ଭୁବନେଶ୍ୱର, ୧୮।୧୦ (ବ୍ୟୁରୋ):ସ୍ମାର୍ଟସିଟି ଭୁବନେଶ୍ୱରକୁ ସ୍ବଚ୍ଛ ଓ ସୁନ୍ଦର କରି ଗଢି ତୋଳିବା ପାଇଁ ବିଏମ୍ସି ପକ୍ଷରୁ ବିଭିନ୍ନ ପଦକ୍ଷେପ ନିଆଯାଉଥିବା କୁହାଯାଉଛି। ଖୁବ୍ ଶୀଘ୍ର ଭୁବନେଶ୍ୱରକୁ ଡଷ୍ଟବିନ୍ମୁକ୍ତ କରିବା ପାଇଁ ଯୋଜନା କରାଯାଉଛି। ବାହାରେ କେଉଁଠାରେ ଅଳିଆ ପକାଯିବ ନାହିଁ, ସଫେଇ କର୍ମଚାରୀମାନେ ଅଳିଆ ଉଠାଇବେ। ନହେଲେ ଜରିମାନା ଆଦାୟ କରାଯିବାକୁ ନିୟମ କରାଯାଇଛି। ବିଏମ୍ସି ସହରରେ ସ୍ବଚ୍ଛତା ଆପଣାଇବା ପାଇଁ ପ୍ରାଣପଣେ ଚେଷ୍ଟା କରୁଥିବା ଏବଂ ସଫଳ ହେଉଥିବା ନେଇ ପ୍ରତିଦିନ ଟୁଇଟ୍ କରାଯାଉଛି। ପ୍ରତିଦିନ ନିଜର ଦକ୍ଷତାକୁ ନେଇ ବିଏମ୍ସି ଡିଣ୍ଡିମ ପିଟୁଥିବାବେଳେ ବାସ୍ତବ ଚିତ୍ର କିନ୍ତୁ ଭିନ୍ନ। ଏବେ ବି ବିଭିନ୍ନ ସ୍ଥାନରେ ଡଷ୍ଟବିନ୍ ରହିଥିବା ବେଳେ ସେଠାରେ ଅଳିଆ ଭର୍ତ୍ତିହୋଇ ରହୁଛି। ଓ୍ବାର୍ଡ ନଂ ୩୬ ଅନ୍ତର୍ଗତ ଭୌମନଗର ୟୁନିଟ-୪ ମାର୍କେଟ ରାସ୍ତାରେ ଏଭଳି ଦୃଶ୍ୟ ପ୍ରତିଦିନ ଦେଖିବାକୁ ମିଳୁଛି। ଡଷ୍ଟବିନ୍ରେ ଅଳିଆ ଭର୍ତ୍ତି ହେବା ସହ ଏହାର ଆଖପାଖ ରାସ୍ତା କଡ଼ରେ ଆବର୍ଜନା ଗଦା କରାଯାଉଛି। ସବୁଠାରୁ ଆଶ୍ଚର୍ଯ୍ୟର କଥା ଖୋଦ୍ ବିଏମ୍ସିର ସଫେଇ କର୍ମଚାରୀମାନେ ଏହାକୁ ଗଦା କରୁଛନ୍ତି। ଅଳିଆ ଗାଡ଼ି ଆସି ସେଠାରୁ ଅଳିଆ ନେବା ପରେ ପୁଣି ଥରେ ସେହିଠାରେ ଅଳିଆ ଜମା କରାଯାଉଛି। ପୁରୁଣା ଏଜି କଲୋନୀର ପ୍ରବେଶ ରାସ୍ତା ହୋଇଥିବାରୁ ରାତି ପାହିଲେ ଲୋକଙ୍କ ଯାତାୟାତ ଆରମ୍ଭ ହେଉଛି। ସେହିପରି ପାଖରେ ଇଲେକ୍ଟ୍ରି ଅଫିସ ଥିବାରୁ ପ୍ରତିଦିନ ଆଖପାଖର ଲୋକମାନେ ବିଲ୍ ପଇଠ କରିବାକୁ ସେହି ଅଞ୍ଚଳକୁ ଯାଉଛନ୍ତି। ଏଭଳି ଏକ ମୁଖ୍ୟ ରାସ୍ତାରେ ପରିମଳ ବ୍ୟବସ୍ଥା ଦୁର୍ବିସହ ହୋଇ ପଡିଥିବାବେଳେ ବିଏମ୍ସି କର୍ତ୍ତୃପକ୍ଷ ଆଖି ବୁଜି ଦେଇଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଛି। ଅପରପକ୍ଷେ ଅଳିଆ ପକାଇବା ପାଇଁ ଆଉ ଜାଗା କୋଉଠୁ ଆଣିବୁ ବୋଲି ସମ୍ପୃକ୍ତ ଓ୍ବାର୍ଡ ଅଫିସର କହିଛନ୍ତି। ସବୁବେଳେ ସେଇଠି ଅଳିଆ ପଡୁଛି, ତେଣୁ ପିଲାମାନେ ସେଠାରେ ଅଳିଆ ପକାଉଛନ୍ତି ବୋଲି ସେ କହିଛନ୍ତି।