ଗୋପାଳପୁର,୬ା୬(ଡି.ଏନ.ଏ.): ଔଷଧ ଖାଇଲେ ରୋଗ ଭଲ ହୁଏ। କିନ୍ତୁ ଜଣେ ବ୍ୟକ୍ତି ତାଙ୍କ ଗୋଡ଼ହାତ ବିନ୍ଧାରୁ ଉପଶମ ପାଇବା ପାଇଁ ବାଲି ଖାଉଛନ୍ତି। ଏଭଳି ଘଟଣା ଦେଖିବାକୁ ମିଳିଛି ରଙ୍ଗେଇଲୁଣ୍ଡା ବ୍ଲକ ଅନ୍ତର୍ଗତ କୀର୍ତ୍ତିପୁର ଗ୍ରାମରେ। ବାଲି ଖାଇଲେ ବି ତାଙ୍କର ହଜମ ହୋଇ ଯାଉଥିବା ଜଣାପଡ଼ିଛି।
ରାଜ୍ୟର କୌନୁଜ ଅଞ୍ଚଳର ମୂଳ ବାସିନ୍ଦା ହୀରାଲାଲ ବାଲିନା ରଙ୍ଗେଇଲୁଣ୍ଡା ବ୍ଲକ ଅନ୍ତର୍ଗତ କିର୍ତ୍ତିପୁର ଗ୍ରାମରେ ରୁହନ୍ତି। ସେ ବର୍ଷକୁ ୫ ମାସ କିର୍ତ୍ତିପୁର ଅଞ୍ଚଳରେ ରହି ଏକ ଅତର ଭାଟିରେ ଶ୍ରମିକ ଭାବେ କାମ କରନ୍ତି। ପ୍ରାୟ ୧୦ ବର୍ଷ ହେଲା ହୀରାଲାଲ୍ ଗଞ୍ଜାମ ଜିଲାକୁ ଆସୁଛନ୍ତି। ତାଙ୍କ କହିବା ଅନୁସାରେ ପିଲାବେଳେ ଥରେ ନଦୀକୁ ଗାଧୋଇ ଯାଇଥିବା ବେଳେ ଜଣେ ବୃଦ୍ଧଙ୍କୁ ଦେଖି ସ୍ବାସ୍ଥ୍ୟ ସମସ୍ୟା ଜଣାଇଥିଲେ।
ଅଧିକାଂଶ ସମୟ ଗୋଡ଼, ହାତ ବିନ୍ଧୁଛି, ଖାଦ୍ୟ ଠିକ୍ ଭାବେ ହଜମ ହୋଇପାରୁନାହିଁ ବୋଲି ହୀରାଲାଲ୍ କହିଥିଲେ। ପରେ ବୃଦ୍ଧ ଜଣକ ନଦୀବାଲି ଖାଇ ଗାଧୋଇଲେ ରୋଗ ଭଲ ହୋଇଯିବ ବୋଲି ତାଙ୍କୁ କହିଥିଲେ। ସେବେଠାରୁ ପ୍ରାୟ ୩୦ ବର୍ଷ ହେଲା ହୀରାଲାଲ ପ୍ରତ୍ୟେକ ଦିନ ସକାଳ ଓ ସନ୍ଧ୍ୟାରେ ବାଲି ଖାଉଛନ୍ତି ଏବଂ ତାହା ହଜମ ମଧ୍ୟ ହୋଇଯାଉଛି। ବିବାହ ପରେ ସ୍ତ୍ରୀଙ୍କୁ ମଧ୍ୟ ବାଲି ଖୁଆଉଥିଲେ ବୋଲି ସେ କହିଛନ୍ତି। ଇତିମଧ୍ୟରେ ସେ ତାଙ୍କ ସ୍ତ୍ରୀ ଓ ପିଲାଙ୍କୁ ହରାଇଛନ୍ତି।