ଓ୍ବାଶିଂଟନ୍: ନାମ ଜୟସେ ଡିଫଉ, ବୟସ ୯୦ ବର୍ଷ। ୯ ସନ୍ତାନ ସନ୍ତତିଙ୍କ ଜନନୀ, ୧୯ ଜଣଙ୍କ ଆଈ ଓ ୨୪ ଜଣଙ୍କ ଅଣଆଈ। ଆମେରିକାର ଏହି ବୃଦ୍ଧା ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛନ୍ତି ତାଙ୍କ ପାଠପଢ଼ାକୁ ନେଇ। ୧୯୫୧ ମସିହାରେ ଆମେରିକାର ନର୍ଦନ ଇଲିୟନ୍ସ ୟୁନିଭର୍ସିଟିରେ ପାଠପଢ଼ା ଆରମ୍ଭ କରିଥିଲେ। ସାଢ଼େ ୩ ବର୍ଷର ଅଧ୍ୟୟନ ବେଳେ ସେ ନିକଟସ୍ଥ ଏକ ଚର୍ଚ୍ଚରେ ଡନ୍ ଫ୍ରିମ୍ୟାନ୍ଙ୍କୁ ଭେଟିଥିଲେ। ଦୁହିଁଙ୍କ ମଧ୍ୟରେ ବନ୍ଧୁତା ଶେଷରେ ପ୍ରେମର ରୂପ ନେଇଥିଲା। ୧୯୫୫ରେ ଦୁହେଁ ବିବାହ ବନ୍ଧନରେ ବାନ୍ଧି ହୋଇଥିଲେ। ପରବର୍ତ୍ତୀ ସମୟରେ ଫ୍ରିମ୍ୟାନ୍ଙ୍କ ମୃତ୍ୟୁ ଘଟିଥିଲା। ଜୟସେ ପରେ ରୟ ଡିଫଉକ୍ଙ୍କୁ ବିବାହ କରିଥିଲେ। ଦ୍ୱିତୀୟ ସ୍ବାମୀଙ୍କ ସହ ସମ୍ପର୍କରୁ ତାଙ୍କର ୬ ପିଲା ଜନ୍ମ ହୋଇଥିଲେ। ପିଲାଙ୍କ ଲାଳନପାଳନ ଓ ଘର କଥା ବୁଝାବୁଝି ଭିତରେ ସେ ଆଉ ପାଠ ପଢ଼ିବାକୁ ସମୟ ପାଇ ନ ଥିଲେ। ଅଧୁରା ପାଠ ସମ୍ପୂର୍ଣ୍ଣ କରିବା ପାଇଁ ପରିବାର ଲୋକେ ବୁଝାଇବା ପରେ ୨୦୧୯ରେ ସେ ପୁଣି ପଢ଼ିବାକୁ ଆଗ୍ରହ ପ୍ରକାଶ କଲେ।
ସାଇତି ରଖିଥିବା ପୁରୁଣା ଷ୍ଟୁଡେଣ୍ଟ ଆଇଡି କାର୍ଡ ଧରି ସେ ପୁନର୍ବାର ନର୍ଦନ ଇଲିୟନ୍ସ ୟୁନିଭର୍ସିଟିକୁ ଗଲେ। ଅନ୍ଲାଇନ୍ରେ ପାଠପଢ଼ା ଶେଷ କରି ଏବେ ସେ ଜେନେରାଲ୍ ଷ୍ଟଡିଜ୍ରେ ସ୍ନାତକ ଡିଗ୍ରୀ ହାସଲ କରିଛନ୍ତି। ଜୟସେ କହିଛନ୍ତି, ତୁମେ ନିଜ ଭିତରେ ଯେଉଁଟା ଦେଖିପାର ନାହିଁ ଲୋକେ ତାକୁ ଦେଖିଥାନ୍ତି। ଏହି ଲୋକମାନେ ମୋତେ ଭରସା କରିଥିଲେ। ଏମାନଙ୍କୁ ମୁଁ କେବଳ ଧନ୍ୟବାଦ ଦେଇପାରିବି। ସେହି ବିଶ୍ୱ ବିଦ୍ୟାଳୟରେ ପାଠ ପଢ଼ିଥିବା ଜୟସେଙ୍କ ଜଣେ ନାତୁଣୀ କହିଛନ୍ତି, ଆଈ ଯେତେବେଳେ ଶିକ୍ଷା ସମ୍ପୂର୍ଣ୍ଣ କରିବା କଥା ପ୍ରକାଶ କରିଥିଲେ, ସେତେବେଳେ ପରିବାରର ସମସ୍ତେ ‘କାହିଁକି’ ବୋଲି ପ୍ରଶ୍ନ କରିବା ପରିବର୍ତ୍ତେ ‘କାହିଁକି ନୁହେଁ’ କହିଥିଲେ। ଶିକ୍ଷାର କେବେ ଶେଷ ନ ଥାଏ।
