ଭଞ୍ଜନଗର,୩ା୩(ଡି.ଏନ.ଏ) ରୋଗରେ ପଡ଼ି ମା’ ଚାଲିଗଲା ପରେ ଦୁଇ ଝିଅ ଓ ଗୋଟିଏ ପୁଅକୁ ବାପା ଠିକ୍ ଭାବେ ପଚାରିଲେନି। ମା’ ଛେଉଣ୍ଡ ଏହି ପିଲାମାନେ ଏବେ ଆଈଙ୍କ ପାଖରେ ଅଛନ୍ତି। ଆଈ ଜାଳେଣି କାଠ ବିକି ପରିବାର ଚଳାଉଛନ୍ତି। ଏଭଳି ସ୍ଥିତିରେ ତାଙ୍କ ବଡ଼ ନାତୁଣିକୁ ମଧ୍ୟ ଉଉଣୀ ଭାଇ ଓ ଆଈଙ୍କ ପେଟ ପୋଷିବା ଚିନ୍ତା ଘାରିଛି। ଭଞ୍ଜନଗର ବ୍ଲକ ବାଉଁଶଲୁଣ୍ଡିରେ ଏଭଳି ଘଟଣା ଦେଖିବାକୁ ମିଳିଛି।
ଜଗନ୍ନାଥପ୍ରସାଦ ବ୍ଲକ ନିମପଦରର ଲକ୍ଷ୍ମୀ ନାୟକଙ୍କ କୌଣସି ଏକ ରୋଗରେ ବର୍ଷକ ତଳେ ମୃତ୍ୟୁ ଘଟିଛି। ୩ ପିଲାଙ୍କୁ ବାପା ଠିକ୍ ଭାବେ ପଚାରି ନ ଥିଲେ। ତେଣୁ ଲକ୍ଷ୍ମୀଙ୍କ ମା’ ଭଞ୍ଜନଗର ବ୍ଲକ ବାଉଁଶଲୁଣ୍ଡିର ପଙ୍କଜ ନାଇକ ନାତି ନାତୁଣିଙ୍କୁ ଘରକୁ ନେଇ ଆସିଥିଲେ। ବିଧବା ପଙ୍କଜ ଜାଳେଣି କାଠ ବିକି ଏବେ ପରିବାର ଚଳାଇବା ସହ ନାତି ନାତୁଣୀଙ୍କ କଥା ମଧ୍ୟ ବୁଝୁଛନ୍ତି । ଆଈଙ୍କୁ ଆର୍ଥିକ କ୍ଷେତ୍ରରେ ସାହାର୍ଯ୍ୟ କରିବା ପାଇଁ ତୃତୀୟ ଶ୍ରେଣୀରେ ପଢ଼ୁଥିବା ବଡ଼ନାତୁଣି ନନ୍ଦିନୀ ମଝିରେ ମଝିରେ ଜଙ୍ଗଲକୁ କାଠ ପାଇଁ ଯାଉଛନ୍ତି। ନନ୍ଦିନୀ କାଠ ମୁଣ୍ଡାଇ ଭଞ୍ଜନଗର-ଆସିକା ଜାତୀୟ ରାଜପଥରେ ଆସୁଥିବା ବେଳେ ଜଣେ ସାମାଜିକ କର୍ମୀ ତାଙ୍କ ଫଟୋ ଉଠାଇ ସେ ଫେସ୍ବୁକ୍ରେ ସେୟାର କରିଥିଲେ। ଏହି ଫଟୋ ଭାଇରାଲ ସହ ବିଭିନ୍ନ ମନ୍ତବ୍ୟ ଆସିଥିଲା। ଏ ନେଇ ନନ୍ଦିନୀଙ୍କ ଆଈ ପଙ୍କଜଙ୍କୁ ପଚାରିବାରେ ସେ କହିଛନ୍ତି, ଝିଅ ମୃତ୍ୟୁ ପରେ ଜ୍ୱାଇଁ ପିଲାମାନଙ୍କୁ ନ ପଚରିବାରୁ ସେମାନଙ୍କୁ ଆଣି ଘରେ ରଖିଛି। ଗତ ମାସରେ ଝିଅର ଶ୍ରାଦ୍ଧ ପାଇଁ ତାଙ୍କ ଘରକୁ ଯାଇ ସମସ୍ତ କାମ କରି ପୁଣି ନାତି ନାତୁଣିକୁ ଧରି ଗାଁକୁ ଆସିଲି। ଜଙ୍ଗଲକୁ କାଠ ପାଇଁ ଯିବାବେଳେ ଘରେ ନାତି ନାତୁଣିକୁ ଛାଡ଼ି ଯାଉଛି । ବଡ଼ ନାତୁଣି ବେଳେ ବେଳ ଜଙ୍ଗଲକୁ ଯାଇ କାଠ ଆଣୁଛି । ବିଧବା ଭତ୍ତା ଓ ଅନ୍ୟ ସରକାରୀ ସୁବିଧା ପାଉଥିଲେ ବି ତାହା ଅଣ୍ଟୁନି ବୋଲି ପଙ୍କଜ କହିଛନ୍ତି।