ନୂଆଦିଲ୍ଲୀ,୨୬।୫: ସରକାରଙ୍କ ପକ୍ଷରୁ ଚିନି ରପ୍ତାନିର ସର୍ବାଧିକ ସୀମା ନିର୍ଦ୍ଧାରଣ ସମ୍ପର୍କିତ ନିଷ୍ପତ୍ତି ଠିକ୍ ସମୟରେ ନିଆଯାଇଥିବା ବୁଧବାର କେନ୍ଦ୍ର ଖାଦ୍ୟ ସଚିବ ସୁଧାଂଶୁ ପାଣ୍ଡେ କହିଛନ୍ତି। ଏହି ନିଷ୍ପତ୍ତି ସତର୍କତା ଆଧାରରେ ନିଆଯାଇଛି। ଫଳରେ ଅକ୍ଟୋବର-ନଭେମ୍ବର ପର୍ବପର୍ବାଣି ଋତୁରେ ଚିନି ଅଭାବ ଘଟିବନାହିଁ ଏବଂ ଦର ମଧ୍ୟ ଠିକ୍ ରହିବ ବୋଲି ସଚିବ କହିଛନ୍ତି। ତେବେ ଅନ୍ୟ ସମସ୍ତ ପଦାର୍ଥ ତୁଳନାରେ ଚିନି ଦର ସ୍ଥିର ରହିଛି। ଆଗାମୀ ଦିନରେ ଦର ବୃଦ୍ଧି ଆଶଙ୍କା ଦୂର କରିବାକୁ ଏହି ପଦକ୍ଷେପ ନିଆଯାଇଛି। ଏହା ସହିତ ଚିନି ଉତ୍ପାଦନ କ୍ଷେତ୍ରରେ ବ୍ରାଜିଲକୁ ପଛରେ ପକାଇ ଭାରତ ବିଶ୍ୱର ଅଗ୍ରଣୀ ଦେଶ ଏବଂ ୨ୟ ସର୍ବାଧିକ ରପ୍ତାନିକାରୀ ଭାବରେ ପରିଗଣିତ ହୋଇଥିବା ସଚିବ ସୂଚନା ଦେଇଛନ୍ତି। ଭାରତ ସରକାର ଚଳିତ ମାର୍କେଟିଂ ବର୍ଷ ପାଇଁ ଚିନି ରପ୍ତାନିର ସର୍ବାଧିକ ସୀମା ୧ କୋଟି ଟନ୍ ନିର୍ଦ୍ଧାରଣ କରିଛନ୍ତି।
