ଆଙ୍କରା/ୟେରେଭାନ,୧୨।୨ : ସମ୍ପ୍ରତି ତୁର୍କୀ ଭୟଙ୍କର ଭୂକମ୍ପ ଯୋଗୁଁ ଘଟିଥିବା ବିନାଶ ଦେଇ ଗତି କରୁଛି। ଗତ ସୋମବାର ଏଠାରେ ହୋଇଥିବା ଭୂକମ୍ପରେ ଏପର୍ଯ୍ୟନ୍ତ ୨୮ ହଜାରରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ବହୁ ସହର ଧ୍ୱଂସ ହୋଇଯାଇଛି । ଉଦ୍ଧାର କାର୍ଯ୍ୟ ଚାଲିଛି।
ତୁର୍କୀ ସହିତ ଅନେକ ଦେଶର ଶତ୍ରୁତାରେ ଏବେ ନୂଆ ବନ୍ଧୁତାର ଅଧ୍ୟାୟ ଆରମ୍ଭ ହୋଇଛି। ଭୂକମ୍ପ ଯୋଗୁ ଏହା ସମ୍ଭବ ହୋଇ ପାରିଛି। ଅନେକ ଦେଶ ଅଛନ୍ତି ଯେଉଁମାନଙ୍କୀ ତୁର୍କୀ ସହିତ ଭଲ ସମ୍ପର୍କ ନ ଥିଲା। ତେବେ ମଧ୍ୟ ମାନବିକ ସହାୟତା ପାଇଁ ସେମାନେ ସାହାଯ୍ୟର ହାତ ବଢ଼ାଇଛନ୍ତି।
ଆର୍ମେନିଆ ମଧ୍ୟ ଏହିପରି ଦେଶମାନଙ୍କ ମଧ୍ୟରୁ ଅନ୍ୟତମ। ଭୂକମ୍ପ ସହାୟତା ଯୋଗୁ ଆର୍ମେନିଆ ଏବଂ ତୁର୍କୀ ମଧ୍ୟରେ ଥିବା ସୀମା ଫାଟକ ପ୍ରାୟ ୩୦ ବର୍ଷ ପରେ ଖୋଲା ଯାଇଛି। ଆର୍ମେନିଆରୁ ମାନବିକ ସହାୟତା ନେଇ ଟ୍ରକ ଗୁଡ଼ିକ ଭୂକମ୍ପ ପ୍ରଭାବିତ ଅଞ୍ଚଳ ମୁହାଁ ହୋଇଛି।
ତୁର୍କୀ ନ୍ୟୁଜ ଏଜେନ୍ସି ଆନାଡୋଲୁଙ୍କ ରିପୋର୍ଟ ଅନୁଯାୟୀ, ତିନି ଦଶନ୍ଧି ମଧ୍ୟରେ ପ୍ରଥମ ଥର ପାଇଁ ଦୁଇ ଦେଶ ନିଜର ସୀମା ଖୋଲିଛନ୍ତି।
ତୁର୍କୀର ସ୍ବତନ୍ତ୍ର ଦୂତ ସେରଦାର କିଲିକ ଟୁଇଟ କରି କହିଛନ୍ତି ଯେ ୧୦୦ ଟନ ଖାଦ୍ୟ, ପାନୀୟ,ସମେତ ମାନବିକ ସହାୟତା ନେଇ ପାଞ୍ଚଟି ଟ୍ରକ ଆଲିକନ ସୀମାରୁ ତୁର୍କୀରେ ପହଞ୍ଚିଛି। ଏହି ସମୟରେ ଆର୍ମେନିଆର ନ୍ୟାଶନାଲ ଆସେମ୍ବଲିର ଡେପୁଟି ସ୍ପିକର ରୁବେନ ରୁବିନିଆନ ମଧ୍ୟ କହିଛନ୍ତି ଯେ ମାନବିକ ସହାୟତା ଟ୍ରକ ଆର୍ମେନିଆ-ତୁର୍କୀ ସୀମା ପାର କରି ଭୂକମ୍ପ ପ୍ରଭାବିତ ଅଞ୍ଚଳକୁ ଯାଉଛନ୍ତି।
ଏକ ରିପୋର୍ଟ ଅନୁଯାୟୀ, ଆର୍ମେନିଆ ଏବଂ ତୁର୍କୀ ଆଜେରବାଇଜାନ ମଧ୍ୟରେ ହୋଇଥିବା ଜାତିଗତ ବିବାଦ ପରେ ୧୯୯୩ମସିହାରୁ ଦୁଇ ଦେଶ ମଧ୍ୟରେ ସୀମା ବନ୍ଦ ରହିଥିଲା। କୁହାଯାଇଛି ଯେ ୧୯୯୦ ଦଶକ ପରଠାରୁ ଦୁଇ ଦେଶ ମଧ୍ୟରେ ସମ୍ପର୍କ ବିଗିଡି ଯାଇଛି। ଆର୍ମେନୀୟମାନେ କହିଛନ୍ତି ଯେ ପ୍ରଥମ ବିଶ୍ୱଯୁଦ୍ଧ ସମୟରେ ଅଟୋମନ ସାମ୍ରାଜ୍ୟରେ ବହୁ ସଂଖ୍ୟକ ଲୋକଙ୍କର ମୃତ୍ୟୁ ଘଟିଥିଲା। ଆର୍ମେନିଆ ଏହାକୁ ଏକ ନରସଂହାର ବୋଲି ବିବେଚନା କରେ। କୁହାଯାଏ ଯେ ଏହି ସମୟ ମଧ୍ୟରେ ପ୍ରାୟ ତିନି ଲକ୍ଷ ଆର୍ମେନୀୟଙ୍କୁ ହତ୍ୟା କରାଯାଇଥିଲା।