ଯାଜପୁର,୨୨ା୮(ହର୍ଷବର୍ଦ୍ଧନ ବେହେରା): ଯାଜପୁର ଜିଲାର ଖଣି ଖାଦାନ ଭରା ଅଞ୍ଚଳର ବିକାଶ ପାଇଁ ଜିଲା ଖଣିଜ ପଦାର୍ଥ ପ୍ରତିଷ୍ଠାନ(ଡିଏମ୍ଏଫ୍) ଗଠିତ ହୋଇଛି। ଖଣି ଓ ଖଣିଜ ପଦାର୍ଥ ପ୍ରଶାସନିକ ପରିଚାଳନା ପାଇଁ ମାଇନ୍ସ ଓ ମିନେରାଲ ଡେଭଲପମେଣ୍ଟ ଆଣ୍ଡ ରେଗୁଲେଶନ ଆକ୍ଟ ୧୯୫୭ କୁ ୨୦୧୫ ମସିହାରେ ସଂଶୋଧନ କରାଯାଇଛି ା ଏହି ଆଇନର ସବସେକ୍ସନ ୧ ଧାରା ୯(ବି)ରେ ଜିଲାସ୍ତରରେ ଡିଏମ୍ଏଫ୍ ରହିଛି ା ହେଲେ ଏହି ଆଇନ ଯାଜପୁର ଜିଲାରେ ଦିଗହରା ହୋଇ ପଡିଛି ା ଡିଏମ୍ଏଫ୍ରେ ଶିକ୍ଷା ଓ ସ୍ବାସ୍ଥ୍ୟକୁ ଅଧିକ ଗୁରୁତ୍ୱ ଦେବାକୁ ଦାବି ହେଉଥିଲେ ହେଁ ଠିକାଦାରମାନଙ୍କ ସ୍ବାର୍ଥକୁ ଦୃଷ୍ଟିରେ ରଖି ପୂର୍ତ୍ତ ବିଭାଗ, ଜଳସେଚନ, ନିର୍ମାଣ ଆଦି ବିଭାଗକୁ ଅଧିକ ଅନୁଦାନ ଦିଆଯାଉଛି। ଗତ ୨୯ା୭ା୨୦୨୧ରେ ହୋଇଥିବା ପାଣ୍ଠି ବିନିଯୋଗ ରିପୋର୍ଟକୁ ଅବଲୋକନ କଲେ ଏହା ଜଳଜଳ ହୋଇ ଦିଶୁଛି। ଫଳରେ ଆଜି ବି ନଗଡ଼ା ସମେତ ଏହାର ଡାହାଣ ଓ ବାମପାର୍ଶ୍ୱ ଅଞ୍ଚଳ ଏବଂ ଖଣି ଖାଦାନ ଭରା କାଳିଆପାଣି ଅଞ୍ଚଳରେ ଶିକ୍ଷା ଓ ସ୍ବାସ୍ଥ୍ୟ କ୍ଷେତ୍ରରେ ସେତେଟା ବିକାଶ ହୋଇ ପାରି ନ ଥିବା ମତପ୍ରକାଶ ପାଇଛି।
ଯାଜପୁର ଜିଲା ଗଠନ ହେବା ପରେ ଏହାର ପାରିପାର୍ଶ୍ୱିକ, ଭୌଗୋଳିକ ବିକାଶ ଯେପରି ହେବା କଥା ତାହା ଏ ପର୍ଯ୍ୟନ୍ତ ହୋଇ ପାରିନାହିଁ ା ଆଜି ବି ଲୋକେ ବଣପାହାଡ଼ ଘେରା ଦୁର୍ଗମ ଅଞ୍ଚଳରେ ବିନା ସରକାରୀ ଯୋଜନାରେ ବଞ୍ଚି ରହୁଛନ୍ତି ା ସ୍ବାଧୀନତା ପୂର୍ବରୁ ସୁକିନ୍ଦା ଅଞ୍ଚଳରେ ଖଣି ଉତ୍ତୋଳନ ଆରମ୍ଭ ହୋଇଥିଲା ା ପ୍ରାକୃତିକ ସମ୍ପଦକୁ ଲୁଟ କରି ଶିଳ୍ପପତିମାନେ ମାଲାମାଳ ହୋଇଥିବାବେଳେ ଆଜି ବି ନଗଡ଼ା ଓ ଏହାର ଆଖପାଖ ଗ୍ରାମଗୁଡିକୁ ବିକାଶର ଆଲୁଅ ପହଞ୍ଚି ପାରିନାହିଁା ପ୍ରତ୍ୟେକ ଖଣି ପ୍ରଭାବିତ ଅଞ୍ଚଳର ସର୍ବାଙ୍ଗୀନ ବିକାଶ ପାଇଁ ଡିଏମ୍ଏଫ୍ ଗଠିତ ହୋଇଛି। ଏହିକ୍ରମରେ ୨୦୨୧ ଜୁଲାଇ ସୁଦ୍ଧା ଡିଏମ୍ଏଫ୍ ପାଣ୍ଠିରୁ ମେଗା ଉଠା ଜଳସେଚନ ପ୍ରକଳ୍ପ ପାଇଁ ୯୪ କୋଟି ୧୭ ଲକ୍ଷ ୭୦ ହଜାର ଟଙ୍କା ଖର୍ଚ୍ଚ ହୋଇଥିଲା। ଏହି ୨ ବର୍ଷ ମଧ୍ୟରେ ଆହୁରି ଅଧିକ ବିନିଯୋଗ ହୋଇଥିବ। ହେଲେ କାଳିଆପାଣି ଖଣି ଅଞ୍ଚଳବାସୀ ଏହି ପ୍ରକଳ୍ପରୁ ବୁନ୍ଦାଏ ପାଣି ତାଙ୍କ ଜମିକୁ ଏଯାଏ ମାଡ଼ି ନାହିଁ ବୋଲି ଅଭିଯୋଗ ହେଉଛି। ସେହିପରି କ୍ଷୁଦ୍ର ଜଳସେଚନ ପ୍ରକଳ୍ପ ପାଇଁ ୭ କୋଟି ୩ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା। ହେଲେ ଖଣି ପ୍ରଭାବିତ ଅଞ୍ଚଳବାସୀଙ୍କ କୌଣସି ଜମିରେ ଦୁଇଫସଲି ଚାଷ ଏଯାଏ ହୋଇ ପାରିନାହିଁ। ପୂର୍ତ୍ତ ବିଭାଗକୁ ସର୍ବାଧିକ ୨୩୭ କୋଟି ୩୨ ଲକ୍ଷ ୧୨ ହଜାର ଟଙ୍କା ସମେତ ଯାଜପୁର ଗ୍ରାମ୍ୟ ନିର୍ମାଣ ଡିଭିଜନକୁ ୩୯ କୋଟି ୩ ଲକ୍ଷ, ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗକୁ ୪୩ କୋଟି ୧୬ ଲକ୍ଷ ଟଙ୍କା ମଞ୍ଜୁର ହୋଇଛି। ଏହାବାଦ୍ ଅନ୍ୟାନ୍ୟ ବିଭାଗ ସମେତ ସମୁଦାୟ ୭୨୪ କୋଟି ୨୬ ଲକ୍ଷ ଟଙ୍କା କେବଳ ଡିଏମ୍ଏଫ୍ରୁ ଅର୍ଥ ମଞ୍ଜୁର ହୋଇଛି। ହେଲେ ଶିକ୍ଷା କ୍ଷେତ୍ରକୁ ଅବଲୋକନ କଲେ ଜିଲା ସମଗ୍ର ଅଭିଯାନକୁ ୩୦ କୋଟି ୧୫ ଲକ୍ଷ ଏବଂ ଜିଲା ଶିକ୍ଷାଧିକାରୀଙ୍କୁ ୩ କୋଟି ୬୧ ଲକ୍ଷ ଟଙ୍କା ପ୍ରଦାନ କରାଯାଇଥିଲା। ଏହାବାଦ୍ ସ୍ବାସ୍ଥ୍ୟ କ୍ଷେତ୍ରରେ ସିଡିଏମ୍ଓଙ୍କୁ ୬୪ କୋଟି ୨ ଲକ୍ଷ ଟଙ୍କା ମଞ୍ଜୁର ହୋଇଛି। ଶିକ୍ଷା କ୍ଷେତ୍ରକୁ ଅବଲୋକନ କଲେ ଏଯାଏ କାଳିଆପାଣି ଖଣି ଅଞ୍ଚଳରେ ଏକ ଯୁକ୍ତଦୁଇ କଲେଜ ପ୍ରତିଷ୍ଠା ହୋଇ ପାରିନାହିଁ। କୁହିକାରେ ଯୁକ୍ତଦୁଇ କଲେଜ ନିର୍ମାଣାଧୀନ ରହିଛି। ସେହିପରି କାଳିଆପାଣି ଅଞ୍ଚଳରେ ନିକଟରେ ଏକ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପ୍ରତିଷ୍ଠା ହୋଇଥିଲେ ହେଁ ଆବଶ୍ୟକ ଡାକ୍ତର ନାହାନ୍ତି। ଖଣି କର୍ତ୍ତୃପକ୍ଷ ଓ ଲୋକ ପ୍ରତିନିଧି ଯାହା ଚାହିଁଛନ୍ତି ତାହା ହିଁ ହୋଇଛି ବୋଲି ମତପ୍ରକାଶ ପାଇଛି।