କୁନ୍ଦୁରା,୯ା୧ (ଡି.ଏନ.ଏ.): କୋରାପୁଟ ଜିଲା କୁନ୍ଦୁରା ବ୍ଳକରେ ବର୍ଷ ନ ପୂରୁଣୁ ବଦଳି ହୋଇ ଚାଲିଛନ୍ତି ଗୋଷ୍ଠୀ ଶିକ୍ଷା ଅଧିକାରୀ। ଜୟପୁର ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ସୀମାଞ୍ଚଳ ମିଶ୍ର କୁନ୍ଦୁରା ଗୋଷ୍ଠୀ ଶିକ୍ଷା ଅଧିକାରୀ ପଦବୀରେ ୮ ମାସ ରହି ସେ ଅବସର ଗ୍ରହଣ କରିଛନ୍ତି। ୨୦୧୩ରୁ୨୦୨୨ ସୁଦ୍ଧା ଏଠାରୁ ୧୩ ଜଣ ଗୋଷ୍ଠୀ ଶିକ୍ଷା ଅଧିକାରୀ ବଦଳି ହୋଇଛନ୍ତି। ୨୦୧୨-୧୩ରେ ପ୍ରଥମ ଗୋଷ୍ଠୀ ଶିକ୍ଷା ଅଧିକାରୀ ଭାବେ ରାଜାରାମ ମେହେର ଯୋଗ ଦେଇଥିଲେ। ସେ ୧୦ ମାସ ରହିବା ପରେ ତାଙ୍କର ବଦଳି ହୋଇଥିଲା। ସେହି ସ୍ଥାନରେ ସଲିଳା ବେହେରାଙ୍କୁ ଦାୟିତ୍ୱ ପ୍ରଦାନ କରାଗଲା। ପରେ ଚନ୍ଦ୍ରଶେଖର ପ୍ରଧାନ, ଗୋଦାବରୀଶ ଆଚାର୍ଯ୍ୟ, ଶ୍ରୀକାନ୍ତ ଜାନି, ବିନୋଦ ଚନ୍ଦ୍ର ପଟ୍ଟନାୟକ, ବିଚିତ୍ର ମୋହନ ସେଠୀ, ସୁଧୀର ଚନ୍ଦ୍ର ରଥ, ସୀମାଞ୍ଚଳ ମିଶ୍ର ପ୍ରମୁଖ ଅଧିକାରୀ ଗୋଷ୍ଠୀ ଶିକ୍ଷା ଅଧିକାରୀ ରୂପେ କାର୍ଯ୍ୟ କରିଛନ୍ତି। ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ତିଳୋତ୍ତମା ଗରଡା ୩ ଥର ଗୋଷ୍ଠୀ ଶିକ୍ଷା ଅଧିକାରୀ ଦାୟିତ୍ୱ ତୁଲାଇଛନ୍ତି। କୁନ୍ଦୁରା ଗୋଷ୍ଠୀ ଶିକ୍ଷା ଅଧିକାରୀଙ୍କ ଅଧୀନରେ ୧୪୦ ବିଦ୍ୟାଳୟ ରହିଥିବା ବେଳେ ୪ଶହରୁ ଊର୍ଦ୍ଧ୍ୱ ଶିକ୍ଷକ କାର୍ଯ୍ୟ କରୁଛନ୍ତି। ଏଠାରେ ରହିଥିବା ୩ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀଙ୍କ ମଧ୍ୟରୁ ଜଣକୁ ବଦଳି କରାଯାଇ ଥିବାବେଳେ ଅନ୍ୟ ଜଣେ ଅବସର ଗ୍ରହଣ କରିଛନ୍ତି। ଏବେ ଜଣେ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀଙ୍କ ଦ୍ୱାରା ୧୪ଟି ଉଚ୍ଚ ବିଦ୍ୟାଳୟ, ଗୋଟିଏ ଆଦର୍ଶ ବିଦ୍ୟାଳୟ, ୧୧୯ଟି ପ୍ରାଥମିକ ବିଦ୍ୟାଳୟ ପରିଚାଳିତ ହେଉଛି। ସେହିପରି ଏଠାରେ ମୁଖ୍ୟ କିରାଣିଙ୍କ ଦେହାନ୍ତ ପରେ ସେହି ସ୍ଥାନ ଦୁଇ ବର୍ଷ ବିତି ଯାଇଥିଲେ ସୁଦ୍ଧା ପୂରଣ ହୋଇନହିଁ। ଫଳରେ ବିଭିନ୍ନ କାର୍ଯ୍ୟରେ ଗୋଷ୍ଠୀ ଶିକ୍ଷାଧିକାରୀଙ୍କ କାର୍ଯ୍ୟାଳୟକୁ ଆସୁଥିବା ଶିକ୍ଷକମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। କନିଷ୍ଠ କିରାଣି ପଦବୀ ମଧ୍ୟ ୩ ବର୍ଷ ହେଲା ଖାଲି ପଡିଛି। ଏ ଦିଗରେ ଜିଲା ପ୍ରଶାସନ ଓ ସ୍ଥାନୀୟ ଜନ ପ୍ରତିନିଧିମାନେ ଦୃଷ୍ଟି ଦେଇ ଖାଲି ପଦବୀ ପୂରଣ ଦିିଗରେ ପଦକ୍ଷେପ ନେବାକୁ ଦାବି ହେଉଛି।