ନୂଆଦିଲ୍ଲୀ: କିଛି ଲୋକ ପ୍ରେମରେ ପ୍ରତାରଣାକୁ ସହଜ ଭାବେ ଗ୍ରହଣ କରି ପାରନ୍ତି ନାହିଁ। ସେମାତେ ହତାଶ ହୋଇପଡ଼ନ୍ତି। ନଚେତ କିଛି ଅବିଶ୍ୱାସନୀୟ ପଦକ୍ଷେପ ନେଇଯାଇଥାନ୍ତି। କିନ୍ତୁ ଚାଇନାରୁ ପ୍ରେମ ଆଉ ପ୍ରତାରଣାର ଏକ ଅଜବ ଘଟଣା ସାମ୍ନାକୁ ଆସିଛି। ଏଠାରେ ଜଣେ ଝିଅ ନିଜ ପ୍ରେମିକଙ୍କୁ ପ୍ରତାରଣାର ଜବାବ ଦେବାକୁ ଯାଇ ଏପରି କିଛି କରିଥିଲେ ଯାହାକୁ ଜାଣି ପୋଲିସ ମଧ୍ୟ ଆଶ୍ଚର୍ଯ୍ୟ ହୋଇଛି।
ଯୁବତୀଙ୍କ ନାମ ଲୁ। ତାଙ୍କ ପ୍ରେମିକ ଆଉ ଜଣେ ଯୁବତୀଙ୍କୁ ଡେଟ୍ କରୁଥିବା ନେଇ ସେ ଜାଣିବାକୁ ପାଇଥିଲେ। ଏଥିରେ ସେ ରାଗିଯାଇ ତାଙ୍କୁ ଉଚିତ ଶିକ୍ଷା ଦେବାକୁ ଚାହିଁଥିଲେ। ଏଥିପାଇଁ ସେ କରିଥିଲେ ଯୋଜନା। ଉକ୍ତ ଯୋଜନାରେ ଅନ୍ୟ ଜଣେ ବ୍ୟକ୍ତି ‘ଜୁ’ଙ୍କୁ ସାମିଲ କରିଥିଲେ। ପୂର୍ବ ପ୍ରେମିକ କିଆନଙ୍କ କାର୍କୁ ଯଦି ୨ ଦିନ ପାଇଁ ସେ ଭଡ଼ାରେ ଆଣିପାରିବେ ତେବେ ସେ ତାଙ୍କ ସହ ଡେଟ୍ରେ ଯିବେ ବୋଲି ଲୁ କହିଥିଲେ। ଜୁ ସେହିଭଳି କରି କାର୍ ଭଡ଼ାରେ ଆଣିଥିଲେ। ଏହାପରେ ରାଗରେ ଥିବା ଲୁ ସେହି କାର୍କୁ ଡ୍ରାଇଭ୍ ପାଇଁ ନେଇଥିଲେ।
ଚାଇନାରେ ଟ୍ରାଫିକ ନିୟମ ପାଳନ ନ କଲେ ମୋଟା ଅଙ୍କର ଜରିମାନା ଆଦାୟ କରାଯାଏ। ଏହା ଲୁ ଭଲଭାବେ ଜାଣିଥିଲେ। ସେ ଦୁଇ ଦିନରେ କାର୍ରେ ଏକ ଲମ୍ବା ଯାତ୍ରାରେ ବାହାରିଥିଲେ। ଏହି ସମୟରେ ସେ ଥରେ କିମ୍ବା ଦୁଇଥର ନୁହେଁ ବରଂ ୫୦ଥର ଟ୍ରାଫିକ୍ ନିୟମ ଉଲ୍ଲଂଘନ କରିଥିଲେ। ପରେ କିଆନଙ୍କ ନିକଟରେ ଜରିମାନାର ବିଲ୍ ପହଞ୍ଚିଥିଲା। ବିଲ୍ ଦେଖି ସେ ଚମକି ପଡ଼ିଥିଲେ। ଶେଷରେ ଘଟଣା ସାମ୍ନାକୁ ଆସିଥିଲା। ପୂର୍ବ ପ୍ରେମିକ ଜରିମାନା କିଭଳି ଦେବେ ସେଥିନିମନ୍ତେ ଲୁ ଯୋଜନା କରିଥିବା ସ୍ପଷ୍ଟ ହୋଇଥିଲା। ପ୍ରେମିକଙ୍କ ପ୍ରତାରଣାର ଏଭଳି ଉପାୟରେ ଜବାବ ଦେବା ଘଟଣା ଚର୍ଚ୍ଚାର ବିଷୟ ପାଲଟିଛି।
