ମୁମ୍ବାଇ,୧୪।୯: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଅକ୍ଟୋବର ୧୭ ତାରିଖରେ ଦୁଇ ନୂଆ ଆଇପିଏଲ ଦଳ ଲାଗି ବିଡିଂ ପ୍ରକ୍ରିୟା ଆୟୋଜନ କରାଯିବ। ତେବେ ଏହା ଏକ ଇ-ବିଡିଂ ହେବ ବୋଲି ବିସିସିଆଇ ସୂତ୍ରରୁ ଜଣାପଡ଼ିଛି। ଗତ ଅଗଷ୍ଟ ୩୧ ତାରିଖରେ ଆଇପିଏଲର ନୂଆ ଫ୍ରାଞ୍ଚାଇଜ କିଣିବାକୁ ଇଚ୍ଛୁକ ଥିବା ପାର୍ଟିଙ୍କ ଲାଗି ଟେଣ୍ଡର ଆମନ୍ତ୍ରଣ କରିଛି ବିସିସିଆଇ। ଏହି ଟେଣ୍ଡର ତଥା ଆଇଟିଟି ଅକ୍ଟୋବର ୫ ତାରିଖ ପର୍ଯ୍ୟନ୍ତ ଉପଲବ୍ଧ ରହିବ।
”ଆଇପିଏଲର ୨୦୨୨ ସିଜନରେ ଭାଗ ନେବାକୁ ଥିବା ପ୍ରସ୍ତାବିତ ଦୁଇଟି ନୂଆ ଦଳର ମାଲିକାନା ଅଧିକାର ନିଲାମ ପାଇଁ ଏକ ଟେଣ୍ଡର ଦ୍ୱାରା ଆଇପିଏଲର ଗଭର୍ନିଂ କମିଟି ଆମନ୍ତ୍ରଣ କରିଛି। ଇଚ୍ଛୁକ ପାର୍ଟିଙ୍କୁ ବିଡ୍ ଦାଖଲ କରିବା ଲାଗି ଆଇଟିଟି କିଣିବା ଦରକାର। ତେବେ କେବଳ ଆଇଟିଟିରେ ଧାର୍ଯ୍ୟ ମାନଦଣ୍ଡକୁ ପୂରଣ କରୁଥିବା ପାର୍ଟିମାନେ ନିଲାମ ପ୍ରକ୍ରିୟାରେ ଭାଗ ନେଇପାରିବେ“ ବୋଲି ବିସିସିଆଇ ପକ୍ଷରୁ ଏକ ବିବୃତିରେ କୁହାଯାଇଛି।
