ନୂଆଦିଲ୍ଲୀ,୭ା୩: ଓମେନ୍ସ ପ୍ରିମିୟର ଲିଗ୍ରେ ଗୁରୁବାର ୟୁପି ଓ୍ବାରିଅର୍ଜ ବିପକ୍ଷ ମ୍ୟାଚକୁ ୪୨ ରନ୍ରେ ଜିତି ନେଇଛି ମୁମ୍ବାଇ ଇଣ୍ଡିଆନ୍ସ। ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ୨୦ ଓଭରରେ ୬ ଉଇକେଟ ହରାଇ ୧୬୦ ରନ୍ ସ୍କୋର କରିଥିଲା। ଜବାବରେ ୟୁପି ୨୦ ଓଭରରେ ୯ ଉଇକେଟ ହରାଇ ୧୧୮ ରନ୍ କରିଥିଲା।
ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ମୁମ୍ବାଇ ୧୭ ରନ୍ରେ ଦୁଇ ଓପନରଙ୍କ ଉଇକେଟ ହରାଇଥିଲା। ତେବେ ଅଧିନାୟିକା ହରମନ୍ପ୍ରୀତ୍ କୌର(୩୩) ଓ ନାଟାଲି ସ୍କିଭର ବ୍ରଣ୍ଟ(୪୫) ତୃତୀୟ ଉଇକେଟରେ ୫୯ ରନ୍ ଯୋଡିଥିଲେ। ବ୍ରଣ୍ଟ ୩୧ ବଲ୍ ଖେଳି ୮ ଚୌକା ମାରିଥିଲେ। ଅଧିନାୟିକା ହରମନ୍ପ୍ରୀତ ୩୦ ବଲ୍ ଖେଳି ୩ ଚୌକା ଓ ୧ ଛକା ମାରିଥିଲେ। ଶେଷ ଭାଗରେ ଆମେଲିଆ କେର୍ (୩୯) ଓ ଏସ୍. ସାଜନା (୨୨) ଦ୍ରୁତ ରନ୍ ସଂଗ୍ରହ କରିବାରୁ ମୁମ୍ବାଇ ୧୬୦ ରନ୍ରେ ପହଞ୍ଚିଥିଲା। ୟୁପି ପକ୍ଷରୁ ଚାମାରି ଅଟ୍ଟାପାଟ୍ଟୁ ୨, ରାଜେଶ୍ୱରୀ ଗାଏକ୍ୱାଡ, ଦୀପ୍ତି ଶର୍ମା ଓ ସାଇମା ଠାକୁର ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ ଦୀପ୍ତି ଶର୍ମାଙ୍କ ଅପରାଜିତ ୫୩ ରନ୍ ସତ୍ତ୍ୱେ ୟୁପି ପରାଜିତ ହୋଇଥିଲା। ମୁମ୍ବାଇ ପକ୍ଷରୁ ଶାଇକା ଇଶାକ୍ ୩, ବ୍ରଣ୍ଟ ୨, ଶବନିମ ଇସ୍ମାଇଲ, ପୂଜା ବସ୍ତ୍ରକାର ଓ ହିଲି ମାଥ୍ୟୁସ୍ ଗୋଟିଏ ଲେଖାଏ ଉଇକେଟ ନେଇଥିଲେ। ଅଲରାଉଣ୍ଡ ପ୍ରଦର୍ଶନ ପାଇଁ ନାଟାଲି ସ୍କିଭର ବ୍ରଣ୍ଟଙ୍କୁ ପ୍ଲେୟର ଅଫ୍ ଦ ମ୍ୟାଚ ଘୋଷଣା କରାଯାଇଥିଲା।
