ଲଣ୍ଡନ, ୨।୭- ଘରୋଇ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ କ୍ରିକେଟ୍ ଦଳ ମଧ୍ୟରେ ୩ ମ୍ୟାଚ୍ବିଶିଷ୍ଟ ଟେଷ୍ଟ ସିରିଜ ଚଳିତ ମାସ ୮ରୁ ଖେଳାଯିବ। ମହାମାରୀ କରୋନା ଭାଇରସ ଲାଗି ଦୀର୍ଘ ୩ ମାସ ହେବ କୌଣସି ଅନ୍ତର୍ଜାତୀୟ କ୍ରିକେଟ୍ ପ୍ରତିଯୋଗିତା ଅନୁଷ୍ଠିତ ହୋଇନାହିଁ। ତେଣୁ ଏହି ସିରିଜକୁ ନେଇ କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍ସୁକତା ଦେଖାଦେଇଛି। ତେବେ ଏଥିପୂର୍ବରୁ ଇଂଲଣ୍ଡ ଖେଳାଳିମାନଙ୍କ ମଧ୍ୟରେ ଏକ ପ୍ରାକ୍ଟିସ ମ୍ୟାଚ୍ ଅନୁଷ୍ଠିତ ହୋଇଯାଇଛି। ଏହି ମ୍ୟାଚ୍ ଅବସରରେ କ୍ରିକେଟ୍ ଖେଳାଳିମାନେ କରୋନା ଲାଗି କେଉଁଭଳି ସତର୍କତା ଅବଲମ୍ବନ କରୁଛନ୍ତି ତାହାର ଛବି ଦେଖିବାକୁ ମିଳିଥିଲା। ଏହି ମ୍ୟାଚ୍ରେ ବରିଷ୍ଠ ଇଂଲଣ୍ଡ ଦ୍ରୁତ ବୋଲର ଜେମ୍ସ ଆଣ୍ଡରସନ ୨ଟି ଉଇକେଟ୍ ହାସଲ କରିଥିଲେ। ଜୋ ଡେନଲୀ ଓ ଡାନ୍ ଲରେନ୍ସ ଆଣ୍ଡରସନଙ୍କ ଶିକାର ହୋଇଥିଲେ। କିନ୍ତୁ ଇଇକେଟ୍ ହାସଲ ପରେ ଆଣ୍ଡରସନ ସାଥୀ ଖେଳାଳିଙ୍କ ସହ ହାତ ମିଶାଇ ନ ଥିଲେ। ବରଂ କହୁଣିକୁ କହୁଣି ମିଶାଇ ଉଇକେଟ୍ ସେଲିବ୍ରେସନ କରିଥିଲେ। ସେହିଭଳି ମ୍ୟାଚ୍ ମଝିରେ ମଝିରେ ଅଧିକାଂଶ ଖେଳାଳି ପଡ଼ିଆ ବାହାରେ ରଖାଯାଇଥିବା ସାନିଟାଇଜରରେ ହାତ ସଫା କରୁଥିବାର ଦେଖିବାକୁ ମିଳିଥିଲା।
