ ଆହୁଲାଚାଳିତ ଡଙ୍ଗା ସଂଖ୍ୟା ୫୨୭ ରହିଛି। ଏପରି ମୋଟ ୧୭୭୭ ଡଙ୍ଗା ରହିଛି। ସେହିପରି ପୂର୍ବରୁ ଏହି ବ୍ଲକରେ ୧୮୭୮ ଯନ୍ତ୍ରଚାଳିତ ଓ ଆହୁଲାଚାଳିତ ଡଙ୍ଗା ଥିଲା। ତେବେ ଚଳିତବର୍ଷ ନୂଆ ରିପୋର୍ଟ ଅନୁସାରେ ପଞ୍ଜୀକୃତଙ୍କ ମଧ୍ୟରୁ ୧୦୧ ଜଣ ମତ୍ସ୍ୟଜୀବୀ ନବୀକରଣରେ ସେମାନଙ୍କ ପ୍ରମାଣ ପତ୍ର ଯାଞ୍ଚରେ ବାଦ୍ ପଡ଼ିଛନ୍ତି। ତେବେ ଏଠାରେ ପ୍ରଶ୍ନ ଉଠେ, ଚଳିତ ୨୨-୨୩ ସର୍ଭେ ଅନୁସାରେ, ସରକାରୀ ତଥ୍ୟ ଅନୁଯାୟୀ, ବାସ୍ତବରେ ପ୍ରକୃତ ମତ୍ସ୍ୟଜୀବୀ ସଂଖ୍ୟା ୧୭୭୭ ରହିଥିବାବେଳେ ପୂର୍ବବର୍ଷଗୁଡିକରେ ୧୮୭୮ଜଣ ଆର୍ଥିକ ସହାୟତା ହାତେଇ ଥିଲେ। ଯାଞ୍ଚ ବେଳେ ଏହି ୧୦୧ ଭୂତ ମତ୍ସ୍ୟଜୀବୀ ଅନ୍ତର୍ଦ୍ଧାନ ହେବା କୁହାଯାଇଛି। ଏହା ପୂର୍ବରୁ ବିଭାଗୀୟ ଅଧିକାରୀମାନେ ଯାଞ୍ଚ ନ କରି କିପରି ଭୂତ ମତ୍ସ୍ୟଜୀବୀମାନଙ୍କୁ ଆର୍ଥିକ ସହାୟତା ପ୍ରଦାନ କରୁଥିଲେ, ଏହା ଅଞ୍ଚଳରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଏ ସମ୍ପର୍କରେ ମହାକାଳପଡ଼ା ସାମୁଦ୍ରିକ ବିଭାଗ ସହକାରୀ ମତ୍ସ୍ୟ ଅଧିକାରୀ ଦୀପକ କୁମାର ମଲ୍ଲିକଙ୍କୁ ପଚାରିବାରେ, ଚଳିତବର୍ଷ ସର୍ଭେ ଅନୁସାରେ ୧୦୧ ମତ୍ସ୍ୟଜୀବୀଙ୍କ କିଛି ସନ୍ଧାନ ମିଳୁ ନ ଥିବା କହିଛନ୍ତି। ଆଗାମୀ ଦିନରେ ପ୍ରକୃତ ମତ୍ସ୍ୟଜୀବୀଙ୍କ ଯାଞ୍ଚ ହେବ। ବାସ୍ତବ ମତ୍ସ୍ୟଜୀବୀମାନଙ୍କୁ ଚିହ୍ନଟ କରାଯାଇ ଆର୍ଥିକ ସହାୟତା ପ୍ରଦାନ କରାଯିବ ବୋଲି ସେ କହିଛନ୍ତି।