ନୂଆଦିଲ୍ଲୀ,୨୮।୯: ଦିଲ୍ଲୀର ମଦ ନୀତି ମାମଲାରେ ବ୍ୟବସାୟୀ ସମୀର ମହେନ୍ଦ୍ରୁଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ବୁଧବାର ଗିରଫ କରିଛି। ସେ ଇଣ୍ଡୋ ସ୍ପିରିଟ୍ସର ଏମ୍ଡି। ନିକଟରେ ସମୀରଙ୍କ ଘର ଓ କାର୍ଯ୍ୟାଳୟ ଉପରେ ଇଡି ପକ୍ଷରୁ ଚଢ଼ାଉ କରାଯାଇଥିଲା। ଏକ୍ସାଇଜ ସ୍କାମରେ ଇଡିର ଏହା ହେଉଛି ଦ୍ୱିତୀୟ ଗିରଫଦାରୀ। ଏହାପୂର୍ବରୁ ମଙ୍ଗଳବାର ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ଘନିଷ୍ଠ ସହଯୋଗୀ ବିଜୟ ନାୟାରଙ୍କୁ ମଧ୍ୟ ଅବକାରୀ ନୀତି ମାମଲାରେ ଇଡି ଗିରଫ କରିଥିଲା। ତେବେ ୨ଜଣଙ୍କ ଗିରଫ ପରେ ଏବେ ସିସୋଡିଆଙ୍କ ପାଳି ପଡ଼ିବ ବୋଲି ଏଏପି ଆଶଙ୍କା କରିଛି। ସିବିଆଇର ଏଫ୍ଆଇଆରରେ ବିଜୟ ହେଉଛନ୍ତିି ପାଞ୍ଚ ନମ୍ବର ଅଭିଯୁକ୍ତ। ସେ ଏକ ଇଭେଣ୍ଟ ମ୍ୟାନେଜମେଣ୍ଟ କମ୍ପାନୀର ପୂର୍ବତନ ସିଇଓ। ବିଜୟ ନାୟାର ଦୀର୍ଘ ଦିନ ଧରି ଆମ ଆଦମୀ ପାର୍ଟି(ଏଏପି) ସହ ଜଡିତ ଥିଲେ। ହେଲେ ସେ କୌଣସି ପଦବୀରେ ନାହାଁନ୍ତି। ମନୀଷ ସିସୋଡିଆ ଏବଂ ବିଜୟ ନାୟାରଙ୍କ ସମେତ ଅତିକମ୍ରେ ୧୪ଜଣଙ୍କ ଉପରେ ସିବିଆଇ ଚଢ଼ାଉ ଜାରି ରଖି ପଚରାଉଚରା କରୁଛି। ସୂଚନା ମୁତାବକ, ଦିଲ୍ଲୀ ଏକ୍ସାଇଜ ମାମଲାରେ ସେପ୍ଟେମ୍ବର ପ୍ରଥମ ସପ୍ତାହ ପର୍ଯ୍ୟନ୍ତ ସିବିଆଇ ୫ଜଣଙ୍କୁ ଗିରଫ କରି ପଚରାଉଚରା କରିଥିଲା।
