ସମ୍ବଲପୁର,୧୭ା୧୨(ବ୍ୟୁରୋ): ପଶ୍ଚିମ ଓଡ଼ିଶାରେ ହାଇକୋର୍ଟ ସ୍ଥାୟୀ ବେଞ୍ଚ ଦାବି ନେଇ ଆନ୍ଦୋଳନ ଘଟଣାରେ ରାଜ୍ୟ ସରକାରଙ୍କ ପକ୍ଷରୁ ପ୍ରତିକ୍ରିୟା ଦିଆଯାଇଛି। ଏଥିରେ କେନ୍ଦ୍ର ଉପରେ ଦୋଷ ଲଦି ନିଜେ ବଞ୍ଚିଯିବାକୁ ପ୍ରୟାସ କରାଯାଉଥିବା ସ୍ପଷ୍ଟ ହେଉଛି ବୋଲି ଐତିହାସିକ ଦୀପକ ପଣ୍ଡା କହିଛନ୍ତି। ସେ ଅଭିଯୋଗ କରିଛନ୍ତି, ହାଇକୋର୍ଟର ସ୍ଥାୟୀ ବେଞ୍ଚ ସ୍ଥାପନ ପାଇଁ ନିୟମ ଓ ସର୍ତ୍ତାବଳୀ ରହିଛି। ନୂତନ ରାଜ୍ୟ ହେବା ସ୍ଥିତିରେ କେବଳ କେନ୍ଦ୍ର ସରକାର ସ୍ବୟଂ ଏକତରଫା ଭାବେ ବିଲ ଆଣି ହାଇକୋର୍ଟ କରିପାରିବେ। ସଂଘୀୟ ବ୍ୟବସ୍ଥା ମଧ୍ୟରେ ରାଜ୍ୟ ସରକାର ହିଁ ହାଇକୋର୍ଟର ମୁଖ୍ୟ ବିଚାରପତିଙ୍କ ସହ ବିଚାରବିମର୍ଷ କରି ସ୍ଥାନ, ଭିତ୍ତିଭୂମି, ଅର୍ଥ ବ୍ୟବସ୍ଥା ସୂଚାଇ ସ୍ବୟଂସମ୍ପୂର୍ଣ୍ଣ ପ୍ରସ୍ତାବ ପଠାଇଲା ପରେ କେନ୍ଦ୍ର ସରକାର ପଦକ୍ଷେପ ନେଇପାରିବେ। ଦେଶସାରା ସ୍ଥାୟୀ ବେଞ୍ଚ ସ୍ଥାପନର ଧାରାକୁ ଅନୁଧ୍ୟାନ କଲେ ଏହା ସ୍ପଷ୍ଟ ହୋଇଯାଉଛି। ମଦୁରାଇରେ ବେଞ୍ଚ ସ୍ଥାପନ ହେବା ଘଟଣାକୁ ଉଦାହରଣ ଭାବେ ନିଆଯାଇପାରେ। କେନ୍ଦ୍ର ସରକାର ହାଇକୋର୍ଟ ବେଞ୍ଚ ସ୍ଥାପନ କରିପାରିବେ କହିବା ଦାୟିତ୍ୱହୀନତା, ସତ୍ୟର ଅପଳାପ ଅଟେ। ଦଶନ୍ଧି ଦଶନ୍ଧି ଧରି ଆନ୍ଦୋଳନ ଚାଲିଥିବା ଅବସ୍ଥାରେ ସାମ୍ବିଧାନିକ ବ୍ୟବସ୍ଥା, ପ୍ରଣାଳୀ ବାବଦରେ ସଚେତନ ଲୋକଙ୍କୁ ଠକିହେବ ନାହିଁ। ସମ୍ବଲପୁରଠାରେ ହାଇକୋର୍ଟ ସ୍ଥାୟୀ ବେଞ୍ଚର ପ୍ରକୃତ ତଥ୍ୟ ମୁଖ୍ୟମନ୍ତ୍ରୀ ସୁପ୍ରିମକୋର୍ଟରେ ଉପସ୍ଥାପନ କରନ୍ତୁ ବୋଲି ପଣ୍ଡା ଅନୁରୋଧ କରିଛନ୍ତି ।