ନୂଆଦିଲ୍ଲୀ,୧୨।୮:ନିର୍ବାଚନ ବେଳେ ରାଜନୈତିକ ଦଳଗୁଡ଼ିକ ଭୋଟରଙ୍କୁ ଆକୃଷ୍ଟ କରିବା ଲାଗି ଅନେକ ମାଗଣା ସୁବିଧାର ପ୍ରତିଶ୍ରୁତି ଦେବା ଓ ବଣ୍ଟନ କରିବା ଯୋଗୁ ଦେଶର ଅର୍ଥନୀତି ଦୁର୍ବଳ ହେଉଛି। ଏନେଇ ସୁପ୍ରିମକୋର୍ଟ ଚିନ୍ତାବ୍ୟକ୍ତ କରିଛନ୍ତି। ଏହା ଏକ ଗୁରୁତର ପ୍ରସଙ୍ଗ ବୋଲି ଏକ ଜନସ୍ବାର୍ଥ ମାମଲାର ଶୁଣାଣି ବେଳେ ସର୍ବୋଚ୍ଚ ଅଦାଲତ କହିଛନ୍ତି। ଭୋଟ ଆଶାରେ ଲୋକଙ୍କୁ ମାଗଣା ସୁବିଧା ଦେଉଥିବା ରାଜନୈତିକ ଦଳଗୁଡ଼ିକୁ ବେଆଇନ ଘୋଷଣା କରିବା ପାଇଁ ଆଇନଜୀବୀ ଅଶ୍ୱିନୀ ଉପାଧ୍ୟାୟ ଜନସ୍ବାର୍ଥ ମାମଲା (ପିଆଇଏଲ୍) ଦାଏର କରିଥିଲେ। ନିର୍ବାଚନୀ ଇସ୍ତାହାରଗୁଡ଼ିକୁ ନିୟନ୍ତ୍ରଣ କରିବା ଲାଗି ପଦକ୍ଷେପ ନିଆଯାଉ ଏବଂ ମାଗଣା ସୁବିଧା ପ୍ରଦାନ ଯୋଗୁ ହେଉଥିବା ଆର୍ଥତ୍କ କ୍ଷତି ପାଇଁ ରାଜନୈତିକ ଦଳଗୁଡ଼ିକୁ ଦାୟୀ କରାଯାଉ ବୋଲି ଉପାଧ୍ୟାୟ ପିଟିଶନରେ ଅଦାଲତଙ୍କୁ ଅନୁରୋଧ କରିଥିଲେ।
ନିର୍ବାଚନ ପୂର୍ବରୁ ମାଗଣା ସୁବିଧା ଘୋଷଣାକୁ ନିୟନ୍ତ୍ରଣ କରିବା ଲାଗି ଏକ ବିଶେଷଜ୍ଞ କମିଟି ଗଠନ ନିମନ୍ତେ ସୁପ୍ର୍ରିମକୋର୍ଟ ନିଷ୍ପତ୍ତି ନେଇଥିବା ବେଳେ ନିର୍ବାଚନ କମିଶନ(ଇସି) ଏହାକୁ ସମର୍ଥନ ଜଣାଇଛନ୍ତି। ତେବେ ଉକ୍ତ କମିଟିରେ ସାମିଲ ହେବାକୁ ଇସି ବିରୋଧ କରିଛି। ନିର୍ବାଚନ କମିଶନ ଏକ ସାମ୍ବିଧାନିକ ସଂସ୍ଥା ହୋଇଥିବାରୁ ବିଶେଷଜ୍ଞ କମିଟିରେ ସାମିଲ ହେବା ଠିକ୍ ହୋଇ ନ ପାରେ। ବିଶେଷ କରି କମିଟିରେ ଯଦି ମନ୍ତ୍ରଣାଳୟ ଏବଂ ସରକାରୀ ସଂସ୍ଥାରୁ ସଦସ୍ୟ ରହୁଥାନ୍ତି, ତେବେ ସେଥିରେ ଇସି ସାମିଲ ହୋଇପାରିବ ନାହିଁ। ଏଭଳି ହେଲେ ନିର୍ବାଚନ ପରିଚାଳନା ପ୍ରଭାବିତ ହେବ ବୋଲି ଇସି ପକ୍ଷରୁ ଏକ ସତ୍ୟପାଠ ଜରିଆରେ ଜଣାଇ ଦିଆଯାଇଛି। ନିର୍ବାଚନ ବେଳେ ମାଗଣା ସୁବିଧା ପ୍ରଦାନ ଯୋଗୁ ୨୦୨୧ ମାର୍ଚ୍ଚ ୩୧ ସୁଦ୍ଧା ବିଭିନ୍ନ ରାଜ୍ୟ ଉପରେ ୫୯,୮୯,୩୬୦ କୋଟି ଟଙ୍କାର ଋଣ ବୋଝ ପଡ଼ିଛି। ସରକାରଙ୍କ ଖର୍ଚ୍ଚ ଯଥେଷ୍ଟ ବୃଦ୍ଧି ପାଇଛି ବୋଲି ପିଆଇଏଲ୍ ଆବେଦନକାରୀ ଅଦାଲତଙ୍କୁ କହିଛନ୍ତି। ଉତ୍ତରପ୍ରଦେଶ ଏବଂ ମହାରାଷ୍ଟ୍ରରେ ଋଣ ପରିମାଣ ସର୍ବାଧିକ ୬,୬୨,୮୯୧ କୋଟି ଏବଂ ୫,୩୬,୮୯୧ କୋଟି ଟଙ୍କାରେ ପହଞ୍ଚତ୍ଛି। ରାଜ୍ୟ ଜିଡିପି ଋଣ ଅନୁପାତରେ ପଞ୍ଜାବ ଆଗରେ ରହିଛି। ଏହାର ଋଣ ପରିମାଣ ୨,୪୯,୧୮୭ କୋଟି ହୋଇଥିବାବେଳେ ଋଣ ଜିଏସ୍ଡିପି ଅନୁପାତ ୫୩:୩ରେ ପହଞ୍ଚତ୍ଥିବା ଆବେଦନକାରୀ ଉପାଧ୍ୟାୟ ସିଜେଆଇଙ୍କ ଖଣ୍ଡପୀଠଙ୍କୁ ଜଣାଇଛନ୍ତି।