ନୂଆଦିଲ୍ଲୀ,୨।୯: ଦିଲ୍ଲୀର ଓଖଲା ଆସନରୁ ଆମ ଆଦମୀ ପାର୍ଟି (ଏଏପି) ବିଧାୟକ ଥିବା ଅମାନତୁଲ୍ଲା ଖାନ ସୋମବାର (ସେପ୍ଟେମ୍ବର ୨)ରେ ଦାବି କରିଛନ୍ତି ଯେ ଏନଫୋର୍ସମେଣ୍ଟ ନିର୍ଦ୍ଦେଶାଳୟ (ଇଡି) ଦଳ ଚଢାଉ ପାଇଁ ତାଙ୍କ ଘରେ ପହଞ୍ଚିଛି। ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟରେ ସେ କହିଛନ୍ତି ଯେ ତାଙ୍କୁ ଗିରଫ କରିବା ପାଇଁ ଇଡି ଅଧିକାରୀମାନେ ପହଞ୍ଚିଛନ୍ତି। ଏଏପିର ରାଜ୍ୟ ସଭା ଏମପି ସଞ୍ଜୟ ସିଂ ତଦନ୍ତ ଏଜେନ୍ସିର ରେଡର ଭିଡିଓ ଶେୟାର କରି କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଇଡିଙ୍କ ଏକଛତ୍ରବାଦୀ ଶାସନ ଜାରି ରହିଛି।
ଇଡି ସୂତ୍ରରୁ ପ୍ରକାଶ ଯେ ଯେତେବେଳେ ଅନୁସନ୍ଧାନକାରୀ ଏଜେନ୍ସି ଟିମ ଅମାନତୁଲ୍ଲା ଖାନଙ୍କ ଘରେ ପହଞ୍ଚିଥିଲେ ସେତେବେଳେ ସେ କବାଟ ଖୋଲି ନ ଥିଲେ। ୱାକଫ ବୋର୍ଡ ମନି ଲଣ୍ଡରିଂ ମାମଲାର ଯାଞ୍ଚ ପାଇଁ ଇଡି ଦଳ ଏଏପି ବିଧାୟକଙ୍କ ଘରେ ପହଞ୍ଚିଥିଲେ। ଏହି ମାମଲାରେ ଇଡି ଅମାନତୁଲ୍ଲାଙ୍କୁ ଅନେକ ଥର ପଚରାଉଚରା କରିଛି।
ଅମାନାତୁଲ୍ଲା ଖାନ ଏକ୍ସରେ ଲେଖିଛନ୍ତି, ମୋତେ ଗିରଫ କରିବା ପାଇଁ ଇଡି ଲୋକମାନେ ମୋ ଘରେ ପହଞ୍ଚିଛନ୍ତି। କିଛି ସମୟ ପରେ ସଞ୍ଜୟ ସିଂ ଏହି ରେଡର ଭିଡିଓ ଶେୟାର କରି କହିଛନ୍ତି, ଇଡିର ନିଷ୍ଠୁରତାକୁ ଦେଖ। ଅମାନତୁଲ୍ଲା ଖାନ ପ୍ରଥମେ ଇଡି ଅନୁସନ୍ଧାନରେ ଯୋଗ ଦେଇଥିଲେ। ତାଙ୍କଠାରୁ ଅଧିକ ସମୟ ମାଗିଥିଲେ। ତାଙ୍କ ଶାଶୁଙ୍କର କର୍କଟ ରୋଗ ଅଛି, ସେ ଅସ୍ତ୍ରୋପଚାର କରିଛନ୍ତି । ତାଙ୍କର ଏକ ଅପରେସନ ହୋଇଛି। ହେଲେ ସକା ସକାଳୁ ଇଡି ଟିମ୍ ତାଙ୍କ ଘରେ ପହଞ୍ଚିଯାଇଛନ୍ତି। ଅମାନାତୁଲ୍ଲାଙ୍କ ବିରୋଧରେ କୌଣସି ପ୍ରମାଣ ନାହିଁ। ହେଲେ ମୋଦିଙ୍କ ଏକଛତ୍ରବାଦୀ ଶାସନ ଓ ଇଡିର ଗୁଣ୍ଡାଗର୍ଦ୍ଦି ଜାରି ରହିଛି।