ଦୁବାଇ,୨୨।୧୦(ପି.ଟି.): ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ତାରକା ଅଲରାଉଣ୍ଡର ଡ୍ବେନ ବ୍ରାଭୋ ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରୁ ବାଦ୍ ପଡିଛନ୍ତି। ଗ୍ରୋନ୍ ଇଞ୍ଜୁରି କାରଣରୁ ସେ ଆଇପିଏଲ୍ର ଆଗାମୀ ମ୍ୟାଚ୍ଗୁଡିକ ଖେଳିପାରିବେ ନାହିଁ। ଫଳରେ ଟୁର୍ନାମେଣ୍ଟରେ ଏଥର ପ୍ଲେ- ଅଫ୍ ଆଶା ଉଜ୍ଜୀବିତ ରଖିବା ପାଇଁ ସଂଘର୍ଷ କରୁଥିବା ଚେନ୍ନାଇକୁ ଶକ୍ତ ଧକ୍କା ଲାଗିଛି। ୩୭ ବର୍ଷୀୟ ବ୍ରାଭୋ ଦୀର୍ଘ ବର୍ଷଧରି ଚେନ୍ନାଇ ତରଫରୁ ଖେଳି ଆସୁଥିଲେ। ଗତ ୧୭ ତାରିଖରେ ଶାରଜାରେ ଅନୁଷ୍ଠିତ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ରେ ସେ ଇଞ୍ଜୁରି କାରଣରୁ ଅନ୍ତିମ ଓଭର ବୋଲିଂ କରିପାରି ନ ଥିଲେ। ଫଳରେ ଅଧିନାୟକ ମହେନ୍ଦ୍ର ସିଂ ଧୋନୀ ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କୁ ଅନ୍ତିମ ଓଭର ବୋଲିଂ କରିବାକୁ ଦେଇଥିଲେ ଓ ତାଙ୍କୁ ଅକ୍ଷର ପଟେଲ ୩ଟି ଛକା ମାରିଥିଲେ।
ଗ୍ରୋନ ଇଞ୍ଜୁରି କାରଣରୁ ବ୍ରାଭୋ ଆଇପିଏଲ୍ରୁ ବାଦ୍ ପଡିଛନ୍ତି ବୋଲି ସିଏସ୍କେ ମୁଖ୍ୟ କାର୍ଯ୍ୟନିର୍ବାହୀ କାଶୀ ବିଶ୍ୱନାଥନ କହିଛନ୍ତି। ୬ଟି ମ୍ୟାଚ୍ ଖେଳି ବ୍ରାଭୋ ୨ଟି ଇନିଂସରେ ମାତ୍ର ୭ ରନ ସଂଗ୍ରହ କରିଛନ୍ତି। ତେବେ ଭଲ ବୋଲିଂ କରି ସେ ୮.୫୭ ରନ ହାରରେ ୬ଟି ଉଇକେଟ ହାସଲ କରିଛନ୍ତି। ଚେନ୍ନାଇ ୧୦ଟି ମ୍ୟାଚ୍ ଖେଳି ୭ଟି ପରାଜୟ ବରଣ କରିଛି। ମାତ୍ର ୩ଟି ବିଜୟ ସହ ୬ ପଏଣ୍ଟ ହାସଲ କରି ଚେନ୍ନାଇ ତାଲିକାର ସର୍ବନିମ୍ନ ସ୍ଥାନରେ ରହିଛି। ସୁରେଶ ରାଇନା, ହରଭଜନ ସିଂଙ୍କ ଭଳି ଅଭିଜ୍ଞ ଖେଳାଳି ବ୍ୟକ୍ତିଗତ କାରଣ ଦର୍ଶାଇ ଆଇପିଏଲ୍ରୁ ଓହରିଯିବା ଫଳରେ ଚେନ୍ନାଇର ପ୍ରଦର୍ଶନ ଏଥର ସାଂଘାତିକ ଭାବେ ପ୍ରଭାବିତ ହୋଇଛି। ଧୋନୀ ଓ କେଦାର ଯାଦବଙ୍କ ଭଳି ଖେଳାଳିଙ୍କ ଦୁର୍ବଳ ଫର୍ମ ଦଳ ପାଇଁ ମହଙ୍ଗା ସାବ୍ୟସ୍ତ ହୋଇଛି।
