ନୂଆଦିଲ୍ଲୀ/ଇସଲାମାବାଦ/କାବୁଲ,୨୨।୩ : ଭାରତ ସମେତ ୭ ଦେଶରେ ଭୂକମ୍ପ ଅନୁଭୁତ ହୋଇଛି। ଆଫଗାନିସ୍ତାନରେ ଅଧିକ ତୀବ୍ରତାଯୁକ୍ତ ଭୂକମ୍ପ ଅନୁଭୂତ ହୋଇଥିବାବେଳେ ପାକିସ୍ତାନ, ଚାଇନା ସମେତ ଅନ୍ୟ କେତେକ ଦେଶରେ ଦୀର୍ଘ ସମୟ ଧରି କମ୍ପୁଥିଲା। ପାକିସ୍ତାନରେ ଇସଲାମାବାଦ ସମେତ ପଞ୍ଜାବ, ଖାଇବର ପାସ୍ତୁନଖ୍ବା ଏବଂ ବାଲୁଚିସ୍ତାନର ବିଭିନ୍ନ ସହରରେ ପ୍ରବଳ କମ୍ପନ ଅନୁଭୂତ ହୋଇଥିଲା। ଭୂକମ୍ପ ଯୋଗୁଁ ପାକିସ୍ତାନରେ ୧୩ ଜଣଙ୍କର ମୃତ୍ୟୁ ଘଟିଥିବାବେଳେ ଓ ୨୦୦ରୁ ଅଧିକ ଜଣ ଆହତ ହୋଇଥିବା ଖବର ମିଳିଛି।
ଭାରତ, ପାକିସ୍ଥାନ, ଆଫଗାନିସ୍ତାନ, କିର୍ଗିଜସ୍ତାନ, ତାଜିକିସ୍ତାନ, ଉଜବେକିସ୍ତାନ, ଚାଇନାରେ ଭୂକମ୍ପ ଅନୁଭୁତ ହୋଇଥିବା ଭୂଗବେଷଣା କେନ୍ଦ୍ର ପକ୍ଷରୁ ସୂଚନା ପ୍ରଦାନ କରାଯାଇଛି।
ଗଣମାଧ୍ୟମ ରିପୋର୍ଟ ଅନୁଯାୟୀ, ଖାଇବର ପାସ୍ତୁନଖ୍ବା ବିପର୍ଯ୍ୟୟ ପରିଚାଳନା ପ୍ରାଧିକରଣର ରିପୋର୍ଟରେ କୁହାଯାଇଛି ଯେ ଭୂକମ୍ପ ଯୋଗୁ ଛାତ, କାନ୍ଥ ଓ ଘର ଭୁଶୁଡ଼ିବା ଘଟଣାରେ ଦୁଇ ଜଣଙ୍କର ମୃତ୍ୟୁ ଘଟିଥିବା ବେଳେ ୬ଜଣ ଆହତ ହୋଇଛନ୍ତି। ଭୂକମ୍ପ ଯୋଗୁଁ ଏଠାରେ ଆଠଟି ଘର ନଷ୍ଟ ହୋଇଯାଇଛି। ଏହି ଭୂକମ୍ପର କେନ୍ଦ୍ର ଥିଲା ଆଫଗାନିସ୍ତାନର ହିନ୍ଦୁ କୁଶ ଅଞ୍ଚଳ। ଏହାର ଭୂଗର୍ଭର ୧୮୦ କିଲୋମିଟର ଗଭୀରତା ଭୂକମ୍ପର କେନ୍ଦ୍ର ଥିଲା ।
ଏଥି ସହ ସ୍ବାତ ଜିଲା ପୋଲିସ ଅଧିକାରୀ ଶାଫିଉଲ୍ଲା ଗଣ୍ଡାପୁର ଗଣମାଧ୍ୟମକୁ କହିଛନ୍ତି ଯେ ଏହି ଜିଲାରେ ୯ ଜଣଙ୍କର ମୃତ୍ୟୁ ହୋଇଥିବାବେଳେ ୧୦୦ରୁ ଅଧିକ ଲୋକ ଆହତ ହୋଇଛନ୍ତି। ସେ କହିଛନ୍ତି ଯେ ଆହତମାନଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି।
ପ୍ରାଥମିକ ସୂଚନା ଅନୁଯାୟୀ, ଆଫଗାନିସ୍ତାନର ଫାୟାଜାବାଦର ୭୭ କିଲୋମିଟର ଦକ୍ଷିଣ-ପୂର୍ବରେ ୬.୮ ତୀବ୍ରତାଯୁକ୍ତ ଭୂକମ୍ପ ଘଟିଛି। ପାକିସ୍ତାନର ପେଶୱାର, କୋହାଟ ଏବଂ ସ୍ବାବିରେ ମଧ୍ୟ କମ୍ପନ ଅନୁଭୂତ ହୋଇଛି। ଏହା ବ୍ୟତୀତ ଲାହୋର, କ୍ୱେଟା ଏବଂ ରାୱଲପିଣ୍ଡିରେ ମଧ୍ୟ ଭୂକମ୍ପ ଅନୁଭୂତ ହୋଇଥିଲା। ଭୟଭୀତ ଲୋକମାନେ ସେମାନଙ୍କ ଘରୁ ବାହାରି ଆସିଥିଲେ। ସ୍ଥାନୀୟ ଗଣମାଧ୍ୟମ ଅନୁଯାୟୀ, ଗୁଞ୍ଜରଓ୍ବାଲା, ଗୁଜରାଟ, ସିଆଲକୋଟ, କୋଟ ମୋମିନ, ମାଧରାଞ୍ଛ୍ଜା, ଚକୱାଲ, କୋହାଟ ଏବଂ ଗିଲଗିଟ-ବଲ୍ଟିସ୍ତାନ ଅଞ୍ଚଳରେ ମଧ୍ୟ ଭୂକମ୍ପନ ଅନୁଭୂତ ହୋଇଥିଲା। ଭାରତର କେତେକ ରାଜ୍ୟରେ ଭୂକମ୍ପ ଅନୁଭୁତ ହୋଇଥିଲା।
ମଙ୍ଗଳବାର ରାତି ୧୦ ଟା ୧୯ ସମୟରେ ଦିଲ୍ଲୀ-ଏନସିଆରରେ ଏକ ଶକ୍ତିଶାଳୀ ଭୂକମ୍ପ ଅନୁଭୂତ ହୋଇଥିଲା। ଏହାର ତୀବ୍ରତା ରିକ୍ଟର ସ୍କେଲରେ ୬.୬ ମାପ କରାଯାଇଥିଲା। ନ୍ୟାଶନାଲ ସେଣ୍ଟର ଫର ସେସମୋଲୋଜି ଅନୁଯାୟୀ ଏହି ଭୂକମ୍ପର କେନ୍ଦ୍ରସ୍ଥଳ ଆଫଗାନିସ୍ତାନର ଫାୟାଜାବାଦ ଥିଲା। କମ୍ପନ ଏତେ ଶକ୍ତିଶାଳୀ ଥିଲା ଯେ ଲୋକମାନେ ଭୟଭୀତ ହୋଇ ଘରୁ ବାହାରକୁ ଆସିଥିଲେ। ଦିଲ୍ଲୀ ସମେତ ପଞ୍ଜାବର ଉତ୍ତରପ୍ରଦେଶରେ ମଧ୍ୟ ଭୂକମ୍ପରେ କମ୍ପନ ଅନୁଭୂତ ହୋଇଥିଲା। ଦୁଇରୁ ତିନିଥର ଭୂକମ୍ପରେ କମ୍ପନ ଅନୁଭୂତ ହୋଇଥିଲା।