ମହାକାଳପଡ଼ା,୩୧ା୧୨(ଡି.ଏନ.ଏ.): ଜଳବାୟୁର ପରିବର୍ତ୍ତନ, ମଣିଷକୃତ ଶିଳ୍ପାୟନର ପ୍ରଭାବ, ସରକାରୀ ସ୍ତରରେ ଇଚ୍ଛାଶକ୍ତିର ଅଭାବ, ଦିନକୁ ଦିନ ବଢୁଥିବା ପ୍ରଦୂଷଣ ପ୍ରଭାବରେ ହଜାର ହଜାର ବର୍ଷ ତଳର ଜୀବଜନ୍ତୁ, ପକ୍ଷୀ, କିଟ ପତଙ୍ଗ ଓ ବିଭିନ୍ନ ସାମୁଦ୍ରିକ ପ୍ରାଣୀ ପ୍ରଭୃତି ଲୁପ୍ତ ହେବାକୁ ବସିଲେଣି। ଏହି ସମୟରେ ବିଲୁପ୍ତପ୍ରାୟ ପ୍ରାଣୀଙ୍କ ବଂଶ ବିସ୍ତାର ଓ ସୁରକ୍ଷା ପାଇଁ କେନ୍ଦ୍ରାପଡ଼ା ଜିଲାର ମହାକାଳପଡ଼ା ବ୍ଲକର ଯୁବ ପରିବେଶପ୍ରମୀ ସମରେନ୍ଦ୍ର ମାହାଳି ନିଜସ୍ବ ଉଦ୍ୟମରେ ପକ୍ଷୀଙ୍କ ପାଇଁ ଗଛରେ ବସା ବନ୍ଧାର ଅଭିନବ ପ୍ରୟାସ ଜାରି ରଖିଛନ୍ତି।
ଶୀତଋତୁ ଆଗମନରେ କେନ୍ଦ୍ରାପଡ଼ା ଜିଲା ଉପକୂଳବର୍ତ୍ତୀ ଅଞ୍ଚଳର ବିସ୍ତୀର୍ଣ୍ଣ ହେନ୍ତାଳବଣ, ବଙ୍ଗୋପସାଗର ନୀଳ ଜଳରାଶି ଢେଉରେ ବିଭିନ୍ନ ପ୍ରଜାତିର ବଦେଶାଗତ ପକ୍ଷୀ ଖେଳୁଥିବା ଦୃଶ୍ୟ ପର୍ଯ୍ୟଟକଙ୍କୁ ଆନମନା କରିଥାଏ। ଏମାନଙ୍କ ଅସ୍ଥାୟୀ ରହଣି ପାଇଁ ପକ୍ଷୀ ବସା ତିଆରି କରିବାକୁ ଆବଶ୍ୟକ ସରଂଜାମ ନଡିଆକତା, କୁଟା କାଠି, ନାଳିଆା, ପିମ୍ପୁଳା, ସୁତୁଲି, ଘାସ ଆଦିକୁ ନେଇ ବସାଗୁଡିକ ତିଆରି କରି ଗଛ ଅଗ୍ର ଭାଗରେ ମାହାଳି ବାନ୍ଧୁଛନ୍ତି। ଦେଶବିଦେଶରୁ ପକ୍ଷୀମାନେ ଯୋଜନ ଯୋଜନ ପଥ ଅତିକ୍ରମ କରି ଉପକୂଳ ଅଞ୍ଚଳରେ ବିସ୍ତୀର୍ଣ୍ଣ ଲୁଣା ଜଙ୍ଗଲ ଓ ସମୁଦ୍ର କୂଳିଆ ନଦୀ ନାଳରେ ମିଳୁଥିବା ପର୍ଯ୍ୟାପ୍ତ ପରିମାଣରେ ଖାଦ୍ୟ ପ୍ରତି ଆକୃଷ୍ଟ ହୋଇ ଛୁଟି ଆସିଥାନ୍ତି। ଏହି ସ୍ଥାନକୁ ପକ୍ଷୀମାନେ ସୁରକ୍ଷିତ ଭାବି ନିଜର ବଂଶ ବିସ୍ତାର କରିଥାନ୍ତି। ଏଠାରେ ସୁରକ୍ଷିତ ଭାବେ ବାସ କରି ଅଣ୍ଡାଦାନ କରିବା ଓ ଛୁଆ ଫୁଟିବା ପର୍ଯ୍ୟନ୍ତ ବସା ଯଥେଷ୍ଟ ସହାୟକ ହୋଇଥାଏ। ବୁଧବାର ମହକାଳପଡା ବ୍ଲକର ଗୋବରୀ ନଦୀର ତ୍ରିକୋଣଭୂମି ଅଞ୍ଚଳ ଚଟକା ପାଶ୍ୱବର୍ତ୍ତୀ ଜଙ୍ଗଲଗୁଡିକରେ ପକ୍ଷୀମାନଙ୍କ ସ୍ବଳ୍ପ ରହଣି ପାଇଁ ସମରେନ୍ଦ୍ର ନିଜସ୍ବ ଉଦ୍ୟମରେ ବସା ତିଆରି କରି ଗଛଗୁଡିକରେ ବାନ୍ଧୁଥିବା ଦେଖିବାକୁ ମିଳିଛି। ଜମ୍ବୁ ଅଞ୍ଚଳର ସେଚ୍ଛାସେବୀ ନିଠୁଲ ସର୍ଜନ, ସୁବାସ ସ୍ବାଇଁ ପ୍ରମୁଖ ବସାବନ୍ଧା କାର୍ଯ୍ୟରେ ଅଂଶଗ୍ରହଣ କରି ସମରେନ୍ଦ୍ରଙ୍କୁ ଉତ୍ସାହିତ କରିଥିଲେ। ପରିବେଶପ୍ରେମୀ ସମରେନ୍ଦ୍ରଙ୍କ କହିବା କଥା, ପକ୍ଷୀମାନଙ୍କ ବ୍ୟତୀତ ଅଞ୍ଚଳରେ ବ୍ୟାପକ ପରିମାଣର ଜଙ୍ଗଲ ସୃଷ୍ଟି କରିବା, ସାମୁଦ୍ରିକ ଓ ବଣ୍ୟ ଜୀବଜନ୍ତୁଙ୍କୁ କିପରି ସୁରକ୍ଷା ଦିଆଯାଇପାରିବ ଉଦ୍ୟମ ଜାରି ରହିଥିଲା। ଗୀଷ୍ମ ଋତୁରେ ଜଙ୍ଗଲି ପଶୁ ଓ ପକ୍ଷୀଙ୍କ ପାଇଁ ପାନୀୟ ଜଳର ବ୍ୟବସ୍ଥା ଆଗକୁ କରାଯିବ ବୋଲି ସେ ସୂଚନା ଦେଇଛନ୍ତି।
