କୋଲକାତା,୧୨।୮(ଆଇଏଏନ୍ଏସ୍):କୋଇଲା ଚୋରା କାରବାର ମାମଲା ସହ ସମ୍ପୃକ୍ତ ପଶ୍ଚିମବଙ୍ଗର ୮ ଜଣ ଭାରତୀୟ ପୋଲିସ ସେବା (ଆଇପିଏସ୍) ଅଫିସରଙ୍କୁ ଜେରା ଲାଗି ଦିଲ୍ଲୀ ମୁଖ୍ୟାଳୟରେ ହାଜର ହେବା ନିମନ୍ତେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗୁରୁବାର ସମନ ଜାରି କରିଛି। ୮ ଆଇପିଏସ୍ ଅଫିସରଙ୍କ ମଧ୍ୟରେ ଅଛନ୍ତି ରାଜ୍ୟ ପୋଲିସ ସିଆଇଡି ଏବଂ ସ୍ପେଶାଲ ଟାସ୍କଫୋର୍ସ ଏଡିଜି ଜ୍ଞାନଓ୍ବନ୍ତ ସିଂ, ରାଜ୍ୟ ଗୋଇନ୍ଦା ବିଭାଗ ଏଡିଜି ରାଜୀବ ମିଶ୍ର, ଟ୍ରାଫିକ ବିଭାଗ ଡିଆଇଜି ସୁକେଶ କୁମାର ଜୈନ, ରାଜ୍ୟ ସିଭିଲ୍ ଡିଫେନ୍ସ ଡିଆଇଜି ଶ୍ୟାମ ସିିଂ, ପୁରୁଲିଆ ଏସ୍ପି ଏସ୍. ସେଲ୍ଭାମୁରୁଗାନ, ଦୁର୍ନୀତି ନିବାରଣ ବିଭାଗ ଏସ୍ପି କୋଟେଶ୍ୱର ରାଓ, ପଶ୍ଚିମବଙ୍ଗ ପୋଲିସ ନିଯୁକ୍ତି ବୋର୍ଡ ଏସ୍ପି ତଥାଗତ ବସୁ ଏବଂ କାଉଣ୍ଟର ଇନ୍ସର୍ଜେନ୍ସି ଫୋର୍ସ ଏସ୍ପି ଭାସ୍କର ମୁଖାର୍ଜୀ।
ରାଜ୍ୟରେ କୋଇଲା ଚୋରା କାରବାର ଶୀର୍ଷରେ ପହଞ୍ଚତ୍ଥିବାବେଳେ ଉପରୋକ୍ତ ଅଧିକାରୀମାନେ ସେଥିରେ ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡ଼ିତ ଥିବାର ନିର୍ଦ୍ଦିଷ୍ଟ ତଥ୍ୟ ଇଡି ହାତରେ ଲାଗିଥିବା ଏକ ସୂତ୍ରରୁ ଜଣାପଡ଼ିଛି। ପଶ୍ଚିମ ବର୍ଦ୍ଧମାନ ଜିଲାର ଆସାନସୋଲ ଏବଂ ପୁରୁଲିଆ ଜିଲାର କିଛି ଅଞ୍ଚଳ କୋଇଲା ଦୁର୍ନୀତିର ପେଣ୍ଠସ୍ଥଳ ଥିଲା। ଉଭୟ ସିବିଆଇ ଏବଂ ଇଡି ଏହି ଦୁର୍ନୀତି ମାମଲାର ତଦନ୍ତ ଚଳାଇଛି। ଏହି ମାମଲାରେ ପୂର୍ବରୁ ଟିଏମ୍ସି ଏମ୍ପି ତଥା ଦଳର ରାଷ୍ଟ୍ରୀୟ ସାଧାରଣ ସମ୍ପାଦକ ଅଭିଷେକ ବାନାର୍ଜୀ ଓ ତାଙ୍କ ସ୍ତ୍ରୀ ରୁଜିରାଙ୍କୁ ଇଡି ଜେରା କରିଥିଲା।