ଶରୀରକୁ ସୁସ୍ଥ ରଖିବା ଲାଗି ଲୋଡ଼ା ଖାଦ୍ୟ। ହେଲେ ଆପଣ ଜାଣନ୍ତି କି, ପ୍ରତ୍ୟେକ ଖାଦ୍ୟର ସମୟ ମଧ୍ୟ ଭିନ୍ନ ଥାଏ। ଠିକ୍ ଯେମିତି ପାଟିକୁ ସ୍ବାଦିଷ୍ଠ ଲାଗୁଥିଲେ ବି ରାତିରେ କେତେକ ଖାଦ୍ୟ ଖାଇବା ଆମ ସ୍ବାସ୍ଥ୍ୟ ପକ୍ଷେ ହିତକର ନୁହେଁ। ଜାଣିବା କେଉଁ ଖାଦ୍ୟ ରାତିରେ ନ ଖାଇବା ଭଲ…
ତେଲମସଲାଯୁକ୍ତ ଖାଦ୍ୟ: ଏଭଳି ଖାଦ୍ୟ ହଜମ ହେବାକୁ ଅଧିକ ସମୟ ନେଇଥାଏ। ତେଣୁ ରାତିରେ ଏହାକୁ ଖାଇଲେ ନା କେବଳ ଏସିଡିଟି, ଗ୍ୟାସ୍ ଏବଂ ଛାତି ଜଳିବା ଭଳି ସମସ୍ୟା ଉପୁଜିଥାଏ ବରଂ ନିଦ୍ରାରେ ବାଧା ମଧ୍ୟ ସୃଷ୍ଟି ହୋଇଥାଏ।
ପାଚିଲା କଦଳୀ: ଏମିତିରେ ପ୍ରାୟ ଅଧିକାଂଶ ଫଳ ଖାଇବାକୁ ପସନ୍ଦ କରନ୍ତି। ହେଲେ କଦଳୀ ପ୍ରାୟତଃ ସମସ୍ତେ ଖାଆନ୍ତି। ଏହା ଖାଇବାକୁ ଟେଷ୍ଟି ହୋଇଥିବା ବେଳେ ଏଥିରେ ପୋଷକତତ୍ତ୍ୱ ମଧ୍ୟ ଭରି ରହିଛି। ହେଲେ ଆପଣ ଜାଣନ୍ତିକି, ଏହାକୁ ରାତିରେ ଖାଇଲେ ହଜମ ହେବା କଷ୍ଟ। କେବଳ ଏତିକି ନୁହେଁ, ଏହାଦ୍ୱାରା ଛାତିରେ କଫ ଜମା ହେବାର ଆଶଙ୍କା ରହିଛି।
ଚକୋଲେଟ୍: ରାତ୍ରଭୋଜନ ପରେ ଚକୋଲେଟ୍ ଖାଇବା ଠିକ୍ ନୁହେଁ। କାରଣ ଏଥିରେ ଥିବା କ୍ୟାଫିନ୍ ନିଦ୍ରାହୀନତାର କାରଣ ସାଜିଥାଏ। ତା’ଛଡା ଏହା ମେଦବହୁଳତା ସମସ୍ୟା ବି ସୃଷ୍ଟି କରିଥାଏ।
ଚା କିମ୍ବା କଫି: ଯଦି ଆପଣ ଶୋଇବା ପୂର୍ବରୁ ଚା କିମ୍ବା କଫି ପିଉଛନ୍ତି, ତେବେ ଏହି ଅଭ୍ୟାସରେ ପରିବର୍ତ୍ତନ ଆଣନ୍ତୁ। କାରଣ ଏହା ନିଦ୍ରାରେ ବାଧା ସୃଷ୍ଟି କରିଥାଏ। ଏଥିରେ ଥିବା କ୍ୟାଫିନ୍ ଯୋଗୁ ୨ ଘଣ୍ଟାର ନିଦ୍ରା ନଷ୍ଟ ହୋଇଥାଏ।