କଟକ ଅଫିସ,୧୭।୯: ଦଶହରାରେ ମୃଣ୍ମୟୀ ମୂର୍ତ୍ତି ନିର୍ମାଣକୁ ନେଇ ଲାଗିଥିବା ବିବାଦରେ ହାଇକୋର୍ଟ ବୁଧବାର ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ଯେଉଁ ପୂଜା କମିଟି ଯେତିକି ଉଚ୍ଚତାର ମୃଣ୍ମୟୀ ମୂର୍ତ୍ତି ନିର୍ମାଣ କରିଛନ୍ତି, ସେତିକି ଉଚ୍ଚତା ପର୍ଯ୍ୟନ୍ତ ଅନୁମତି ମିଳିବ। ଏ ନେଇ ଡିସିପିଙ୍କ ନିକଟରେ ବୁଧବାର ସନ୍ଧ୍ୟା ୭ଟା ସୁଦ୍ଧା ଆବେଦନପତ୍ର ଦାଖଲ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ତେବେ କେତେ ସଂଖ୍ୟକ ପୂଜା କମିଟି ଆବେଦନପତ୍ର ଦାଖଲ କରିଛନ୍ତି, ତାହା ସ୍ପଷ୍ଟ ହୋଇନି। ଏ ସମ୍ପର୍କରେ କୌଣସି ମତାମତ ଦେବାକୁ ଡିସିପି ପ୍ରତୀକ ସିଂ ମନା କରିଥିଲେ।
ଯେଉଁ ପୂଜା କମିଟି ୪ଫୁଟର ମୂର୍ତ୍ତି ନିର୍ମାଣ କରିଛନ୍ତି ସେମାନେ ଏବେ ସେହି ଉଚ୍ଚତାର ମୂର୍ତ୍ତି ପୂଜା କରିବେ। ଏହାଛଡା ଯେଉଁମାନେ ୭ଫୁଟର ମୂର୍ତ୍ତି ନିର୍ମାଣ କରିଛନ୍ତି ସେମାନେ ମଧ୍ୟ ଅପରିବର୍ତ୍ତିତ ରହିବେ। କଟକର ଅଧାରୁ ଅଧିକ ପୂଜା କମିଟି ବର୍ତ୍ତମାନ ସୁଦ୍ଧା ମୂର୍ତ୍ତି ନିର୍ମାଣ କାର୍ଯ୍ୟ ପ୍ରାୟ ଶେଷ କରିସାରିଲେଣି। ନିଜ ମୂର୍ତ୍ତିର ଫଟୋ ଓ ପୂଜା କମିଟିର କାଗଜପତ୍ର ଡିସିପିଙ୍କ ନିକଟରେ ଦାଖଲ କରିବାକୁ ନିର୍ଦ୍ଦେଶ ରହିଥିଲା। କାଗଜପତ୍ର ଯାଞ୍ଚ କରିବା ପରେ ପୋଲିସର ଏକ ଟିମ୍ ପୂଜାମଣ୍ଡପ ଅନୁଧ୍ୟାନରେ ଯିବ ବୋଲି ଜଣାପଡ଼ିଛି। ହାଇକୋର୍ଟରେ ରୁଜୁ ହୋଇଥିବା ଏହି ମାମଲାରେ ବୁଧବାର ବିସ୍ତୃତ ଶୁଣାଣି କରାଯାଇଥିଲା। ହାଇକୋର୍ଟ ମୁଖ୍ୟ ବିଚାରପତି ଜଷ୍ଟିସ୍ ମହମ୍ମଦ ରଫିକ୍ ଏବଂ ବିଚାରପତି ଜଷ୍ଟିସ୍ ବି.ଆର. ଷଡଙ୍ଗୀଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ମାମଲାର ରାୟ ପ୍ରକାଶ କରିଥିଲେ। ଅନ୍ୟପକ୍ଷରେ ରାଜ୍ୟ ସ୍ବତନ୍ତ୍ର ରିଲିଫ କମିଶନରଙ୍କ ଅନ୍ୟ ଏକ ନିୟମକୁ ନେଇ ମଧ୍ୟ ହାଇକୋର୍ଟରେ ଚ୍ୟାଲେଞ୍ଜ କରାଯାଇଥିଲା। ମଣ୍ଡପର ୩ ପାର୍ଶ୍ୱ ଆବଦ୍ଧ କରାଯାଇ ପୂଜା ହେବ ବୋଲି କମିଶନରଙ୍କ ଗାଇଡ୍ଲାଇନରେ ଉଲ୍ଲେଖ କରାଯାଇଥିଲା। ହାଇକୋର୍ଟ ଏହି ଘଟଣାରେ କୌଣସି ହସ୍ତକ୍ଷେପ କରି ନ ଥିବା ଜଣାପଡିଛି।