ନୂଆଦିଲ୍ଲୀ,୧୯।୯: ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ପରେ ଏନ୍ଫୋର୍ସମେଣ୍ଟ ନିର୍ଦ୍ଦେଶାଳୟ(ଇଡି) ଏଏପି ବିଧାୟକ ତଥା ଦିଲ୍ଲୀ ମ୍ୟୁନିସିପାଲିଟି ନିର୍ବାଚନ ଦାୟିତ୍ୱରେ ଥିବା ଦୁର୍ଗେଶ ପାଠକଙ୍କୁ ସୋମବାର ସମନ ଜାରି କରିଛି । ଏନେଇ ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ଟୁଇଟ କରି ସୂଚନା ଦେଇଛନ୍ତି।
ମନୀଷ ଭାଜପାକୁ ଟାର୍ଗେଟ କରି କହିଛନ୍ତି, ଅବକାରୀ ନୀତିରେ କର୍ପୋରେସନ ନିର୍ବାଚନ ଇନ୍ଚାର୍ଜଙ୍କ ଏଥିରେ କ’ଣ ସମ୍ପର୍କ ରହିଛି। ଭାଜପାର ଟାର୍ଗେଟ ମଦ ନୀତି ନା କର୍ପୋରେସନ ନିର୍ବାଚନ ବୋଲି ସେ ଓଲଟା ପ୍ରଶ୍ନ କରିଛନ୍ତି।
ପୂର୍ବତନ ସ୍ବାସ୍ଥ୍ୟମନ୍ତ୍ରୀ ସତ୍ୟେନ୍ଦ୍ର ଜୈନ, ଉପମୁଖ୍ୟମନ୍ତ୍ରୀ ସିସୋଡିଆ ଏବଂ ଚହଲା ବିଧାୟକଙ୍କ ସମେତ ଏଏପିର ୪ଜଣ ବରିଷ୍ଠ ନେତା ସିବିଆଇ, ଇଡି ଏବଂ ଦୁର୍ନୀତି ନିବାରଣ ବ୍ୟୁରୋ(ଏସିବି) ପରି କେନ୍ଦ୍ରୀୟ ଅନୁସନ୍ଧାନକାରୀ ସଂସ୍ଥାର ସମ୍ମୁଖୀନ ହୋଇଛନ୍ତି।
ସୂଚନାଯୋଗ୍ୟ, ଦିନକ ପୂର୍ବରୁ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କେନ୍ଦ୍ର ସରକାରଙ୍କୁ ଟାର୍ଗେଟ କରିଥିଲେ। କେନ୍ଦ୍ର ସରକାର ତାଙ୍କ ଦଳର ମନ୍ତ୍ରୀ ଏବଂ ନେତାଙ୍କୁ ଦୁର୍ନୀତି ମାମଲାରେ ଫସାଇବାକୁ ଚେଷ୍ଟା କରୁଛନ୍ତି। କାରଣ ଭାଜପା ଏଏପିର ଲୋକପ୍ରିୟତାକୁ ସହି ପାରୁନାହିଁ। ତେଣୁ ଦଳ ବିରୋଧରେ ଅନେକ ଷଡ଼ଯନ୍ତ୍ର ରଚୁଛି ବୋଲି କେଜ୍ରିଓ୍ବାଲ କହିଛନ୍ତି। ବିଧାୟକଙ୍କ ବିରୋଧରେ ଏପର୍ଯ୍ୟନ୍ତ ୧୬୯ଟି ମାମଲା ରହିଛି। ହେଲେ ଗୋଟିଏ ମାମଲାରେ ତାଙ୍କୁ ଦଣ୍ଡିତ କରାଯାଇ ନ ଥିବା କେଜ୍ରିଓ୍ବାଲ କହିଛନ୍ତି।