ନୂଆଦିଲ୍ଲୀ,୨୮।୬: କେନ୍ଦ୍ରୀୟ ଯାଞ୍ଚ ଏଜେନ୍ସି ଇଡି ରିଏଲ ଇଷ୍ଟେଟ ଡେଭଲପର୍ ସୁପରଟେକର ଚେୟାରମ୍ୟାନ ଆର.କେ ଆରୋରାଙ୍କୁ ଗିରଫ କରିଛି। ସୂତ୍ରରୁ ପ୍ରକାଶ ଯେ ଆର.କେ ଆରୋରାଙ୍କୁ ପିଏମ୍ଏଲଏ ଅଧୀନରେ ଗିରଫ କରାଯାଇଛି। ମଙ୍ଗଳବାର ଇଡି ଆର.କେ ଆରୋରାଙ୍କୁ ସମନ ଜାରି କରି ପଚରାଉଚରା ପାଇଁ ଡାକିଥିଲା।
ଦିଲ୍ଲୀ, ହରିୟାଣା ଏବଂ ଉତ୍ତରପ୍ରଦେଶର ବିଭିନ୍ନ ପୋଲିସ ଷ୍ଟେଶନରେ ସୁପରଟେକ ଅଫ କମ୍ପାନୀ ଏବଂ ଏହାର ନିର୍ଦ୍ଦେଶକଙ୍କ ବିରୋଧରେ କ୍ରେତାଙ୍କ ସହ ପ୍ରତାରଣା ମାମଲା ପୂର୍ବରୁ ପଞ୍ଜୀକୃତ ହୋଇଛି। ଯାହା ପରେ ପିଏମ୍ଏଲଏ ଅଧୀନରେ ଇଡି ତଦନ୍ତ ଆରମ୍ଭ କଲା। ଯାଞ୍ଚରୁ ଜଣାପଡିଛି ଯେ ଫ୍ଲାଟ ନାମରେ କ୍ରେତାଙ୍କଠାରୁ ବିପୁଳ ପରିମାଣର ଟଙ୍କା ନିଆଯାଇଛି।
ସେମାନଙ୍କୁ ଠିକ ସମୟରେ ଅଧିକାର ଦିଆଯାଇନଥିଲା ଏବଂ ପ୍ରକଳ୍ପ ନାମରେ ବ୍ୟାଙ୍କରୁ ନିଆଯାଇଥିବା ଋଣ ମଧ୍ୟ ନିୟମ ବିରୋଧ ଭାବରେ ବ୍ୟବହୃତ ହୋଇଥିଲା। ତେବେ ଯାଞ୍ଚରେ ଇଡି ସନ୍ତୁଷ୍ଟ ନ ଥିଲା, ଯାହାପରେ ଆର.କେ ଆରୋରାଙ୍କୁ ଗିରଫ କରାଯାଇଛି। ବୁଧବାର ଆରୋରା ଏକ ସ୍ବତନ୍ତ୍ର କୋର୍ଟରେ ହାଜର ହେବାର ସମ୍ଭାବନା ରହିଛି।
