ଭୁବନେଶ୍ୱର, ୨୪ା୧୧(ବ୍ୟୁରୋ): ବିନା ଦଲିଲରେ ଯାତାୟାତ କରୁଥିବା ଯାନକୁ ଧରିବ ଇ-ଡିଟେକ୍ଶନ(ଚିହ୍ନଟ)। ପରିବହନ ବିଭାଗ ପକ୍ଷରୁ ଏ ନେଇ ଏକ ଇ-ଚିହ୍ନଟ ପୋର୍ଟାଲ ପ୍ରସ୍ତୁତ କରାଯାଇଛି। ୨୦୨୩ ଜାନୁୟାରୀ ପହିଲାରୁ ଜାତୀୟ ରାଜପଥରେ ଇ-ଚିହ୍ନଟ ଆରମ୍ଭ ହେବ।
ସର୍ବସାଧାରଣ ରାସ୍ତାରେ ଯିବା ପାଇଁ ଯାନବାହନଗୁଡ଼ିକର ପଞ୍ଜୀକରଣ ପ୍ରମାଣପତ୍ର, ଫିଟ୍ନେସ ସାର୍ଟିଫିକେଟ୍ ଏବଂ ଅନୁମତି ଭଳି ବୈଧ ଦଲିଲ ରହିବା ବାଧ୍ୟତାମୂଳକ । ଯଦି ଏହା ଏକ ପରିବହନ ଯାନ ହୋଇଥିବ ତେବେ ବୀମା ଏବଂ ପଲ୍ୟୁଶନ ସାର୍ଟିଫିକେଟ୍ ଏବଂ ଡ୍ରାଇଭିଂ ଲାଇସେନ୍ସ ସମସ୍ତ ଡ୍ରାଇଭରଙ୍କ ପାଇଁ ବାଧ୍ୟତାମୂଳକ କରାଯାଇଛି। ଜାତୀୟ ରାଜପଥରେ ଥିବା ଟୋଲ୍ ଗେଟ୍ରୁ ସଂଗୃହୀତ ତଥ୍ୟ ଅନୁଯାୟୀ, ବୈଧ ଦଲିଲ ବିନା ବହୁ ସଂଖ୍ୟକ ଯାନବାହନ ଚଳାଚଳ କରୁଛି । ଏହାକୁ ଦୃଷ୍ଟିରେ ରଖି ଓଡ଼ିଶାର ଜାତୀୟ ରାଜପଥ ଏବଂ ରାଜ୍ୟ ରାଜପଥ ଦେଇ ଯାଉଥିବା ଏଭଳି ଯାନଗୁଡ଼ିକୁ ଚିହ୍ନଟ କରିବା ପାଇଁ ପରିବହନ ବିଭାଗ ଏକ ଇ-ଚିହ୍ନଟ ପୋର୍ଟାଲ ପ୍ରସ୍ତୁତ କରୁଛି ।
ଏ ସମ୍ପର୍କରେ ପରିବହନ ବିଭାଗର ଯୁଗ୍ମ କମିଶନର (ଟେକ୍ନିକାଲ୍) ଦୀପ୍ତିରଞ୍ଜନ ପାତ୍ର କହିଛନ୍ତି, ପୋର୍ଟାଲ ଏଭଳି ଯାନଗୁଡ଼ିକୁ ନିରବଚ୍ଛିନ୍ନ ଭାବରେ ଯାଞ୍ଚ କରିବ। ଜାତୀୟ ରାଜପଥରେ ଥିବା ବିଭିନ୍ନ ଟୋଲ୍ ଫାଟକରୁ ତଥ୍ୟ ସଂଗ୍ରହ କରିବା ପୋର୍ଟାଲର ଉଦ୍ଦେଶ୍ୟ। ପ୍ରଥମ ପର୍ଯ୍ୟାୟରେ ଏନ୍ଏଚ୍ଏଆଇର ଟୋଲ୍ଗେଟ୍ଗୁଡ଼ିକ ପୋର୍ଟାଲ୍ ସହିତ ସଂଯୋଗ କରାଯାଇଛି। ପରବର୍ତ୍ତୀ ସମୟରେ ଖଣି ଏବଂ ଶିଳ୍ପ କ୍ଷେତ୍ରରୁ ମଧ୍ୟ ତଥ୍ୟ ସଂଗ୍ରହ କରାଯିବ। ବୈଧ କାଗଜପତ୍ର ବିନା ଚାଲୁଥିବା ଯାନଗୁଡ଼ିକ ପାଇଁ ସ୍ବୟଂଚାଳିତ ଭାବରେ ଚାଲାଣ ସୃଷ୍ଟି ହେବ।
ଫାସ୍ଟ୍ୟାଗ ମାଧ୍ୟମରେ ଅଣାଯାଇଥିବା ତଥ୍ୟ ଏବଂ ଏକ ଗାଡ଼ି ଟୋଲ୍ ଗେଟ୍ ଦେଇ ଯିବାବେଳେ କଏଦ ହୋଇଥିବା ଚିତ୍ର ଅନୁଯାୟୀ ତଥ୍ୟ ସଂଗ୍ରହ କରାଯିବ ଓ ତୁରନ୍ତ ସୂଚନା ଗାଡ଼ି ମାଲିକମାନଙ୍କୁ ସଚେତନ କରିବ। ସଡ଼କ ଦୁର୍ଘଟଣା ଏବଂ ମୃତ୍ୟୁ ହାର ହ୍ରାସ କରିବାରେ ଏହା ସାହାଯ୍ୟ କରିବ।