ଅମରପାଲି,୩୦ା୧୧(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ବହଳପଦର ପଞ୍ଚାୟତ ଅନ୍ତର୍ଗତ ଚିଙ୍ଗିରାନାଲି ଗ୍ରାମରେ ପଞ୍ଚାନନ ଛତ୍ରିଆ(୫୫)। ଏବେ ସେ ଅଜଣା ରୋଗରେ ଆକ୍ରାନ୍ତ। ଗତ ଦେଢ ମାସ ହେଲା ତାଙ୍କର ଉଭୟ ଗୋଡ କାମ କରୁ ନ ଥିବାରୁ ଚାଲି ବୁଲି ପାରୁନାହାନ୍ତି। ସବୁବେଳେ ବିଛଣାରେ ପଡି ରହିଛନ୍ତି। ଅର୍ଥାଭାବ ଯୋଗୁଁ ତାଙ୍କର ଚିକିତ୍ସା ହୋଇ ନ ପାରି ଘରେ ପଡି ରହିଛନ୍ତି।
ତିନି ମାସ ତଳେ ଦେହ ହାତ ଦରଜ ହେବାରୁ ପଞ୍ଚାନନ ବୀରମହାରାଜପୁର ଡାକ୍ତରଖାନା ଯାଇଥିଲେ। ଆବଶ୍ୟକ ପରୀକ୍ଷା ନିରୀକ୍ଷା ପରେ ସେ ମଧୁମେହ ରୋଗରେ ପୀଡିତ ଥିବା ଡାକ୍ତର କହିଥିଲେ। ଔଷଧ ନେଇ ଘରକୁ ଫେରିବା ପରେ ରୋଗ କମିବା ପରିବର୍ତ୍ତେ ତାଙ୍କର ଦେହ ଜଳାପୋଡା ହେଲା। ପରେ ସେ ବୌଦ୍ଧ ଡାକ୍ତରଖାନା ଯାଇ ଚିକିତ୍ସିତ ହୋଇଥିଲେ। ହେଲେ କୌଣସି ସୁଫଳ ମିଳିଲା ନାହିଁ। କିଛି ଦିନ ପରେ ତାଙ୍କର ଉଭୟ ଗୋଡ କାମ କଲାନାହିଁ। ଅର୍ଥାଭାବରୁ ସେ ଆଉ କୌଣସି ଡାକ୍ତରଖାନା ଯାଇ ପାରିନାହାନ୍ତି, ବିଛଣାର ପଡି ରହିଛନ୍ତି। ତାଙ୍କ ସ୍ତ୍ରୀ ତାଙ୍କୁ ବୋହି କରି ନେବା ଆଣିବା କରୁଛନ୍ତି। ନାମମାତ୍ର ଚାଷୀ ପଞ୍ଚାନନ କିଛି ଜମି ଚାଷ କରିଥିଲେ। ଏବେ ଧାନ କିପରି ଅମଳ କରିବେ ସେହି ଚିନ୍ତାରେ ପଡିଛନ୍ତି। ୩ଝିଅଙ୍କୁ ବିବାହ କରାଇ ସାରିଛନ୍ତି ପଞ୍ଚାନନ। ଏବେ ଅନ୍ୟ ୨ଝିଅ ଓ ଜଣେ ପୁଅ ଘରେ ଅଛନ୍ତି। ପୁଅ ରାଜାରାମଙ୍କୁ ୧୫ବର୍ଷ ହେଉଥିବା ବେଳେ ଝିଅ ସସ୍ମିତା(୧୪) ଓ ଅମ୍ରିତା(୩) ଅଛନ୍ତି। ପଞ୍ଚାନନଙ୍କ ବିପିଏଲ କାର୍ଡ ଅଛି। ରାଶନ ବାବଦକୁ ମିଳୁଥିବା ୨୦କେଜି ଚାଉଳରେ ଏବେ ପରିବାର ଚାଲୁଛି। ପଞ୍ଚାନନଙ୍କ ସ୍ତ୍ରୀ ପାର୍ବତୀ ମୂଲ ଲାଗି ପରିବାର ଚଳାଉଛନ୍ତି। ତାଙ୍କ ପାଖରେ ବିଜୁ ସ୍ବାସ୍ଥ୍ୟ କାର୍ଡ ଥିଲେ ମଧ୍ୟ ତାହା କାମରେ ଲାଗୁନାହିଁ। ଏବେ ତାଙ୍କୁ ଡାକ୍ତରଖାନାକୁ ନେବା ପାଇଁ ମଧ୍ୟ ଅର୍ଥର ଅଭାବ ରହିଛି। ଅର୍ଥାଭାବରୁ ସେ ଔଷଧ କିଣି ନ ପାରି ଏବେ ସେ ଚେରମୂଳି ଔଷଧ ବ୍ୟବହାର କରୁଛନ୍ତି। ତାଙ୍କୁ ଯଦି ତୁରନ୍ତ ଚିକିତ୍ସା କରାଯିବ ସେ ଭଲ ହୋଇଯିବେ ବୋଲି ପଞ୍ଚାନନ ପ୍ରକାଶ କରିଛନ୍ତି। ଏ ନେଇ ବୀରମହାରାଜପୁର ଉପଖଣ୍ଡ ଚିକିତ୍ସା ଅଧିକାରୀ ରବୀନ୍ଦ୍ର ପଣ୍ଡାଙ୍କୁ ପଚାରିବାରୁ ତାଙ୍କୁ ତୁରନ୍ତ ବୀରମହାରାଜପୁର ଡାକ୍ତରଖାନାକୁ ଅଣାଯାଇ ଚିକିତ୍ସା କରାଯିବ ବୋଲି ପ୍ରକାଶ କରିଛନ୍ତି।