ନୂଆଦିଲ୍ଲୀ, ୧।୩: କରୋନା ମହାମାରୀ ପରେ ୬୫ ପ୍ରତିଶତ ନିମ୍ନ ଏବଂ ନିମ୍ନ-ମଧ୍ୟମ ଆୟକାରୀ ଦେଶ ସେମାନଙ୍କ ଶିକ୍ଷା ବଜେଟ ହ୍ରାସ କରିଛନ୍ତି। କେବଳ କମ୍ ଆୟକାରୀ ନୁହନ୍ତି, ଉଚ୍ଚ ଆୟକାରୀ ଦେଶ ମଧ୍ୟ ଶିକ୍ଷା ବାବଦ ଖର୍ଚ୍ଚ କମାଇଥିବା ଜଣାପଡ଼ିଛି। ସେମାନଙ୍କ ସଂଖ୍ୟା ୩୩ ପ୍ରତିଶତ ବୋଲି ବିଶ୍ୱବ୍ୟାଙ୍କ ରିପୋର୍ଟରେ କୁହାଯାଇଛି। ୟୁନେସ୍କୋର ଗ୍ଲୋବାଲ ଏଜୁକେଶନ ମନିଟରିଂ (ଜିଇଏମ୍) ରିପୋର୍ଟ ଅନୁଯାୟୀ ଅଧିକାଂଶ ନିମ୍ନ ଏବଂ ନିମ୍ନ-ମଧ୍ୟମ ଆୟକାରୀ ଦେଶ ସ୍ଥାୟୀ ବିକାଶ ଲକ୍ଷ୍ୟ ହାସଲ ପାଇଁ ଆବଶ୍ୟକ ଖର୍ଚ୍ଚ କମାଇଛନ୍ତି। ମହାମାରୀର ସ୍ବଳ୍ପମିଆଦୀ ପ୍ରଭାବ ଶିକ୍ଷା ବଜେଟ ଉପରେ ପଡ଼ିଛି। ବିଭିନ୍ନ ଅଞ୍ଚଳର ୨୯ଟି ଦେଶରୁ ସଂଗୃହୀତ ହୋଇଥିବା ତଥ୍ୟରୁ ଏହା ଜଣାପଡ଼ିଛି। ଉକ୍ତ ତଥ୍ୟକୁ ବିଶ୍ୱବ୍ୟାଙ୍କ ଟିମ୍ ଯାଞ୍ଚ କରିଥିଲା।
ନିମ୍ନ ଆୟକାରୀ ଦେଶ ମଧ୍ୟରେ ଆଫଗାନିସ୍ତାନ, ଇଥିଓପିଆ ଏବଂ ଉଗାଣ୍ଡା, ନିମ୍ନ-ମଧ୍ୟମ ଆୟକାରୀ ଦେଶ ମଧ୍ୟରେ ବାଂଲାଦେଶ, ଇଜିପ୍ଟ, ଭାରତ, କେନିଆ, କିର୍ଗିଜ୍ ରିପବ୍ଲିକ, ମରକ୍କୋ, ମ୍ୟାନ୍ମାର, ନେପାଳ, ନାଇଜେରିଆ, ପାକିସ୍ତାନ, ଫିଲିପାଇନ୍ସ, ତାଞ୍ଜାନିଆ, ୟୁକ୍ରେନ୍, ଉଜ୍ବେକିସ୍ତାନରୁ ତଥ୍ୟ ସଂଗ୍ରହ କରାଯାଇଥିଲା। ସେହିପରି ୧୦ଟି ଉଚ୍ଚ-ମଧ୍ୟମ ଆୟକାରୀ ଦେଶ ଆର୍ଜେଣ୍ଟିନା, ବ୍ରାଜିଲ, କଲମ୍ବିଆ, ଜୋର୍ଡାନ, ଇଣ୍ଡୋନେସିଆ, କାଜାକସ୍ତାନ, ମେକ୍ସିକୋ, ପେରୁ, ରୁଷିଆ ଏବଂ ତୁର୍କୀ ଏବଂ ଉଚ୍ଚ ଆୟକାରୀ ଦେଶ ଚିଲି ଏବଂ ପାନାମାରୁ ନମୁନା ତଥ୍ୟ ନିଆଯାଇଥିଲା। ଭାରତ ସମେତ ଆର୍ଜେଣ୍ଟିନା, ବ୍ରାଜିଲ, ଇଜିପ୍ଟ, ମ୍ୟାନମାର, ନାଇଜେରିଆ, ପାକିସ୍ତାନ ଏବଂ ରୁଷିଆ ବଜେଟରେ ଶିକ୍ଷା ପାଇଁ ୧୦ ପ୍ରତିଶତରୁ କମ୍ ବ୍ୟୟବରାଦ କରିଛନ୍ତି।
