ମୁମ୍ବାଇ: ଇ-ସିଗାରେଟ୍କୁ ୨୦୧୯ରୁ ଭାରତ ସରକାରଙ୍କ ପକ୍ଷରୁ ନିଷିଦ୍ଧ ଘୋଷଣା କରାଯାଇଛି। କିନ୍ତୁ ଏହା ସତ୍ତ୍ୱେ ଦେଶର ଶିକ୍ଷିତ ଯୁବପିଢ଼ି ଇ-ସିଗାରେଟ୍ର ବହୁଳ ବ୍ୟବହାର କରିବାରେ ଲାଗିଥିବା ‘ଦ ଜର୍ଜ ଇନ୍ଷ୍ଟିଚ୍ୟୁଟ ଫର୍ ଗ୍ଲୋବାଲ ହେଲ୍ଥ’ ପକ୍ଷରୁ କରାଯାଇଥିବା ଅଧ୍ୟୟନ ରିପୋର୍ଟରେ ଉଲ୍ଲେଖ କରାଯାଇଛି। ଅନ୍ଲାଇନ୍ରେ ଇ-ସିଗାରେଟ୍ ସହଜରେ ଉପଲବ୍ଧ ହେଉଥିବାବେଳେ ବ୍ୟାନ୍ ସତ୍ତ୍ୱେ ବହୁ ଦୋକାନୀ ଏହାକୁ ନିଜ ପାଖରେ ମହଜୁଦ ରଖୁଛନ୍ତି। ସାଧାରଣ ସିଗାରେଟରେ ବ୍ୟବହାର ହେଉଥିବା ତମାଖୁ ଇ-ସିଗାରେଟ୍ରେ ମଧ୍ୟ ରହିଥାଏ। ଯେଉଁମାନେ ସିଗାରେଟ ଟାଣିବାକୁ ପସନ୍ଦ କରନ୍ତି, ସେମାନଙ୍କ ପକ୍ଷରେ ଇ-ସିଗାରେଟ୍କୁ ବ୍ୟବହାର କରିବା ସହଜ ବୋଲି ଜଣାଯାଉଛି।
ପାରେଲସ୍ଥିତ ଟାଟା ମେମୋରିଆଲ୍ ହସ୍ପିଟାଲର କ୍ୟାନ୍ସର ସର୍ଜନ ଡା. ପଙ୍କଜ ଚତୁର୍ବେଦୀଙ୍କ ମତରେ, ସିଗାରେଟ୍ରେ ଥିବା ନିକୋଟିନ୍ ମନୁଷ୍ୟ ଶରୀର ପକ୍ଷେ କ୍ଷତିକାରକ। ସିଗାରେଟ୍ ଟାଣିବାରେ ଅଭ୍ୟସ୍ତ ବ୍ୟକ୍ତିମାନଙ୍କୁ ଏହା ବୁଝିବା ନିହାତି ଆବଶ୍ୟକ। ସେମାନେ ଜାଣିଶୁଣି ନିଜ ଜୀବନକୁ ବିପଦମୁଖକୁ ଠେଲି ଦେଉଛନ୍ତି। ଇ-ସିଗାରେଟ୍କୁ ନିଷିଦ୍ଧ ଘୋଷଣା କରିବା ପରେ ଏହାର ଚୋରାବିକ୍ରି ରୋକିବା ରାଜ୍ୟ ସରକାରଙ୍କ ଦାୟିତ୍ୱ।
ଜର୍ନାଲ ଅଫ୍ ପ୍ରିଭେଣ୍ଟିଭ୍ ମେଡିସିନ୍ରେ ପ୍ରକାଶ ପାଇଥିବା ଏହି ଅଧ୍ୟୟନ ରିପୋର୍ଟ ଅନୁସାରେ, ୮୪୦ ଶିକ୍ଷିତ ଯୁବପିଢ଼ିଙ୍କୁ ଏଥିରେ ସାମିଲ କରାଯାଇଛି। ସେମାନଙ୍କ ମଧ୍ୟରୁ ୨୩% ଯୁବପିଢ଼ି ଇ-ସିଗାରେଟ୍ ବ୍ୟବହାର କରୁଥିବାବେଳେ ୮% ନିୟମିତ ରୂପରେ ଏହାକୁ ୟୁଜ୍ କରୁଛନ୍ତି। ମନୁଷ୍ୟ ଶରୀର ପାଇଁ ଇ-ସିଗାରେଟ୍ ନାକାରତ୍ମକ ପ୍ରଭାବ ପକାଉଥିବାବେଳେ ବିଷାକ୍ତ କେମିକାଲ ଏଥିରେ ରହିଛି। ଇ-ସିଗାରେଟ୍ର ବହୁଳ ବ୍ୟବହାରକୁ ରୋକା ନ ଗଲେ ଯୁବପିଢ଼ିଙ୍କ ଲାଗି ଏହା ଆଗାମୀ ଦିନରେ ମାରାତ୍ମକ ସାବ୍ୟସ୍ତ ହେବ।