ଉନ୍ନତ ଚିକିତ୍ସା ପ୍ରଣାଳୀ ଓ ନିରବଚ୍ଛିନ୍ନ ସେବା ସହିତ ରୋଗୀଙ୍କୁ ଆଦର ଦ୍ୱାରା କର୍କଟ ଭଳି ଅସାଧ୍ୟ ରୋଗର ଉପଶମ ସମ୍ଭବ ହେଉଛି। ରୋଗୀଙ୍କୁ ସୁସ୍ଥ କରିବା ପାଇଁ ଗୋଟିଏ ଛାତ ତଳେ ଚିକିତ୍ସା, ନିରୂପଣ ଓ ସଚେତନତା ଯୋଗାଇଦେଇଥାଏ ଏଚ୍ସିଜି ପଣ୍ଡା କ୍ୟାନ୍ସର ହସ୍ପିଟାଲ। ନିଜ ବୃତ୍ତିଗତ ଜୀବନ ଓ କ୍ୟାନ୍ସର ରୋଗର ଚିକିତ୍ସା ସମ୍ପର୍କରେ ଧରିତ୍ରୀକୁ ସାକ୍ଷାତ୍କାର ବେଳେ ଅନେକ ଗୁରୁତ୍ୱପୂର୍ଣ୍ଣ କଥା କହିଛନ୍ତି ହସ୍ପିଟାଲର ନିର୍ଦ୍ଦେଶକ ତଥା କର୍କଟ ବିଶେଷଜ୍ଞ ପ୍ରଫେସର ଡାକ୍ତର କୃପାସିନ୍ଧୁ ପଣ୍ଡା।
ନିପଟ ଗ୍ରାମାଞ୍ଚଳର ଏକ ମଧ୍ୟବିତ୍ତ ପରିବାରରେ ଜନ୍ମ ହୋଇ ବି କିଭଳି ଡାକ୍ତରୀ ଶିକ୍ଷା ସୁବିଧା ପାଇଥିଲେ?
ପିଲାବେଳୁ ସମାଜସେବା ପ୍ରତି ମୋର ମନ ଥିଲା। ରେଭେନ୍ଶାରୁ ବିଜ୍ଞାନ ପାସ୍ କରିବା ପରେ ଡାକ୍ତରୀ ଶିକ୍ଷା ପାଇଁ ସ୍ଥିର କରିଥିଲି। ସେ ସମୟରେ ମାର୍କ ବେସିସ୍ରେ ସିଲେକ୍ସନ ହେଉଥିଲା ଏବଂ ଭଲ ମାର୍କ ରଖିଥିବାରୁ ୧୯୬୪ରେ ଶ୍ରୀରାମ ଚନ୍ଦ୍ର ଭଞ୍ଜ ମେଡିକାଲ କଲେଜରେ ପଢ଼ିବାର ସୁଯୋଗ ମିଳିଥିଲା। ଶଲ୍ୟ ଚିକିତ୍ସାରେ ସମ୍ମାନର ସହ ଉତ୍ତୀର୍ଣ୍ଣ ହୋଇଥିଲି।
ଆପଣଙ୍କ ବୃତ୍ତିଗତ ଜୀବନ କିଭଳି ଥିଲା?
ସୁଦୂର ଫୁଲବାଣୀରେ ଟିବି ଡାକ୍ତର ଭାବରେ ବୃତ୍ତିଗତ ଜୀବନ ଆରମ୍ଭ ହୋଇଥିଲା। ପରେ ବଦଳି ହୋଇ ଏସ୍ସିବି ମେଡିକାଲ୍ କଲେଜର ଆନାଟୋମି ଶିକ୍ଷକ ଭାବରେ ଯୋଗଦେଇଥିଲି। ଶଲ୍ୟ ଚିକିତ୍ସାରେ ସ୍ନାତକୋତ୍ତର ପାସ୍ କରିବା ପରେ ୧୯୬୯ ମସିହାରେ କ୍ୟାନ୍ସର ବିଶେଷଜ୍ଞ ଭାବରେ କର୍ମଜୀବନ ଆରମ୍ଭ କଲି। ପରବର୍ତ୍ତୀ ସମୟରେ ଟାଟା ମେମୋରିଆଲ୍ କଲେଜରେ କର୍କଟ ପ୍ରଶିକ୍ଷଣ ନେଲି ଏବଂ ବିଭିନ୍ନ ଜାତୀୟ ତଥା ଅନ୍ତର୍ଜାତୀୟ ସମ୍ମିଳନୀରେ ଯୋଗଦେଇ ବିଶେଷ ଜ୍ଞାନ ଆହରଣର ସୁଯୋଗ ମିଳିଥିଲା। ରିସର୍ଚ୍ଚ କାମ ପାଇଁ ଆମେରିକାରୁ ଫେଲୋଶିପ୍ ପାଇ ନ୍ୟୁୟର୍କସ୍ଥିତ ପ୍ରଥମ କ୍ୟାନ୍ସର ହସ୍ପିଟାଲ୍ରେ ଯୋଗଦେଇ ପାରଦର୍ଶିତା ଲାଭ କରିଥିଲି।
ପଣ୍ଡା କ୍ୟାନ୍ସର ହସ୍ପିଟାଲ କିପରି ପ୍ରତିଷ୍ଠା ହେଲା?
କର୍କଟ ରୋଗୀମାନଙ୍କୁ ନିରନ୍ତର ସେବା ଯୋଗାଇଦେବା ଲକ୍ଷ୍ୟରେ ୧୯୯୬ରେ ସରକାରୀ ଚାକିରି ଛାଡ଼ି କଟକ କେଶରପୁରରେ ପଣ୍ଡା କ୍ୟାନ୍ସର ହସ୍ପିଟାଲ୍ ଆରମ୍ଭ କରିଥିଲି। ଏଠାରୁ ମିଳୁଥିବା ଚିକିତ୍ସା ଓ ସେବା ଦ୍ୱାରା ହସ୍ପିଟାଲ ପ୍ରତି କ୍ରମଶଃ ଲୋକଙ୍କର ଆସ୍ଥା ଓ ବିଶ୍ୱାସ ବଢ଼ିଥିଲା। ତେଣୁ ୨୦୦୦ ମସିହାରେ କଟକର ତେଲେଙ୍ଗାପେଣ୍ଠରେ ଏକ ବଡ଼ ତଥା ଉନ୍ନତ ହସ୍ପିଟାଲ୍ ଆରମ୍ଭ ହୋଇଥିଲା। ଏହାପରେ ୨୦୦୫ରେ ଏଚ୍ସିଜି ଗ୍ରୁପ୍ ଜାତୀୟ ସ୍ତରରେ ବେଙ୍ଗାଲୁରୁସ୍ଥିତ କର୍କଟ ଚିକିତ୍ସା ସଂସ୍ଥା ସହ ଅନୁବନ୍ଧିତ ହେଲା।
ରାଜ୍ୟରେ କର୍କଟ ରୋଗର ସ୍ଥିତି କ’ଣ ରହିଛି?
ଓଡ଼ିଶାରେ ମୁଖ୍ୟତଃ ମୁଖଗହ୍ବର, ସ୍ତନ ଓ ସର୍ଭାଇକାଲ୍ କର୍କଟ ରୋଗୀ ଚିହ୍ନଟ ହେଉଛନ୍ତି। ଏହି ପ୍ରକାରର କର୍କଟ ରୋଗୀ ରାଜ୍ୟରେ ୫ ଲକ୍ଷରୁ ଅଧିକ ଥିବା ଆକଳନ କରାଯାଉଛି। ଗ୍ରାମାଞ୍ଚଳର ୪୧% ଓ ସହରାଞ୍ଚଳର ୨୬% ଲୋକ ଗୁଟ୍ଖା, ଖଇନି, ପାନ ମସଲା ସେବନ କରୁଥିବାରୁ କର୍କଟର ଭୟାବହତା ବଢୁଛି।
କର୍କଟ ରୋକିବା ପାଇଁ କି ପଦକ୍ଷେପ ନେବା ଆବଶ୍ୟକ?
ଯୁବବର୍ଗ ନିକୋଟିନ୍ ଜାତୀୟ ସାମଗ୍ରୀ ବ୍ୟବହାର କରୁଛନ୍ତି। ମହିଳାମାନେ କର୍କଟ ସଚେତନତାର ଅଭାବ ଓ ଲଜ୍ଜା ଯୋଗୁ ଡାକ୍ତରଙ୍କ ପରାମର୍ଶ ନ କରିବା ହେତୁ ସମସ୍ୟା ବଢ଼ିଚାଲିଛି। ସରକାରଙ୍କ ପକ୍ଷରୁ ଗୁଟ୍ଖା, ତମାଖୁ, ପାନମସଲା, ସିଗାରେଟ୍ ଭଳି ନିକୋଟିନ୍ ଜାତୀୟ ପଦାର୍ଥର ବ୍ୟବହାର, ବିପଣନ ଓ ପ୍ରସ୍ତୁତି ଉପରେ ନିଷେଧାଦେଶ ଜାରି କରାଯାଇଥିଲେ ମଧ୍ୟ ଏହାକୁ କଡ଼ାକଡ଼ି ଭାବେ ପାଳନ କରାଯାଉନାହିଁ। ସରକାରୀ ଓ ବେସରକାରୀ ସ୍ତରରେ କର୍କଟ ସଚେତନତା ଆନ୍ଦୋଳନକୁ ଜୋର୍ଦାର କରାଯିବା ଆବଶ୍ୟକତା ରହିଛି।
ରାଜ୍ୟବାସୀଙ୍କୁ କି ପରାମର୍ଶ ଦେବେ?
ମୁଖ୍ୟତଃ କର୍କଟ ସୃଷ୍ଟିକାରୀ ସାମଗ୍ରୀର ବ୍ୟବହାରକୁ ନିଷେଧ କିମ୍ବା କମ୍ କରନ୍ତୁ। ପନିପରିବା ଓ ଖାଦ୍ୟଶସ୍ୟ ଉତ୍ପାଦନରେ ମାତ୍ରାଧିକ ସାର ତଥା କୀଟନାଶକର ପ୍ରୟୋଗ କ୍ଷତିକାରକ ହୋଇଥାଏ। ବର୍ତ୍ତମାନ ହରମୋନ୍ର ପ୍ରୟୋଗ ମଧ୍ୟ କର୍କଟର ଅନ୍ୟ ଏକ କାରଣ ସାଜିଛି। ତେଣୁ ଜୀବନଶୈଳୀରେ ପରିବର୍ତ୍ତନ ସହ ଅତ୍ୟାଧୁନିକ ଫାଷ୍ଟଫୁଡ୍ ଓ ରଙ୍ଗଦିଆ ଖାଦ୍ୟର ବହୁଳ ପ୍ରଚଳନଠାରୁ ଦୂରରେ ରହିଲେ ଆମେ କ୍ୟାନ୍ସରକୁ ହରାଇପାରିବା।
କର୍କଟ ରୋଗୀଙ୍କୁ କି ଉପଦେଶ ଦେବେ?
କର୍କଟ ରୋଗ ପ୍ରାଥମିକ ସ୍ତରରେ ଚିହ୍ନଟ ହୋଇପାରିଲେ ଏହାର ନିରାକରଣ ସମ୍ଭବ। ଏଥିପାଇଁ ଶଲ୍ୟ, ଭେଷଜ ଏବଂ ବିକିରଣ ଚିକିତ୍ସା ଯଥାବିଧି କରାଯିବା ଉଚିତ। ରୋଗୀଙ୍କ ପାଇଁ ରହିବା, ଖାଇବା ବ୍ୟବସ୍ଥା ସହ ସେମାନଙ୍କ ସେବା କରିବା ଜରୁରୀ। ଆନନ୍ଦଦାୟକ ପରିବେଶ ଓ ଦୃଢ଼ ମନୋବଳ ରୋଗର ଚିକିତ୍ସାକୁ ଅଧିକ ପ୍ରଭାବୀ କରାଇଥାଏ। ତେଣୁ ପରିବାର ଲୋକେ ସେମାନଙ୍କୁ ଖୁସି ରଖିବାକୁ ଚେଷ୍ଟା କରିବା ସହିତ ଜୀବନ ଯାତ୍ରାରେ ଉତ୍ସାହିତ କରିବା ଆବଶ୍ୟକ।